Abakora muri farumasi baburiwe ku guha abarwayi imiti nta cyemezo kibigaragaza

Yanditswe na Nkurunziza Ferdinand
Kuya 12 Mutarama 2020 saa 02:28
Yasuwe :
0 0

Ubucuruzi bw’imiti ivura mu Rwanda, ni bumwe mu bwizerwa cyane n’abatari bake hashingiwe cyane cyane ku cyizere gihabwa abakora ubu bucuruzi, baba bazwiho ubumenyi bwihariye kuko budapfa gukorwa n’ubonetse wese.

Mu Rwanda, ubucuruzi bw’imiti ivura indwara bukorerwa gusa ku mavuriro na farumasi, nabyo bibifitiye uburenganzira butangwa n’inzego zitandukanye zirimo izishinzwe ubuzima, ubucuruzi, ndetse n’izigenzura ubuziranenge.

Inzira isa n’itoroshye yo guhabwa uburenganzira bwo gucuruza imiti, igenzurwa rya hato na hato ku bakora ubu bucuruzi, ndetse n’ingamba zashyizweho na Leta hagamijwe kwirinda ko ubucuruzi bw’imiti bwakorwa mu kavuyo; bigaragaza agaciro gahabwa uburyo bwo kurengera ubuzima bw’abagura imiti.

Abakora ubucuruzi bw’imiti kandi bafatwa nka bamwe mu ntiti, ahanini hashingiwe ku myaka myinshi bamara bahabwa ubumenyi ku miti, ndetse n’amasomo baba barize akaba afatwa na benshi nk’agenewe abahanga cyane.

Gusa nk’ubucuruzi bwose bugamije inyungu, hari ahashobora gukorwa amakosa aturutse ku gitutu cyo gushaka amafaranga cyane, hakirengagizwa amahame ngenderwaho agenga imikorere muri ubwo bucuruzi.

Mu mahame agenga itangwa cyangwa icuruzwa ry’imiti ku bantu, harimo ko uhabwa umuti abanza kwerekana urupapuro rwanditswe na muganga ubifitiye ububasha nk’ikimenyetso cyemeza ko umurwayi yemerewe guhabwa umuti runaka by’umwihariko ku miti ifatwa igihe kirekire cyangwa ivura uburwayi bukomoka ku bwandu.

Nubwo imiti yose idatangwa habanje kugaragaza urupapuro rwa muganga; hari ingero zitari nke zigaragaza imikorere ikwiye gukemangwa mu itangwa ry’imiti yari ikwiye gutangwa hashingiwe ku nyandiko ya muganga muri za farumasi.

Mu kiganiro kihariye IGIHE yagiranye Prof Kayumba Pierre Claver, umuhanga mu by’imiti, wigisha muri kaminuza y’u Rwanda, akaba n’umwe mu bajyanama b’Ishyirahamwe ry’Abahanga mu by’Imiti mu Rwanda, yadutangarije ko iki kibazo gishingiye ku mikorere mibi igaragara mu rwego rw’ubucuruzi bw’imiti, kandi ko gikwiye guhagurukirwa n’inzego zitandukanye.

Ati “Abantu bose bakwiye kumenya ko imiti ari uburozi kuko itaribwa cyangwa ngo inyobwe uko umuntu yishakiye. Imiti itangwa hashingiwe ku rupapuro rwa muganga irazwi, kandi n’umucuruzi w’imiti na we aba abizi; abaharanira inyungu z’amafaranga kuruta ubuzima bw’abantu baba barenze ku mabwiriza agenga umwuga.”

Prof Kayumba akomeza avuga ko kuba hari umurwayi uza akimwa imiti muri farumasi runaka kubera nta ‘ordonance’ afite, yajya mu yindi bakayimuha bifatwa nk’imikorere mibi iri mu mafarumasi .

Ni iki gitera iki kibazo?

Politiki yo gufungurira amarembo abashora imari muri farumasi kandi badafite ubumenyi bwihariye ku miti, ivugwaho guha urwaho ikibazo cy’imitangire mibi y’imiti.

Aha ngo umukozi wahawe akazi muri farumasi asabwa na shebuja gukoresha uburyo bwose bwo kwinjiza amafaranga, mu rwego rwo kurengera akazi ke n’iterambere rya nyiri farumasi.

Bumwe muri ubwo buryo harimo gutanga imiti atiriwe asaba urupapuro rwanditswe na muganga, yirinda ko mu gihe yatse urwo rupapuro kandi ukeneye imiti ntarwo afite, yahitamo kwigira mu yindi farumasi.

Aha hiyongeraho n’ikibazo cy’ubucucike bwa za farumasi mu duce tumwe nabyo bifatwa nk’intandaro y’ihangana rigamije kwinjiza amafaranga kuruta gutanga serivisi uko biteganywa n’amategeko.

Umubare ukiri muto w’abahanga mu by’imiti mu gihugu nawo ni ikibazo kigaragazwa n’inzobere mu by’imiti, nk’intandaro y’imitangire idahwitse y’imiti muri za farumasi, kuko mubyo utanga imiti ashinzwe harimo no kugira inama uyihawe.

Hari kandi n’abacuruza imiti bamwe na bamwe, baca mu rihumye igenzurwa rikorwa rigamije kureba imiti iri ku isoko kandi ibura igihe gito ngo irenze igihe yagenewe, bahitamo kuyitanga nta mpapuro za muganga basabye kugira ngo birinde ko iyo miti yazarenza igihe bakiyifite mu bubiko bwabo.

Amategeko mpuzamahanga ateganya ko umuti urengeje ½ cy’igihe wateganyirijwe kumara, ariko ukaba utaragezwa ku isoko ry’aho uzacururizwa; udakwiye kwemererwa kwinjizwa mu gihugu icyo aricyo cyose.

Minisiteri y’Ubuzima nk’urwego rwa leta rukuriye ibikorwa by’ubuvuzi, Ikigo cy’Igihugu Kigenzura Imiti n’ibiribwa, Ishyirahamwe ry’Abahanga mu by’Imiti n’izindi nzego zifite aho zihuriye n’ikorwa ndetse n’icuruzwa ry’imiti bagirwa inama yo gukurikiranira hafi iki kibazo kitarafata indi ntera.

Abakora ubucuruzi bw’imiti nabo bakwiye kwibutswa amahame shingiro agenga umwuga wabo, ndetse hagakazwa n’ibihano ku bantu bose bafatwa bari kunyuranya n’ayo mahame arimo gutanga imiti hadashingiwe ku rupapuro rwa muganga, bihuzwa no gushyiraho igenzura ritunguranye muri za farumasi, hagamijwe gukurikirana uko amahame agenga umwuga wo gucuruza imiti ashyirwa mu bikorwa.

Kugeza ubu mu Rwanda umuhanga mu by’imiti umwe yita ku bantu ibihumbi 14, hakifuzwa ko nibura yaba yita ku ibihumbi 10 mu 2025.

Ntibyoroshye kumenya umubare w’abapfa bazize gufata imiti mu buryo butagenwe na muganga mu Rwanda kuko nta bushakashatsi bwakozwe kuri iyi ngingo; gusa hashingiwe ku bivugwa n’abahanga mu by’imiti, nta wahamya ko nta mubare w’abatakariza ubuzima mu kunywa imiti mu buryo butagenwe na muganga, biturutse ku kuba nta makuru ahagije bahawe n’umuhanga mu by’imiti cyangwa barayinyweye nta muganga wayibandikiye.

Ubusanzwe ukora muri farumasi ategetswe gutanga umuti mbere yo kubona icyemezo cya muganga wemewe cyandikiwe umurwayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .