00:00:00 IGIHE NETWORK KN KINYARWANDA EN ENGLISH FR FRANCAIS

Rusesabagina yakaniwe urumukwiye, Sankara agirirwa ikigongwe: Ibyaranze 2022 mu butabera

Yanditswe na Ntabareshya Jean de Dieu
Kuya 31 Ukuboza 2022 saa 06:07
Yasuwe :

Umwaka wa 2022 ni umwe mu yagize udushya twinshi mu ngeri zitandukanye ariko uba umwaka ukomeye mu rwego rw’ubutabera cyane ko hasojwe imanza zikomeye.

Tariki ya 4 Mata 2022 nibwo Urukiko rw’Ubujurire rwagumishijeho igifungo cy’imyaka 25 Urukiko Rukuru rwahanishije Rusesabagina Paul kubera uruhare mu bikorwa by’iterabwoba mu gihe Nsabimana Callixte ‘Sankara’ yagabanyirijwe igihano avanwa ku myaka 20, ahanishwa 15.

Ni ibintu bisa n’ibitari byitezwe n’amahanga bigendanye n’igitutu yashyiraga ku Rwanda ngo rurekure Rusesabagina Paul ariko rukabitera utwatsi kubera uruhare rwe mu bitero byagabwe i Nyabimata no muri Nyungwe n’umutwe wa MRCD/FLN.

Gusoza uru rubanza mu bujurire byakurikiwe n’ukwamagana umwanzuro w’ubutabera bw’u Rwanda mu bihugu bitandukanye birimo na Leta Zunze ubumwe za Amerika ndetse binatuma abayobozi banyuranye mu bihugu bikomeye bagenderera u Rwanda.

Ku wa 10 Kanama, Umunyamabanga wa Leta zunze ubumwe za Amerika ushinzwe ububanyi n’amahanga, Antony Blinken, yasesekaye i Kigali kandi mu byamugenzaga harimo no gusaba ko Rusesabagina afungurwa.

Bisa naho yakubise igihwereye kuko urugendo rwe ntacyo rwagezeho nubwo yakangishaga u Rwanda ibihano.

Muri uyu mwaka kandi ubutabera bw’u Rwanda bwakiriye ibirego by’ingeri zitandukanye birimo n’iby’abakomeye bakiriye cyangwa batse indonke mu bihe bitandukanye.

Bomporiki

Tariki 30 Nzeri 2022 nibwo Urukiko rwisumbuye rwa Nyamirambo rwakatiye Bamporiki igifungo cy’imyaka ine no gutanga ihazabu ya miliyoni 60 Frw nubwo iki gihano yahise akijuririra.

Bamporiki Edouard wahoze ari Umunyamabanga wa Leta muri Minisiteri y’Urubyiruko n’umuco, mu kuburana kwe yasabye imbabazi anagaragaza ko ababariwe atazasubira.

Urukiko Rwisumbuye rwa Nyarugenge rwamuhamije ibyaha byo kwihesha ikintu cy’undi hakoreshejwe uburiganya no gukoresha ububasha ahabwa n’itegeko mu nyungu ze bwite kugeza ubu icyemezo cy’urukiko ku bujurire bwe kizasomwa muri Gashyantare 2023.

Bamporiki Edourd yanyuze mu butabera

Dr Nibishaka wahoze ari Umuyobozi Wungirije wa RGB

Urukiko Rwisumbuye rwa Nyarugenge rwakatiye Dr Nibishaka Emmanuel wahoze ari Umuyobozi Mukuru Wungirije w’Urwego rw’Imiyoborere, RGB, igifungo cy’imyaka itanu ariko harimo ibiri n’igice isubitse no gutanga ihazabu ya miliyoni eshatu z’amafaranga y’u Rwanda.

Uyu mugabo yakatiwe iki gihano nyuma yo guhamywa icyaha cyo kwihesha ikintu cy’undi hakoreshejwe inyandiko mpimbano n’Urukiko Rwisumbuye rwa Nyarugenge.

Dr Nibishaka Emmanuel ari mu bakurikiranwe kubera indonke

Abakozi ba RBC barafunzwe

Ku wa 14 Gashyantare 2022 nibwo abakozi b’Ikigo cy’Igihugu Gishinzwe Ubuzima (Rwanda Biomedical Center) bari bakurikiranyweho gutanga isoko rya miliyari eshatu z’amafaranga y’u Rwanda ku mukozi mugenzi wabo, bafunguwe by’agatengayo.

Urukiko rwanzuye ko nta mpamvu zikomeye zihari zatuma Kamanzi James, Ndayambaje Pierre, Kayirangwa Leoncie, Ndayisenga Fidèle, Nsengumuremyi, Jean Marie Vianney na Basabose Tharcisse bakekwaho icyaha cyo gutanga isoko mu buryo bunyuranyije n’amategeko, icyaha cyo kugira akagambane, gufata icyemezo hashingiwe ku itonesha, ubucuti, ikimenyane cyangwa icyenewabo.

Urukiko rw’Ibanze rwa Kicukiro rwategetse ko bafungurwa ariko Rwema Fidèle agafungwa by’agateganyo iminsi 30.

Umuyobozi wa IPRC Kigali yatawe muri yombi

Indi nkuru yatumye abantu bacika ururondogoro n’iyitabwa muri yombi ry’abakozi ba IPRC Kigali n’ifungwa ryayo mu gihe cy’iperereza.

Mu Kwakira uyu mwaka Urwego rw’Igihugu rw’Ubugenzacyaha (RIB) rwataye muri yombi Eng Mulindahabi Diogène, wari Umuyobozi w’Ishuri rikuru ry’Imyuga n’Ubumenyingiro rya Kigali (IPRC-Kigali).

Uyu muyobozi yafashwe mu iperereza ryakorwaga ku byaha by’ubujura no kunyereza umutungo bikekwa kuba byarakozwe mu Ishuri rya IPRC-Kigali.

Ku wa 22 Ugushyingo 2022, ari kumwe n’abandi 11 baregwaga hamwe muri dosiye y’ubujura, gukiresha inyandiko mpimbano no kunyereza umutungo wa leta.

Bari bafunganywe ari 19, abandi bakomeje gufungwa nyuma yo kuburana mu rukiko rw’ibanze ku ifungwa n’ifungurwa ry’agateganyo.

Uretse aba bakozi batandukanye b’ibigo binyuranye mu Rwanda bakurikiranwe n’inkiko kubera ibyaha byo kwakira indonke, gukoresha inyandiko mpimbano no kunyereza imitungo ariko hari n’abandi benshi bagiye bagezwa imbere y’ubutabare.

Uyu mwaka wa 2022 uri kugera ku musozo nubwo hari abo wahiriye ariko hari n’abandi bawusoje bagejejwe imbere y’ubutabera, ku bw’amahirwe bakarekurwa.

Bamwe mu byamamare bafunzwe muri uyu mwaka biganjemo abakoze ibyaha bito birimo gukubita no gukomeretsa. Gusa harimo n’abakurikiranyweho ibyaha birimo ibyo gusambanya abana no gusambanya ku gahato.

Urubanza rwa Ishimwe Thierry, umubyinnyi w’umwuga wamenyekanye nka Titi Brown wafunzwe mu 2021, muri uyu mwaka yagerageje kujurira icyemezo cy’urukiko ariko ntiyahirwa ahubwo urubanza rwe rwimurirwa muri Gashyantare 2023.

Uyu yafunzwe akurikiranyweho icyaha cyo gusambanya umwana w’imyaka 17.

Ndimbati

Mu Ukwakira 2022 nibwo Uwihoreye Jean Bosco benshi bazi nka Ndimbati yagizwe umwere burundu ku byaha yari akurikiranyweho birimo icyo guha inzoga umwana utarageza imyaka y’ubukure yarangiza akamusambanya.

Muri Werurwe 2022 nibwo Ndimbati yatawe muri yombi n’Urwego rw’Igihugu rw’Ubugenzacyaha rwari rumukurikiranyeho icyaha cyo gusambanya umwana utarageza imyaka y’ubukure.

Nyuma yo kugera imbere y’Urukiko rw’Ibanze rwa Nyarugenge, Ndimbati yasabiwe gufungwa iminsi 30 y’agateganyo ku wa 28 Werurwe 2022.

Ku wa 29 Nzeri 2022 nibwo Urukiko rwisumbuye rwa Nyarugenge rwafashe icyemezo cyo kurekura Ndimbati nyuma yo kubona ko nta bimenyetso bikomeye Ubushinjacyaha bwagaragaje byatuma akomeza gukurikiranwa mu nkiko.

Ndimbati yashinjwe gusambanya umwana nyuma yo kumunywesha inzoga ariko biza kurangira abaye umwere

Prince Kid yabaye umwere

Uyu musore yatawe muri yombi muri Mata 2022 ubwo yari akurikiranyweho ibyaha yakekwagaho kuba yarakoreye mu irushanwa rya Miss Rwanda.

Ibyaha Prince Kid yari akurikiranyweho ibyaha byo gukoresha undi imibonano mpuzabitsina ku gahato, gusaba no gukora imibonano mpuzabitsina ku gahato no guhoza undi ku nkeke bifitanye isano n’imibonano mpuzabitsina.

Ni ibyaha byatumye Prince Kid yisanga imbere y’ubutabera kugeza mu Ukuboza 2022 ubwo Urukiko Rwisumbuye rwa Nyarugenge rwamugiraga umwere.

Uretse aba ariko hari n’abandi batandukanye bagiye bagezwa imbere y’ubutabera bakurikiranyweho ibyaha byo gusambanya abana barimo n’umufurera w’imyaka 36 watawe muri yombi ku wa 11 Mutarama 2022 akurikiranyweho gufata umwana w’umuhungu w’imyaka 17 n’abandi batandukanye.

Prince Kid nawe yanyuze imbere y'ubutabera ariko biza kurangira abaye umwere
Sankara yagabanyirijwe imyaka itanu ku gihano yari yahawe
Urubanza rwa Rusesabagina rwasojwe muri Mata 2022 ahamijwe ibyaha by'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .