00:00:00 IGIHE NETWORK KN KINYARWANDA EN ENGLISH FR FRANCAIS

Yajyanye abanyamakuru mu nkiko! Col Ntiwiragabo ukekwaho uruhare muri Jenoside akomeje kuvuna imiheha akongezwa indi

Yanditswe na Ntabareshya Jean de Dieu
Kuya 15 Mutarama 2023 saa 10:42
Yasuwe :

Col Ntiwiragabo Aloys, ushinjwa uruhare muri Jenoside yakorewe Abatutsi akaba akiri kwidegembya yareze umunyamakuru Maria Malagardis amushinja kumuharabika.

Uyu mugabo ushinjwa uruhare muri Jenoside yakorewe abatutsi cyane ko yabaye mu butasi mu 1994, biteganyijwe ko urukiko rwo mu Bufaransa aho yahungiye ruzatangira kumva ikirego cy’urubanza rwe ku wa 19 Mutarama uyu mwaka.

Ikirego cya Col Ntiwiragabo yagishingiye ku butumwa bwanyujijwe kuri Twitter nyuma yo gutangaza inkuru ku rubuga rw’ikinyamakuru cya Médiapart ivuga ko Ntiwirigabo Aloys ushinjwa uruhare muri Jenoside yidegembya mu Bufaransa.

Iyo nkuru yagaragazaga ko uyu mugabo akunze kwihisha imyaka myinshi aho yari atuye mu gace kazwi nka banlieue d’Orléans.

Nyuma y’iyo nkuru yatangajwe uyu munyamakuru yasubije mu buryo busanzwe bwo gutanga igitekerezo kuri iyo nkuru agira ati “Umu-Nazi w’Umanyafurika mu Bufaransa? Hagira unsobanurira?

Bivugwa ko ikoreshwa ry’iri jambo Umu-Nazi w’Umunyafurika ari ryo ryatumye Col Ntiwiragabo atanga ikirego.

Ntiwiragabo kandi yereze umwanditsi w’ikinyamakuru Médiapart, Théo Englebert wanditse iyo nkuru yatumye Maria Malagardis amwibasira ngo akurikiranwe n’ubutabera kubera kumuharabika.

Ntiwiragabo Aloys ari mu batari bake bakekwaho uruhare muri Jenoside yakorewe Abatutsi baba mu Bufaransa. Yasabye ubuhungiro arabwimwa ku mpamvu zifitanye isano n’ibyaha akekwaho ariko ntihagira igikorwa ngo abe yakurikiranwa.

Mu 2020 u Rwanda rwandikiye u Bufaransa busaba ko yakoherezwa mu gihugu ndetse yashyiriweho n’impapuro zo kumuta muri yombi na Polisi Mpuzamahanga (Interpol) ariko ntibyakorwa.

Ntiwiragabo ashinjwa kugira uruhare muri Jenoside yakorewe Abatutsi no kuba umwe mu bacurabwenge bayo cyane ko mu 1993 yari akuriye ubutasi mu gisirikare cy’u Rwanda ndetse akaba n’Umugaba w’Ingabo wungirije.

Kugeza ubu akurikiranyweho ibyaha birimo ibyibasiye inyokomuntu, ari no mu bashinze umutwe w’iterabwoba wa FDLR akanawuyobora.

Nko mu 1997, Urukiko mpuzamahanga rwashyiriweho u Rwanda (ICTR) rwatanze integuza y’ishakishwa kuri Ntiwiragabo ariko ibikorwa byo kumushaka biza guhagarikwa mu 2005 ubwo rwashyirwagaho igitutu ngo imirimo yarwo irangizwe.

Uyu mugabo ariko yavuzwe nibura inshuro 12 mu nyandiko y’ibirego yashyizweho mu 1998 irega abahoze ari abajandarume bakuru babiri bo mu Rwanda Kabiligi na Ntabakuze.

Akekwaho kuba mu mugambi umwe no kurimbura Abatutsi no gutsimba abatavuga rumwe n’ubutegetsi kugira ngo bakomeze kubugundira.

Nubwo imirimo ya ICTR yahagaze ariko bivugwa ko izina rye rizongera kuvugwa mu rukiko mu ibaruwa yandikiwe Akanama gashinzwe umutekano ka Loni igaragaza impamvu yo kumushakisha no kumuburanya ari ngombwa.

Nyamara uru rukiko rwamaze gufunga imiryango ntabwo ruzamuburanya ku ruhare rwe nk’uwari ukuriye ubutasi bwa gisirikare kugera mu 1993 mu gihe Anatole Nsengiyumva wafashwe mbere yakatiwe igifungo cy’imyaka 15 muro 2011.

Ntiwiragabo yageze mu Bufaransa asanze umugore we nubwo mu 2011 yimwe visa bigendanye n’ibyaha akurikiranyweho birimo kugira uruhare mu ikorwa rya Jenoside yakorewe Abatutsi.

Col Ntiwiragabo Aloys akekwaho kugira uruhare muri Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .