00:00:00 IGIHE NETWORK KN KINYARWANDA EN ENGLISH FR FRANCAIS

Urubanza rw’abagaragaye bakubita umuntu bunyamaswa i Kigali rwongeye gusubikwa

Yanditswe na IGIHE
Kuya 6 May 2022 saa 07:47
Yasuwe :

Urubanza rw’abasore batatu n’umukobwa umwe bashinjwa gukubita no gukomeretsa Enoch Aaron Rwagasana washinze Neptunez Band ndetse no kunywa ibiyobyabwenge, rwongeye gusubikwa nyuma yo kugaragaza inzitizi.

Ni mu rubanza rwabaye kuri uyu wa Kane tariki 5 Gicurasi 2022, mu Rukiko Rwisumbuye rwa Nyarugenge.

Abaregwa ni Alex Nkuranga Karemera na Soteri Junior Gatera Kagame baregwa gukubita no gukomeretsa ndetse no kunywa ibiyobyabwenge mu gihe Robert Mutabazi na Kevine Uwera bakurikiranyweho gukoresha ibiyobyabwenge.

Kuri iyi nshuro Nkuranga Alex Karemera yageze imbere y’Urukiko asaba kuburana ari hanze.

Me Kayihura waburaniraga Nkuranga Alex Karemera na mugenzi we bari bafatanyije babwiye inteko iburanisha, impamvu zitandukanye zirimo ko umukiliya wabo afite ibikorwa bitandukanye mu Rwanda ku buryo urukiko rudakwiriye kugira impungenge z’uko ashobora gutoroka, bagaragaje ko kandi ibyangombwa bye byo mu mahanga byarengeje igihe ku buryo atava mu Rwanda ngo atoroke ndetse ko n’indangamuntu ye ifitwe mu gihe akiri gukurikiranwa.

Yagaragaje ko n’iperereza ry’ibanze ryarangiye ku buryo ataribangamira. Ikindi yavuze ko yatanga ingwate mu gihe byaba bibaye ngombwa.

Ubushinjacyaha bwavuze ko ibi bisobanuro nta shingiro bifite buvuga ko umuntu ashobora guhunga igihugu anyuze mu nzira zitemewe. Bugaragaza n’izindi mbogamizi zirimo ko yajya agorana kwitaba urukiko mu gihe yaba aburana ari hanze.

Bwavuze ko ubwo we na bagenzi be polisi yajyaga kubafata bagaragaje kugorana ku buryo nta cyizere gihari ko ubu afunguwe byajya byorohera urukiko kumubona.

Umwe mu bamuburanira yagaragaje ko ibyo kwanga korohereza inzego z’umutekano ubwo zajyaga kumufata yemera ko byabayeho ariko we na bagenzi be bakaba bari basinze.

Uburanira Uwera Kevine nawe uri mu baregwa yasabye ijambo avuga ko uwo aburanira afite uburwayi bityo yahabwa umwanya akaba yaburana, Perezida w’Urukiko yavuze ko bitakunda kubera ko amasaha yo kuburana yari yarangiye bityo akaba yazaburana ikindi gihe.

Perezida w’Urukiko yanzuye ko urubanza ruzasubukurwa ku wa Mbere tariki 9 Gicurasi 2022, ari na bwo hazatangazwa umwanzuro rwafashe ku kirego cya Nkuranga Alex Karemera.

Ku wa 28 Mata 2022 uru rubanza rwatangiye. Icyo gihe, ababurana basabaga kuburana ifungwa n’ifungurwa. Ubwo basabaga ibyo, Ubushinjacyaha bwo bwavuze ko urubanza ruba rusubiswe kuko hari hakiri ibizamini biri gukorerwa uwakomerekejwe ku buryo byazifashishwa mu rubanza kuko yakomeretse bikomeye mu ngingo zirimo umutwe n’ahandi ku mubiri.

Ubushinjacyaha bwavuze ko bwifuza ko urubanza rusubikwa bugahabwa amasaha 48 cyangwa 72 kuko hari ibimenyetso bukiri gukusanya.

Abunganizi b’ababuranaga basabye ko urubanza rukomeza cyane ko mu baburana bose atari ko bashinjwa ibyaha bimwe nubwo bari muri dosiye imwe.

Me Kayihura waburaniraga Alex Nkuranga Karemera yatangaje ko we n’uwo yunganiraga batiteguye kuburana ku bijyanye n’indishyi, asaba ko iburanisha ku byo gukubita no gukomeretsa ryakomeza.

Abunganira abaregwa basabye ko dosiye yo kunywa ibiyobyabwenge itandukanywa n’iyo gukubita no gukomeretsa ariko Ubushinjacyaha buvuga ko bikomeza uko byari bimeze.

Ubushinjacyaha bwanavuze ko ibimenyetso bikenewe atari ibyo kugira ngo baregere indishyi gusa ahubwo bishobora no gufasha mu nyito y’icyaha.

Nyuma yo kumva impande zombi, urukiko rwanzuye ko aba basore n’inkumi bakomeza gufungwa. Abashinjacyaha bahawe n’umucamanza iminsi yo gukusanya ibindi bimenyetso urubanza rukazasubukurwa ku wa 5 Gicurasi 2022.

Ikindi urukiko rwemeje ko dosiye z’abaregwa bose zikomeza kuguma hamwe.

Enoch Aaron Rwagasana yakubiswe n’aba basore mu gihe bari bahuye basinze bakamwendereza, kugeza aho batangiye kumukubitira mu muhanda. Aba bombi nta hantu na hamwe bari baziranye n’uyu mugabo.

Mu ntangiro za Mata nibwo hagiye hanze amashusho y’abasore bari gukubita umugabo. Aya mashusho bivugwa ko yafatiwe i Rebero ndetse akaba ari naho hakorewe icyaha. Uwahohotewe yatabaje inzego zirimo RIB na Polisi y’u Rwanda nyuma yo gukubitwa. Nyuma ku wa 6 Mata nibwo RIB yatangaje ko yataye muri yombi abasore bakubitaga bunyamanswa uyu mugabo.

IGIHE yahawe amakuru ko Enoch Aaron Rwagasana nyuma yo gukubitwa yagize ibibazo bikomeye ku ngingo zirimo umugongo ndetse yamaze iminsi yarataye ubwenge.

Reba amashusho aba basore bakubita Rwagasana

Aba basore batatu n'inkumi bakurikiranyweho kunywa ibiyobyabwenge no gukubita no gukomeretsa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .