00:00:00 IGIHE NETWORK KN KINYARWANDA EN ENGLISH FR FRANCAIS

Urubanza rwa Jado Castar rwasubitswe

Yanditswe na Nkundineza Jean Paul
Kuya 6 Ukuboza 2021 saa 10:16
Yasuwe :

Urukiko Rukuru rwasubitse urubanza rw’ubujurire bwa Bagirishya Jean de Dieu ’Jado Castar’ wakatiwe igifungo cy’imyaka ibiri ahamijwe icyaha cyo gukoresha inyandiko mpimbano.

Jado Castar usanzwe ari Visi Perezida wa Kabiri ushinzwe Amarushanwa mu Ishyirahamwe Nyarwanda ry’Umukino wa Volleyball (FRVB), yahise ajuririra umwanzuro w’Urukiko Rwisumbuye rwa Gasabo wo ku wa 13 Ukwakira 2021.

Kuri uyu wa Mbere, tariki ya 6 Ukuboza 2021 ni bwo yagombaga kuburana ubujurire bwe mu Rukiko Rukuru ariko iryo buranisha ryasubitswe.

Ubwanditsi bw’urukiko bwabwiye umunyamakuru wa IGIHE ko urubanza rwa Jado Castar rutakibaye kuko umwe mu bacamanza bagize inteko iruburanisha atabonetse kubera akandi kazi yagiyemo.

Kuri uyu munsi ku rukiko hari umugore wa Jado Castar na bamwe mu bagize umuryango we bari biteguye kumva uko yiregura mu bujurire bwe.

Jado Castar usanzwe ari umunyamakuru w’imikino yahamijwe icyaha cyo gukoresha inyandiko mpimbano ubwo Ikipe y’Igihugu y’u Rwanda y’Abagore yari mu Gikombe cya Afurika cya Volleyball cyabereye i Kigali hagati ya tariki ya 10 n’iya 20 Nzeri 2021, ishinjwa gukinisha abakinnyi bakomoka muri Brésil batujuje ibisabwa.

Mu minsi ishize, Me Kamagaju Béatrice uri mu bunganizi ba Jado Castar yabwiye IGIHE ko umukiliya we yajuririye Urukiko Rukuru arutakambira ngo rumugabanyirize ibihano.

Icyo gihe yagize ati “Twajuriye kugira ngo dutakambire Urukiko Rukuru turebe ko Jado Castar yasubikirwa igihano aho gukora imyaka ibiri afunzwe ahubwo icyo gihano kikaba cyasubikwa kuko byose biteganywa n’amategeko.’’

Uyu munyamategeko yavuze ko usibye no gusubikirwa igihano, amategeko ateganya ko ashobora no gutanga ihazabu ya miliyoni 3Frw agafungurwa.

Castar yatawe muri yombi ku wa 20 Nzeri 2021. Yahise aburanishwa mu mizi hatabayeho ko aburana ifunga n’ifungurwa ry’agateganyo kuko yaburanye yemera icyaha, anagisabira imbabazi.

Biteganyijwe ko ubujurire mu rubanza ruregwamo Jado Castar buzumvwa ku wa 24 Ukuboza 2021, saa Mbili za mu gitondo humvwa impamvu zikomeye zatumye ajururira icyemezo yafatiwe mu Rukiko rwisumbuye rwa Gasabo cyo gufungwa imyaka ibiri.

Jado Castar yahinduriwe itariki yo kuburana kubera inteko y'abacamanza yabuze
Urubanza rwa Jado Castar ruburanishirizwa mu Rukiko Rukuru ruri i Nyamirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .