00:00:00 IGIHE NETWORK KN KINYARWANDA EN ENGLISH FR FRANCAIS

Ubujurire bw’Ubushinjacyaha ku ifungurwa ry’agateganyo ry’abahoze ari abayobozi ba IPRC Kigali bwahawe ishingiro

Yanditswe na Ntabareshya Jean de Dieu
Kuya 24 Mutarama 2023 saa 09:43
Yasuwe :

Urukiko Rwisumbuye rwa Nyarugenge rwemeje ko ubujurire bw’ubushinjacyaha ku byaha biregwa abahoze ari abayobozi bakuru ba IPRC Kigali bakurikiranyweho ubujura bw’ibikoresho by’ishuri bufite ishingiro.

Ku wa 22 Ugushyingo 2022 nibwo Urukiko rw’ibanze rwa Kicukiro rwategetse ko nta mpamvu zikomeye zatuma abari abayobozi bakuru ba IPRC Kigali barimo Eng. Diogène Mulindahabi, Rukundo Tumukunde Aimable, Maniragaba Alphonse, Hakizimana Venuste, Muhimpundu Vander Thomas n’abandi batandatu bakurikiranwa badafunze by’agateganyo.

Icyo gihe ariko rwanategetse ko Muhirwa Valens, Nshimiyamana Japhet, Nzavugejo bavuga ko bahawe akazi ko kwikorera ibyo bikoresho babijyana kuri abo bayobozi na Nabo Jean Claude wari ukuriye ububiko bw’ibikoresho muri IPRC bakomeza gukurikiranwa bafunze.

Nubwo ubushinjacyaha bwahise buregera urukiko rwisumbuye rwa Nyarugenge ariko bwanajuririye icyemezo cy’urukiko rw’ibanze rwa Kicukiro cyo gufungura by’agateganyo abari abayobozi muri iki kigo mu gihe abandi bafunze.

Mu bujurire bw’ubushinjacyaha bwagaragaje ko aba uko ari batandatu hari impamvu zikomeye zituma bakekwaho ibyaha bakurikiranyweho bityo ko kubarekura by’agateganyo urukiko rw’ibanze rwirengagije impamvu zabwo.

Bwasabye urukiko ko rwategeka ko aba bahoze ari abayobozi bafungwa by’agateganyo bagakurikiranwa bafunzwe kuko hari impamvu zikomeye zituma bakekwaho ibyaha bakurikiranyweho.

Nyuma yo gusuzuma izo mpamvu zose urukiko rwisumbuye rwa Nyarugenge rwemeje ko ubujurire bw’ubushinacyaha bufite ishingiro bityo ko hari impamvu zikomeye zituma aba bayobozi bakekwaho icyaha.

Rwategetse ko umwanzuro w’Urukiko rw’ibanze rwa Kicukiro uhinduka hakemezwa ko hari impamvu zikomeye zituma bakekwaho ibyaha bakurikiranyweho.

Ibi ariko ntacyo byahinduye ku kuba aba bafungwa bitewe no kuba ubushinjacyaha bwaramaze kuregera urukiko urubanza mu mizi, rutegeka ko n’ubundi uko ari batandatu bakomeza gukurikiranwa badafunze ngo kuko kubafunga byaba binyuranyije n’amategeko.

Ku rundi ruhande ariko abakurikiranwa bafunze na bo bari bajuririye iki cyemezo bagaragaza ko batari bakwiye gufungwa mu gihe ababahaye akazi ko gutwara ibikoresho bivugwa ko byibwe bakurikiranwa badafunze.

Ubujurire bw’abarimo uwahoze ari umukozi ushinzwe ububiko bw’ibikoresho Nabo Jean Claude, umusekirite, n’abari abakarani bagera kuri batatu urukiko rwisumbuye rwabutesheje agaciro ruvuga ko nta shingiro bufite.

Amakuru agera kuri IGIHE agaragaza ko uru rubanza rwamaze gushyirwa mu bice bibiri, aho abari gukurikiranwa bafunzwe harimo abo biteganyijwe ko bazaburana muri Werurwe 2023 mu gihe abandi bashobora kuburana mu mizi mu mwaka utaha.

Kugeza ubu abakurikiranwe mu nkiko bamaze guhagarikwa ku mirimo yabo kandi harimo n’abari abarimu muri iri shuri rikuri rya tekiniki.

Ubushinjacyaha bugaragaza ko hatwawe ibikoresho birimo indobo z’amarangi, inzugi n’amadirishya bya metallique, utubati dukorerwa muri IPRC, insiga, imashini n’ibindi bitandukanye.

Urukiko rwagaragaje ko hari impamvu zikomeye zituma abarimo Mulindahabi wayoboraga IPRC Kigali bakekwaho ibyaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .