00:00:00 IGIHE NETWORK KN KINYARWANDA EN ENGLISH FR FRANCAIS

Abafata ifunguro ririmo amavuta y’inka bafite ibyago bike byo kurwara umutima

Yanditswe na Zigiranyirazo Bajecteur
Kuya 24 Nzeri 2021 saa 05:49
Yasuwe :
0 0

Itsinda mpuzamahanga ry’abashakashatsi ryakoreye ubushakashatsi ku bantu bagera ku 4 150 bageze mu myaka 60 muri Suède, igihugu kizwi nk’ikiza ku isonga mu gutunganya amavuta akomoka ku mata, bugaragaza ko abantu bafata cyane amafunguro arimo ayo mavuta baba bafite ibyago bike byo kwibasirwa n’indwara y’umutima n’izindi nko guturika k’udutsi tw’ubwonko n’izifite aho zihuriye no gutembera kw’amaraso.

CNN ivuga ko mu myaka igera kuri 16 inzobere zamaze zikurikirana abakoreweho ubushakashatsi, byagaragaye ko abafata amafunguro arimo ayo mavuta akomoka ku mata badakunze kwibasirwa n’indwara zifata umutima ndetse bakaba banafite amahirwe yo kudakenyuka ugereranyije n’abandi bakoreweho ubushakashatsi nk’ubwo bagera ku bihumbi 43 bose hamwe mu bihugu birimo Leta Zunze Ubumwe za Amerika, u Bwongereza na Denmark.

Matti Marklund, umushakashatsi mukuru mu Kigo cy’Ubuzima cyitiriwe George i Sydney muri Australia, avuga ko ari iby’agaciro gukora ubushakashatsi nk’ubwo bwisumbuyeho kugira ngo abantu barusheho gusobanukirwa akamaro k’amata .

Ubu bushakashatsi bwasohotse mu kinyamakuru cya PLOS Medecine, bugaragaza ko ibikomoka ku mata biba birimo intungamubiri nyinshi ku buryo hari nk’abatinya kurya amavuta y’inka cyangwa kunywa amata kubera ubwoba bw’uko bagira umubyibuho ukabije, ariko ngo abo bantu bakwiye kuzirikana umumaro w’ayo mafunguro mu kubarinda kwibasirwa n’indwara z’umutima.

Abashakashatsi batanga inama ko abantu badakwiye kwirinda ibikomoka ku mata ahubwo bakwiye kumva umumaro wabyo ku buzima bwabo.

Inzobere zagaragaje ko amavuta akomoka ku mata arinda indwara z'umutima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .