Ni ibyagarutsweho mu nama y’igihugu yo kurwanya indwara ziterwa n’udukoko zigira ubudahangarwa ku miti, yahuriranye n’inama ngarukamwaka ya 12 y’abahanga mu by’imiti yateranye ku wa 22 Ugushyingo 2024.

Umuyobozi w’Urugaga rw’Abahanga mu by’Imiti, DCG (Rtd) Stanley Nsabimana,, yanyuzwe n’aho urugaga rugeze mu kugenzura umwuga no kurengera ubuzima rusange bw’abaturage, yibutsa abitabiriye inama kurangwa n’indagagaciro zirimo gukunda igihugu n’ubunyamwuga.

Yagize ati “Ubu aho urugaga rugeze mu kugenzura umwuga harashimishije. Urugamba rwo guhangana n’indwara zigira ubudahngarwa ku miti ni urwa buri wese kandi rukeneye ubufatanye.”

Yakomeje avuga ko Isi ihangayikishijwe n’indwara ziterwa n’udukoko zigira ubudahangarwa ku miti, ariko abahanga mu by’imiti biyemeje gukorera hamwe ngo bahashye iki kibazo, kandi biteguye gushishikariza abaturage gukoresha imiti neza.

Ati “Muri rusange ni ikibazo gihangayikishije Isi, ibi bigira ingaruka ku buzima bw’abaturage, ni yo mpamvu ari inshingano zacu nk’abahanga mu by’imiti guhangana nabyo.”

Yakomeje agira ati “Tugomba gusangira ubumenyi kugira ngo turusheho kuzuza inshingano zacu, kandi tugomba kwigisha abaturage, bakamenya ingano y’imiti bafata ndetse n’uburyo bayifatamo.”

DCG (Rtd) Nsabimana, yashimangiye ko abahanga mu by’imiti bazakomeza kubaha amahame agenga umwuga wabo kandi ko bazakomeza gusigasira ikinyabupfura n’indangagaciro z’umwuga wabo, kugira ngo u Rwanda ruzagere ku cyerekezo rwihaye cya 2050.

Iyi nama yari yitabiriwe n’abayobozi bo mu nzego zitandukanye harimo, Umuyobozi Mukuru w’ikigo cy’igihugu gishinzwe ubuzima (RBC), Prof. Muvunyi Mambo Claude, umuyobozi uhagarariye umuryango w’Abibumbye wita Ku buzima mu Rwanda (OMS).

Yari yitabiriwe kandi n’abafatanyabikorwa batandukanye ndetse n’abahanga mu by’imiti barenga 500, bose intero ari imwe yo kurengera ubuzima bw’abaturage bita ku ikoreshwa ry’imiti rinoze.

Urugaga rw’Abahanga mu by’imiti mu Rwanda (National Pharmacy Council) rubarizwamo abahanga mu by’imiti bafite icyiciro cya kabiri cya kaminuza muri Farumasi cyangwa icyiciro cya mbere cya kaminuza muri Farumasi, kuri ubu rufite abahanga mu by’imiti 1343.

Nk’uko bigenwa n’itegeko rirushyiraho, urugaga ni rwo murinzi w’amategeko, icyubahiro n’ishema by’umwuga w’abahanga mu by’imiti, rukanarengera ubuzima rusange bw’abaturage.

Urugaga rubungabunga ubusugire bw’amahame yerekeye imyifatire myiza, ubwitange bya ngombwa mu murimo w’abahanga mu by’imiti, runareba ko abarugize bose bubahiriza ibyo bashingwa n’umwuga wabo, kimwe n’amategeko n’amabwiriza agenga abahanga mu by’imiti.

Abagize urugaga rw’abahanga mu by’imiti bashyizeho ihuriro ryo guharanira inyungu zabo “Pharmaceutical Society of Rwanda” aho umuyobozi watowe ari Muhoza Frederic.

Dr John NYILIGIRA ushinzwe imyitwarire y'abahanga mu by'imiti mu rugaga akaba n'umuyobozi wungirije yibukije ko indangagaciro n'amahame agenga umwuga bigomba gusigasirwa kugira ngo turinde ubuzima b

Vuguziga Thadee, Umwandisti mukuru wungirije w'urugaga rw'abaganga n'abaganga b'amenyo yatanze ibitekerezo muri iyi nama

Umwanditsi mukuru w'urugaga rw'abahanga mu by'imiti, Nsengeyukuri Jean Damascene yibukije abitabiriye inama, amategeko abagenga ndetse n'inshingano z'urugaga

Uhereye ibumoso Uzabakiriho Darius,Dr. John Nyiligira , INES Buki K. Jeje, Prof. Egide Kayitare, Ines Uwineza ndetse na Hitayezu Felix bahuguye bagenzi babo ku myitwarire inoze izabageza ku cyerekezo 2050

DCG(Rtd) Stanley Nsabimana, Umuyobozi w'Urugaga rw'abahanga mu by'imiti

Itorero Inyamibwa ryasusurukije abitabiriye iri huriro ry'abahanga mu by'imiti

Prof. Muvunyi Claude Mambo ni we wari umushyitsi mukuru ahagarariye Minisitiri w'Ubuzima

Abitabiriye iyi nama biyemeje kwimakaza ubunyamwuga no kurinda ubuzima rusange bw’abaturage

Abitabiriye iyi nama barenga 500

Abahagarariye abandi bafashe ifoto y'urwibutso

Itorero Inyamibwa ryarishimiwe cyane