00:00:00 IGIHE NETWORK KN KINYARWANDA EN ENGLISH FR FRANCAIS

U Bwongereza bwongeye kotswa igitutu ngo bwohereze batanu bakekwaho uruhare muri Jenoside

Yanditswe na IGIHE
Kuya 9 June 2022 saa 08:28
Yasuwe :

Andrew Mitchell uri mu bagize Inteko Ishinga Amategeko y’u Bwongereza yasabye igihugu cye kohereza mu Rwanda abagabo batanu baba muri icyo gihugu mu mahoro kandi bashinjwa kuba baragize uruhare muri Jenoside yakorewe Abatutsi mu 1994.

Aba bantu ni Vincent Bajinya, Célestin Ugirashebuja, Charles Munyaneza, Emmanuel Nteziryayo na Célestin Mutabaruka. Aba bose hari amakuru yizewe avuga ko bari mu Bwongereza.

Bajinya Vincent akekwaho kuba mu itsinda ryari rifitanye isano rya hafi na Perezida Habyarimana Juvénal wari Perezida mu gutegura Jenoside no kwica Abatutsi benshi muri Kigali. Ubwo bwicanyi bwagiye bukorerwa kuri za bariyeri ku bufatanye n’interahamwe.

Uyu mugabo yaje gusaba ubuhungiro mu Bwongereza, mu gihugu yakoreye imyaka myinshi nk’Umuganga mu Bitaro bya Praxis ndetse aza no guhindura izina rye yiyita Vincent Brown.

Mutabaruka Célestin we yahoze ari Pasiteri mu Itorero ry’Abapantekote, aregwa kugira uruhare mu gufatanya n’Interahamwe mu gutegura, guhagarikira no gushyira mu bikorwa ubwicanyi bwakorewe abasaga ibihumbi 20 barimo abagabo, abagore n’abana.

Mugenzi wabo Munyaneza Charles we yari Burugumesitiri w’iyahoze ari Komini Kinyamakara muri Perefegitura ya Gikongoro, na we aregwa kugira uruhare mu gutegura no gushyira mu bikorwa umugambi wa Jenoside ndetse no kuyobora ibitero byagabwaga ku Mugezi wa Mwogo muri Gikongoro byaguyemo Abatutsi benshi.

Célestin Ugirashebuja na we yahoze Burugumesitiri wa Komini Kigoma muri Perefegitura Gitarama, na we aregwa gutegura no gushyira mu bikorwa umugambi wa Jenoside, aho yari ayoboye.

Bivugwa ko yatanze itegeko ku nterahamwe ryo kwica Abatutsi bari bajyanywe ku biro bye kuri komini, abaha n’amabwiriza yo kujya guhiga Abatutsi aho byakekwaga ko bihishe ngo bicwe.

Nteziryayo Emmanuel mu gihe cya Jenoside na we yari Burugumesitiri wa Komini Mudasomwa muri Gikongoro, aregwa kugira uruhare mu itegurwa n’ishyirwa mu bikorwa ry’umugambi wa Jenoside.

Yayoboye kandi interahamwe mu bwicanyi bwabereye muri ako gace bwaguyemo Abatutsi benshi. Mu Bwongereza yabayeyo yihishahisha ndetse yiyita Emmanuel Ndikumana.

Guverinoma y’u Rwanda, abarokotse Jenoside n’Umuryango w’Abongereza urwanya Jenoside ku Isi, Aegis Trust, bamaze igihe basaba ko aba bagabo boherezwa mu Rwanda, ariko mu 2016 Urukiko Rukuru rw’i Londres rwamaze iminsi umunani rwumva ubujurire bw’aba Banyarwanda basaba ko batakoherezwa kuburanishirizwa mu Rwanda, ariko kugeza n’ubu ntiharafatwa icyemezo.

Ubwo bari mu bikorwa by’Inteko Ishinga Amategeko, Andrew Mitchell, aherutse kubwira bagenzi be ko igihugu cyabo gikwiye kohereza aba bagabo, cyane ko ari bimwe mu bishobora kuzaganirwaho mu nama ya CHOGM igiye kubera i Kigali.

Ati “Hari abantu batanu bakekwaho uruhare muri Jenoside mu Rwanda baba hano mu Bwongereza mu bwisanzure kandi bikaba bimaze imyaka 16, ntibigeze boherezwa mu Rwanda cyangwa ngo bagezwe imbere y’inkiko zo mu Bwongereza hashingiwe ku mategeko yacu.”

“Iki ni ikibazo gishobora kuzazamurwa mu nama ya CHOGM igiye kubera i Kigali mu byumweru bibiri biri imbere, nubwo ubutabera bwaba bwarakererewe gutangwa ariko ntibikwiye ko buhera.”

Ikibazo cy’aba bagabo cyanagarutsweho mu muhango wo kwibuka ku nshuro ya 28 Jenoside yakorewe Abatutsi mu 1994, mu Bwongereza, aho Ambasaderi w’u Rwanda muri iki gihugu, Johnston Busingye, yasabye ko abagize uruhare muri Jenoside bidegembya muri iki gihugu bashyikirizwa ubutabera.

Yakomeje avuga ko nta rwitwazo rukwiye kubaho mu gufata aba bagabo. Ati “Tuzi amazina y’abo bantu, u Bwongereza burabazi ndetse n’Isi yose ishobora kuba ibazi. Bakomeje kubaho bidegembya mu mijyi dusangiye. Icyo dusaba ni uko bashyikirizwa urukiko.”

Umwaka ushize, hashyizweho itsinda ry’abadepite rishinzwe gushishikariza Guverinoma y’u Bwongereza kugeza abo bantu imbere y’ubutabera. Kugeza ubu amakuru ahari avuga ko inzego zibishinzwe zirimo gukorana byimazeyo muri iyo nzira kugira ngo ubutabera bwubahirizwe.

Aba bagabo batanu baba mu Bwongereza bakekwaho kuba baragize uruhare muri Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .