00:00:00 IGIHE NETWORK KN KINYARWANDA EN ENGLISH FR FRANCAIS

Mugabekazi Liliane yafunguwe by’agateganyo

Yanditswe na IGIHE
Kuya 19 August 2022 saa 09:11
Yasuwe :

Urukiko rw’Ibanze rwa Kicukiro rwanzuye ko Mugabekazi Liliane wavugishije benshi kubera imyambarire yaserukanye mu gitaramo cya Tayc afungurwa by’agateganyo agakomeza gukurikiranwa ari hanze ku cyaha cyo gukora ibiterasoni mu ruhame.

Umwanzuro w’urukiko watangajwe kuri uyu wa Gatanu, tariki ya 19 Kanama 2022, mbere y’igihe wagombaga gusomerwaho bisabwe n’Ubushinjacyaha.

Mugabekazi Liliane akurikiranyweho icyaha cyo gukora ibiterasoni mu ruhame. Yagejejwe mu rukiko bwa mbere, ku wa Kane, tariki ya 18 Kanama 2022, Ubushinjacyaha bumusabira gufungwa iminsi 30 mu gihe iperereza ku byo ashinjwa rigikomeje.

Urukiko rwavuze ko uru rubanza ruzasomwa ku wa 23 Kanama 2022 ariko ku busabe bw’Ubushinjacyaha, umwanzuro warwo watangajwe uyu munsi.

Urukiko rwemeje ko nta mpamvu zikomeye zituma Mugabekazi afungwa by’agateganyo.

Rwagize ruti “Rutegetse ko Mugabekazi Liliane afungurwa by’agateganyo iki cyemezo kikimara gusomwa. Iki cyemezo gisomwe mbere y’igihe cyari giteganyijwe ku busabe bw’Ubushinjacyaha.’’

Mu rukiko, Ubushinjacyaha bwagaragarije urukiko ko nyuma y’igitaramo cyatumiwemo Umuhanzi Tayc cyabereye muri BK Arena ku wa 30 Nyakanga 2022, bwabonye amafoto ya Mugabekazi Liliane avuga ko yafotowe n’umuntu atazi ikote ryafungutse.

Iyi foto ni yo yatumye atabwa muri yombi ku wa 7 Kanama 2022 na Polisi yahise imushyikiriza Urwego rw’Igihugu rw’Ubugenzacyaha (RIB) kuri Sitasiyo ya Remera.

Kuva icyo gihe yatangiye gukorwaho iperereza ndetse dosiye ye ishyikirizwa Ubushinjacyaha na bwo buyiregera urukiko. Yarezwe icyaha cyo gukorera ibiterasoni mu ruhame.

Mu iburanisha, Ubushinjacyaha bwabwiye urukiko ko hari impamvu zikomeye zituma uregwa akurikiranwaho icyaha, bunamusabira gufungwa iminsi 30 y’agateganyo.

Mugabekazi yireguye ko atigeze ajya mu gitaramo yambaye ubusa kuko hari aho yanyuze asakwa kandi atari kwemererwa kuhagera ameze atyo.

Yavuze ko ubwo igitaramo cyari kirimbanyije, ikote rye ryafungutse kubera kwizihirwa bityo umuntu atazi akamufotora ku mpamvu atazi.

Avuga ko n’iyo ubwambure bwe bwaba bwaragaragaye atakabaye ari we ubiryozwa kuko ikosa ryaba ryarakozwe n’uwamufotoye.

Mugabekazi yasobanuye ko nta mpamvu zikomeye zatuma akurikiranwa ndetse asaba urukiko kumurekura, byaba ngombwa agakurikiranwa ari hanze.

Abunganira Mugabekazi mu mategeko bagaragarije Urukiko ko umukiliya wabo atambaye ubusa kuko iyo aza kuba atambaye atari kurenga abashinzwe umutekano kuri BK Arena.

Bavuze ko nta tegeko rihana uyu mukobwa rihari ndetse basaba Ubushinjacyaha kugaragaza itegeko yarenzeho ngo bumushinje kwitabira igitaramo yambaye nabi.

Umwanzuro ku gufungura Mugabekazi Liliane watangajwe uregwa ari mu rukiko ndetse n’uruhande rw’Ubushinjacyaha rwari ruhagarariwe.

Mugabekazi Liliane yafunguwe mbere y'igihe umwanzuro ku busabe bw'Ubushinjacyaha ku ifungwa n'ifungurwa by'agateganyo wagombaga gutangarizwa
Mugabekazi Liliane yagejejwe mu rukiko akurikiranyweho icyaha cyo gukora ibiterasoni mu ruhame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .