00:00:00 IGIHE NETWORK KN KINYARWANDA EN ENGLISH FR FRANCAIS

Mukamazimpaka wahamijwe kwica umugabo we afatanyije n’abavandimwe yaburanye mu bujurire

Yanditswe na Ntabareshya Jean de Dieu
Kuya 18 Mutarama 2023 saa 09:30
Yasuwe :

Mu Rukiko Rukuru ruherereye i Nyamirambo kuri uyu wa Gatatu tariki ya 18 Mutarama 2023, haburaniye Mukamazimpaka Shanita na basaza be babiri bagize uruhare mu rupfu rwa Ndahimana Callixte wari umugabo w’uyu mugore bagakatirwa gufungwa burundu.

Icyaha cyakozwe mu 2019 mu Karere ka Gasabo mu Murenge wa Kinyinya. Mukamazimpaka Shanita yafatanyije na basaza be babiri barimo Habimana François na Kamayirese Janvier bakekwagaho kwica Ndahimana Callixte bamuteye icyuma mu ijosi.

Urukiko rwisumbuye rwa Gasabo rwaje guhamya aba bavandimwe uko ari batatu icyaha cy’ubwicanyi rubakatira igifungo cya burundu.

Kuri uyu wa 18 Mutarama 2023, aba bose bari mu Rukiko Rukuru aho bajuririye igihano bahawe bashaka kugabanyirizwa ngo kuko bemera icyaha.

Mu iburanisha Mukamazimpaka yatakambiye urukiko asaba kugabanyirizwa ibihano kuko atari akwiye kwambura ubuzima umugabo we.

Yavuze ko asaba imbabazi agaragasa impamvu zateye urupfu rw’umugabo we ariko akirinda kugaragaza uruhare rwe muri byo, ibintu byatumye ubushinjacyaha bukemanga ukwemera icyaha kwe.

Yavuze ko ku wa 19 Kanama 2019 habayeho intonganya hagati ye n’umugabo we ziturutse ku mafaranga avuga ko yakoreshaga mu bucuruzi agera kuri miliyoni 3Frw ariko aza kuburamo miliyoni 1,5 Frw.

Umugabo yemwereye ko yayatwaye ndetse aguramo ikibanza ariko Mukamazimpaka ngo aza gutahura ko umugabo yakiguriye undi mugore bashakaga kubana.

Icyo gihe byakuruye intonganya ndetse n’imirwano yamuviriyemo gukomeretswa na Ndahimana aza kwitabaza basaza be barimo Habimana François.

Bigeze hagati saa tanu na saa sita z’ijoro, musaza we yaramuhamagaye amusanga iwe muri iryo joro ari nabwo Ndahimana yishwe.

Ahageze ngo yahise yinjira mu cyumba umugabo yari aryamyemo, amutera icyuma asinziriye, mu kubaza musaza we impamvu amubwira ko arambiwe n’ibirego bye n’induru za buri munsi.

Aya magambo yumvikanishije ko Mukamazimpaka asa n’utemera uruhare rwe muri iki gikorwa ariko urukiko rukomeza kumuhata ibibazo byaje gutuma bagenzi be bareganwa batobora bakavuga.

Yavuze ko asaba imbabzi abo yahemukiye, abana be ndetse n’umuryango nyarwanda muri rusange.

Ati “Ngarutse imbere yanyu nemera ko nagize uruhare rwo kubura ubuzima k’uwari umugabo wanjye Ndahimana Callixte, kuko nahamagaye musaza wanjye; iyo ntahamagara ntibiba byaragenze uko byagenze."

Mukamazimpaka yagaragaje uburangare bwabayeho kandi yari umubyeyi w’abana batatu, barimo uw’imyaka 14 n’ufite itatu akavuga ko yahabwa ibihano bito cyangwa isubikagihano.

Yabajijwe n’umucamanza impamvu ashaka gusohoka muri gereza, asubiza ko aregwa icyaha gikomeye ariko ko yasabye isubikagihano kubera ko afite abana bato yasize kuko bari kugwa mu ngaruka z’icyaha batagizemo uruhare.

Habimana yemera ko yakoze icyaha cy’ubugoryi

Habimana François yavuze ko icyaha acyemera kandi ko ari kibi. Yasobanuye ko mushiki we yamuhamagaye amubwira ko yashyamiranye n’umugabo.

Ati "Nageze iwe yampamagaye arankingurira ndinjira ariko nari nanasinze ndebye uko yabaye birandakaza cyane. Natekereje ibyo bintu byose; ku meza hari icyuma barishije avoka ndakimutera."

Yatakambiye urukiko ko igihano cyo gufungwa burundu bahawe cyagabanywa kuko yemera icyaha cyo kwica muramu we, icyo yita ko ari icy’ubugoryi.

Mu cyo Ubushinjacyaha bwise ikinyoma gikomeye, yavuze ko bahamagaye murumuna wabo ngo bamujyane kwa muganga ariko birangira ashizemo umwuka.

Kamayirese Janvier yavuze ko akigera kwa Nyakwigendera yasanze ari kuvirirana amaraso menshi kuko abavandimwe be bari bamaze kumutera ibyuma ariko Ubushinjicyaha bugaragaza ko na we yari muri uwo mugambi.

Yabanje kuvuga ko bamusabye kubafasha bagahita bamwirukankana kwa muganga ariko bakimara guhaguruka yashizemo umwuka. Ahazwe ibibazo n’umucamanza yavuze ko bari bafite gahunda yo kujya kujugunya umurambo.

Yagaragaje ko Ndahimana ashizemo umwuka yahise agira ubwoba ata imodoka nyamara Ubushinjacyaha busanga kwari ukuyobya uburari ngo nibucya bizafatwe ko yishwe n’abajura kuko imodoka bayishyize kuri metero 15 gusa uvuye ku rugo rwe.

Uhagarariye Ubushinjacyaha yavuze ko bumaze kumva ubwiregure bwabo yeretse urukiko ko habanje gucurwa umugambi na Mukamazimpaka akitabaza basaza be bakamufasha kwica umugabo we kandi koko babigeraho.

Bwasobanuye ko Ndahimana yishwe atewe icyuma mu ijosi na Habimana, umugore we amufata amaguru naho Kamayirese amafuta amaboko, nyuma yo kumwica umugore we yasigaye ahanagura amaraso, Kamayirese Janvier na Habimana bashyira umurambo mu modoka bagiye kuwujugunya.

Ubushinjacyaha bwavuze ko hari ibimenyetso bigaragara ko abaregwa bari kuvuga ibinyoma kuko bari kugenda bahindura imvugo nyuma yo guhatwa ibibazo n’umucamanza.

Ubushinjacyaha bugaragaza ko Mukamazimpaka Shanitah ari we wahereweho umugambi wo gukora icyaha cy’ubwicanyi Kandi ko ari icy’ubugome bityo ko uko Urukiko Rwisumbuye rwa Gasabo rwabitegetse akomeza gufungwa burundu kubera ko adashaka kuvugisha ukuri.

Umushinjacyaha yasabye ko Mukamazimpaka Shanitah, Habimana François na Kamayirese Janvier bakomeza gufungwa burundu nk’uko Urukiko Rwisumbuye rwa Gasabo rwabitegetse.

Me Murekatete Henriette uhagarariye abaregera indishyi muri uru rubanza yavuze ko bari mu byiciro bitandukanye bigizwe n’ababyeyi, abavandimwe n’abana ba Ndahimana.

Mu Rukiko Rwisumbuye rwa Gasabo abana ntabwo bari baregeneye indishyi kubera ko ubishingira kugeza ubwo rwabifatagaho icyemezo nta bubasha yari abafiteho.

Abaregwa bagaragaje ko indishyi bazemera kuko batabona icyo baha umuryango bahemukiye bene ako kageni ariko bagaragariza urukiko impungenge z’aho zizava.

Urubanza ruzasomwa ku wa 17 Gashyantare 2022.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .