00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa bugiye kuburanisha Dr Munyemana ufatwa nk"Umubazi wa Tumba"

Yanditswe na IGIHE
Kuya 4 Mutarama 2023 saa 09:41
Yasuwe :

Urukiko rw’i Paris mu Bufaransa rwemeje ko Dr Sosthène Munyemana uregwa ibyaha bya Jenoside yakorewe Abatutsi mu 1994 azaburanishwa muri uyu mwaka, mu rubanza rumaze igihe kirekire rutegerejwe.

Byemejwe ko uyu mugabo azagezwa mu rukiko guhera ku wa 13 Ugushyingo kugeza ku wa 22 Ukuboza 2023.

Umuryango uharanira ko abakekwaho uruhare muri Jenoside yakorewe Abatutsi bagezwa imbere y’ubutabera, CPCR, watangaje ko wishimiye iyi ntambwe nshya itewe.

Wagize uti "Yarezwe ibyaha bya Jenoside mu 1995, ariko byasabye gutegereza imyaka 28 kugira ngo ubutabera bw’u Bufaransa bubashe gufata icyemezo cyabwo, niba ahamwa n’ibyaha cyangwa niba ari umwere."

Iyo myaka ngo yatumye Dr Munyemana akomeza akazi ke nk’umuganga wakira indembe mu bitaro bya Villeneuve-sur-Lot.

Ukomeza uti "Imyaka 28 myinshi cyane yatumye abatangabuhamya bamwe batakara, baba abashinja cyangwa abashinjura. Imyaka 28 yatumye ibintu bimwe bitacyibukwa, ibintu bitazorohereza abacamanza."

Dr Munyemana yarezwe ku wa 18 Ukwakira 1995. Iperereza ryasojwe ku wa 29 Werurwe 2017, maze muri Gicurasi 2018, urubanza rwoherezwa mu rukiko rwa Paris.

Ikirego cye cyabanje guhagarikwa, ariko mu bujurire byemezwa ko urubanza rukomeza.
Mu gihe agiye kuburanishwa, abandi bantu babiri bakatiwe n’inkiko z’u Bufaransa nyuma yo kubahamya ibyaha bya Jenoside, barajuriye ndetse bategereje guhabwa itariki y’urubanza.

Abo ni Claude Muhayimana wakatiwe gufungwa imyaka 14 na Laurent Bucyibaruta wakatiwe gufungwa imyaka 20. Bucyibaruta we kubera impamvu z’uburwayi, yemerewe gusanga umuryango we mu gihe ategereje kuburana mu bujurire.

U Bufaransa bwakunze gushinjwa kugenda biguru ntege mu gukurikirana abakekwaho uruhare muri Jenoside yakorewe Abatutsi mu 1994. Ni ibintu byatizwaga umurindi n’umubano wari wifashe nabi hagati y’ibihugu byombi.

Icyakora nyuma yo kuzahuka, muri Mata 2022, Ambasaderi w’u Bufaransa mu Rwanda, Antoine Anfré, yatangaje ko Guverinoma y’u Bufaransa yiyemeje ko nibura buri mezi atandatu hazajya haburanishwa umwe mu bakekwaho uruhare muri Jenoside, hagamijwe gutanga ubutabera ku bazize Jenoside yakorewe Abatutsi n’abayirokotse.

Uruhare Dr Munyemana ashinjwa muri Jenoside

Inyandiko z’iyahoze ari Komisiyo y’Igihugu ishinzwe kurwanya Jenoside, CNLG, zigaragaza ko Dr Munyemana wahawe akazina k’akabyiniriro k’Umubazi wa Tumba (le boucher de Tumba), yagize uruhare rukomeye muri Jenoside yakorewe Abatutsi mu Murenge wa Tumba (Huye) no mu yahoze ari Perefegitura ya Butare muri rusange.

Munyemana yavutse tariki ya 9 Ukwakira 1955, avukira i Mbare, Komini Musambira muri Gitarama. Ababyeyi be ni Kangabo Balthazar na Nyirahabimana Charlotte.

Amaze kurangiza amasomo muri Kaminuza i Butare yagiye gukomereza amashuri muri kaminuza ya Bordeaux II mu Bufaransa mu bijyanye na gynécologie.

Yaragarutse akora mu bitaro bya Kaminuza ari nako atanga amasomo muri Kaminuza y’u Rwanda Ishami ry’Ubuvuzi. Mu gihe cya Jenoside yakorewe Abatutsi yari atuye muri Selire ya Gitwa i Tumba. Yashakanye na Muhongayire Fébronie babyarana abana batatu.

Munyemana aregwa ko yashishikarije abaturage kwica Abatutsi mu Mujyi wa Butare.

Tariki ya 17 Mata, Konseye François Bwanakeye yahamagaje inama yagombaga guhuza abaturage b’i Tumba ngo bige ku bijyanye n’umutekano.

Hemejwe ko hajyaho za bariyeri, hajyaho n’amarondo. Icyo gihe muri segiteri Mubumbano inzu zarashyaga ariko ngo Munyemana we si ko yabyumvaga.

Munyemana ngo yahise avuga ijambo rikarishye ashishikariza abantu kwica Abatutsi ati “umwanzi aturimo, nshumbikiye abahutu 15 bavuye i Kigembe baje bahunga Inkotanyi zinjiriye i Burundi”.

Bamwe mu batangabuhamya kandi bavuze ko muri Jenoside, Munyemana yambaraga amashara akitwaza icumu, nyuma aza kwitwaza imbunda. Ngo yari afite urufunguzo rw’ibiro bya Segiteri Tumba aho yafungiraga Abatutsi mbere yo kubica.

Ababanje kwicwa ni abantu bafatwaga nk’abantu bize, abacuruzi, noneho n’abandi muri rusange.

Munyemana kandi ngo yari inshuti ya Kambanda wari Minisitiri w’Intebe, mu gihe cya Jenoside iyo yajyaga i Butare Kambanda yararaga iwe. Ni we washyiraga mu bikorwa amabwiriza yo kwica abatutsi.

Ibi byatangiye MDR imaze gucikamo ibice bibiri, Kambanda atakaje umwanya we nka Perezida wa MDR muri Butare, ahanganye na Agathe Uwiringiyimana. Munyemana yari ku isonga ry’abatezaga umwuka mubi muri Butare icyo gihe.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .