00:00:00 IGIHE NETWORK KN KINYARWANDA EN ENGLISH FR FRANCAIS

RIB yatangiye gukurikirana ruswa ivugwa muri FERWAFA

Yanditswe na Israel Ishimwe
Kuya 21 June 2022 saa 03:38
Yasuwe :

Urwego rw’Igihugu rw’Ubugenzacyaha, RIB, rwinjiye mu iperereza ku birego bya ruswa bivugwa mu Ishyirahamwe ry’Umupira w’Amaguru mu Rwanda, Ferwafa.

Inkuru zitunga agatoki ruswa muri Ferwafa si nshya mu bakunzi b’umupira w’amaguru mu Rwanda.

Mu bihe bitandukanye zagiye zivugwa ariko kuzibonera ibimenyetso rimwe na rimwe bikagorana.

Kuri ubu izi nkuru ni zo zongeye kwiharira ameza y’ibiganiro bya siporo ndetse ziri kugarukwaho cyane ku mbuga nkoranyambaga zitandukanye cyane cyane Twitter.

Ibintu byarushijeho gututumba cyane ku wa Mbere, tariki ya 20 Kamena 2022, nyuma y’uko Ferwafa ifashe icyemezo cyo guhagarika Umunyamabanga Mukuru w’Ishyirahamwe ry’Umupira w’Amaguru mu Rwanda, Ferwafa, Muhire Henri Brulart, ku mwanya we kubera amakosa atandukanye yakoze mu nshingano ze.

Ferwafa nta mpamvu yatangaje zatumye Muhire ahagarikwa ariko abakurikiranira hafi iby’umupira w’amaguru babihuza n’amanyanga yakozwe mu kirego cyateje intungunda hagati ya Rwamagana City na AS Muhanga zahuriye mu mukino wa 1/4 mu rugamba rwo gushaka ikipe izamuka mu Cyiciro cya Mbere.

Rwamagana City FC yarezwe na AS Muhanga ko yakinishije umukinnyi witwa Mbanza Joshua kandi afite amakarita atatu y’umuhondo.

Ferwafa yabanje gusezerera Rwamagana City mu irushanwa, itegeka ko iterwa mpaga. Nyuma y’aho, ikipe yo mu Karere ka Rwamagana yarajuriye ndetse ubujurire bwayo buhabwa ishingiro, yemererwa gukomeza nyuma yo gusanga yararenganyijwe.

Iri tangazo ryakurikiye iryo kwirukana Nzeyimana Félix wari umukozi ushinzwe amarushanwa muri Ferwafa.

Uyu mugabo yashinjwe amakosa yakozwe muri dosiye y’ubujurire bwa Rwamagana City na AS Muhanga.

Itangazo rimuhagarika rivuga ko Nzeyimana yategetse umusifuzi Tuyisenge Javan guhindura raporo yari yatanze, amusaba gukora indi ngo yongeremo ko umukinnyi Mbanza Joshua yahawe amakarita atatu y’umuhondo byari gutuma hemezwa ko ikirego cyatanzwe na AS Muhanga gifite ishingiro.

Iryo kosa yakoze no kuba mu nyandiko ye yarijeje uwamufashije ko azamuha igihembo byatumye ahagarikwa burundu ku kazi.

Amakuru y’ibanze IGIHE yamenye ni uko bamwe muri aba bayobozi batangiye kwitaba Urwego rw’Igihugu rw’Ubugenzacyaha, RIB, babazwa ku byo bakurikiranyweho.

Umuvugizi wa RIB, Dr Murangira B. Thierry, yavuze ko ikirego cy’ibivugwa muri Ferwafa cyakiriwe ndetse kiri gukurikiranwa.

Yagize ati “Ni byo twakiriye ikirego ku bibazo bya ruswa bivugwa muri Ferwafa. Twatangiye iperereza kugira ngo tumenye ukuri kwabyo.’’

Dr Murangira yakomeje asaba ko aho ruswa zivugwa mu myidagaduro bajya batanga amakuru kugira ngo inzego zibishinzwe zibikurikirane.

Yagize ati “Turasaba abantu bose bafite amakuru yerekeye ruswa ivugwa mu myidagaduro ko bajya batera intambwe bagatanga amakuru kuri RIB. Ntibikarangirire mu ruhando rw’imyidagaduro gusa. Iyo tuvuze ruswa ntabwo ari ishingiye ku mafaranga gusa.’’

Si ubwa mbere humvikanye dosiye zifitanye isano na ruswa mu mupira w’amaguru mu Rwanda.

Mu Ukwakira 2012, Ferwafa yahagaritse imyaka itanu nyakwigendera Ntagwabira Jean Marie wari Umutoza wa Kiyovu Sports nyuma y’uko abwiye abanyamakuru ko yahaye amafaranga abakinnyi ba Rayon Sports ngo bitsindishe, abinyujije ku mufana wayo Kayinamura Issa.

Nyuma y’imyaka itatu ibyo bibaye, Hategekimana Bonaventure [Gangi], witabye Imana mu 2017, Pappy Chimanga, Bebeto Lwamba, Ilunga Freddy Mukadi na Mugwaneza Pacifique bakiniraga Etincelles FC, batawe muri yombi bakurikiranyweho kwakira ruswa kugira ngo bitsindishe mu gushaka guha amahirwe ikipe ya Musanze FC zari zihanganiye kumanuka.

Mu 2020, Munyakazi Sadate wahoze ari Perezida wa Rayon Sports, yagaragaje ko iyi kipe yagiye yishyura abasifuzi hagati 2014 na 2016, igamije gushaka intsinzi.

Mu 2021 na bwo hari amajwi yashyizwe hanze n’Umuyobozi wa Gasogi United, Kakooza Nkuriza Charles (KNC), yumvikanamo abakunzi ba Mukura Victory Sports yarwanaga no kutamanuka, baciririkanya n’umunyezamu w’ikipe ye, Mazimpaka André, kugira ngo azitsindishe mu mukino wahuje amakipe yombi, warangiye anganyije igitego 1-1.

Muhire Henri Brulart yahagaritswe ku mwanya w'Umunyamabanga Mukuru w’Ishyirahamwe ry’Umupira w’Amaguru mu Rwanda, Ferwafa, kubera amakosa yakoze mu nshingano ze
Nzeyimana Félix wari Umukozi ushinzwe Amarushanwa muri Ferwafa yirukanywe kubera amakosa akurikiranyweho mu kazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .