00:00:00 IGIHE NETWORK KN KINYARWANDA EN ENGLISH FR FRANCAIS

Micomyiza yashinjwe kuyobora ubwicanyi kuri za bariyeri no gufata abakobwa bo muri NUR ku ngufu

Yanditswe na Ntabareshya Jean de Dieu
Kuya 16 May 2022 saa 02:23
Yasuwe :

Ubushinjacyaha bw’u Rwanda bwagaragaje ubugome ndengakamere bwaranze Micomyiza Jean Paul ‘Mico’ ukurikiranyweho uruhare muri Jenoside yakorewe Abatutsi mu 1994, uri kuburana mu Rukiko rw’Ibanze rwa Kicukiro ku ifungwa n’ifungurwa ry’agateganyo.

Iyi ngingo yazamuwe n’impaka zavutse ubwo haburanwaga ku nzitizi zagaragajwe n’abunganira Micomyiza zirimo izijyanye n’aho afungiye, kuri uyu wa Mbere, tariki ya 16 Gicurasi 2022.

Ubushinjacyaha bwagaragaje ko kuba Mico afungiye i Mageragere bidasobanuye ko ari muri Gereza ya Nyarugenge kuko aho ari hari kasho kandi afunzwe byemewe n’amategeko.

Abunganira Mico banagaragaje inzitizi y’iburabubasha ku Rukiko rw’Ibanze rwa Kicukiro bavuga ko urubanza rwari rukwiye kuburanishwa n’Urukiko rw’Ibanze rwa Nyarugenge kuko umukiliya wabo afungiye mu ifasi yarwo.

Umucamanza Uwizeye Nadine yategetse ko izo nzitizi zizasuzumwa mu gihe urubanza ruzaba rwatangiye kuburanishwa mu mizi.

Ubushinjacyaha bwavuze ko impamvu bushingiraho busaba ko Mico afungwa by’agateganyo, ari uko akurikiranyweho ibyaha bine birimo kwica nk’icyaha cya Jenoside, icyaha cyo gutera ubumuga bw’umubiri cyangwa ubumuga bwo mu mutwe nk’icyaha cya Jenoside, icyaha cy’ubufatanyacyaha muri Jenoside, gusambanya ku gahato n’ibyaha byibasiye inyokomuntu yakoze mu 1994 muri Jenoside yakorewe Abatutsi.

Ibi byaha byose yabikoreye aho avuka, mu yahoze ari Butare, kuri ubu ni mu Karere ka Huye.

Ubushinjacyaha bwagaragaje ko Micomyiza yagiye mu bitero bitandukanye byahitanye Abatutsi, bikomeretsa abandi ndetse bamwe bibatera ubumuga.

Micomyiza muri icyo gihe yari umunyeshuri mu yari Kaminuza Nkuru y’u Rwanda kandi yigaga muri Sciences Appliquées ngo akaba n’umwe mu bari bagize Comité de Crise yari yarashyizweho muri kaminuza yifashishwaga mu guhiga Abatutsi. Bamwe mu bo bari kumwe muri iyo komite ni Karabaranga, Sebanani n’abandi.

Ubushinjacyaha bwagaragaje ko bimwe mu bitero bagiyemo birimo icyakozwe kwa Nyandekwe Protais cyiciwemo Rutayisire, Karori n’abana be batatu ndetse hicwa na Kalisa wari ingaragu mu yahoze ari Komini Ngoma.

Micomyiza kandi yishe umugore w’uwitwa Seromba n’umwana we w’umuhungu akoresheje agashoka mu cyahose ari Cellule Agasengasenye.

Micomyiza kandi ashinjwa gukoresha umupanga atema umwe mu bakobwa b’Abatutsi kuri bariyeri yari iwabo, binavugwa ko yagize uruhare mu ishingwa ryayo.

Micomyiza kandi ku wa 2 Kamena 1994 yayoboye igitero cyagabwe kwa Ndutiye Joseph mu gitero cyahitanye umukwe we n’abana be babiri banyujijwe kuri bariyeri yayoborwaga na Micomyiza babashyikiriza interahamwe ebyiri.

Ari mu bantu bateye ubumuga bwakorewe Mugabe Aristide kuko yakomerekejwe bikomeye ariko bakamusiga bazi ko yapfuye nyamara akaza kurokoka.

Ubushinjacyaha kandi bwagaragaje ko Micomyiza ari mu bantu bakoreye iyicarubozo umugore wari ugiye kubyara bakoresheje imishito bakuraga ku mbabura ku muriro bitaga ‘Umuriro w’Iteka’ muri Cellule ya Mamba ubu ni mu Murenge wa Ngoma.

Uyu mugore yagombaga kubyara impanga ariko umwe avuka yapfuye kuko umwe muri zo yari yakomerekejwe n’iyo mishito yafashe ku gihorihori.

Mico kandi ngo yagaragaye mu bitero byinshi byahitanye abatutsi ari kumwe na Bagenzi be hicwa Abatutsi benshi.

Micomyiza Jean Paul kandi muri Kamena afatanyije na Munyaneza Désiré bafashe umukobwa wigaga muri Kaminuza Nkuru y’u Rwanda, barangije Micomyiza amwangiza imyanya y’ibanga. Ubushinjacyaha bwavuze ko byabereye mu yahoze ari cellule ya Mamba, ubu ni mu Murenge wa Ngoma i Huye.

Ubushinjacyaha bwagaragaje kandi ko yagiye afata ku ngufu abakobwa b’Abatutsi bigaga muri Kaminuza Nkuru y’u Rwanda harimo abo imyirondoro yabo yamenyekanye n’abo itamenyekanye.

  Impamvu Ubushinjacyaha bushingiraho burega Mico

Ubushinjacyaha bwagaragaje ko ibyaha Mico yakoze hari abatangabuhamya bagiye bagaragaza ibikorwa yakoze.

Ku birebana n’icyaha cyo kwica ngo ubwo Niyitegeka Emmanuel yabazwaga, yashinje Micomyiza ko yishe uwitwa Bosco wari umushoferi. Mu buhamya bwe yavuze ko ngo yabanje kumukuramo amaso ndetse akoresha agashoka amukuraho ijosi.

Undi ni Gasasira Jean Pierre washinje Mico ko ubwo yari kuri bariyeri hafatiwe abahungu babiri b’Abatutsi ndetse babiciye mu kabande ko munsi y’iwabo wa Micomyiza babicisha impiri, Mico atema umwe muri bo akoresheje umupanga.

Ubwo Interahamwe zari zagiye kwakira Igisonga cya Papa mu Rwanda, Micomyiza ari kumwe n’izindi nterahamwe bajyanye Abatutsi batatu babajyana muri Rectorat iri munsi ya Kaminuza aba ari ho babicira.

Ku birebana n’icyaha cyo gutera ubumuga bw’umubiri cyangwa ubumuga bwo mu mutwe, uwitwa Venerand abazwa yashinje Micomyiza ko afatanyije na Gahutu Emmanuel, Minani n’abandi bashoreye umugabo we Nteziryayo n’abana be babiri barimo Mugabe Aristide bajya kubica ariko ku bw’amahirwe ararokoka gusa yari yakomerekejwe cyane.

Ibijyanye n’ibyaha by’ubufatanyacyaha muri Jenoside yakorewe Abatutsi abatangabuhamya bagaragaje ko Mico myiza yishe Abatutsi ari kumwe n’abandi bantu batandukanye. Yanakundaga kuba yambaye imyenda ya gisirikare, yakundaga kugenda mu bitero ndetse ngo yanayoboraga Bariyeri yari iwabo.

Niyitegeka Emmanuel yashinje Mico ko hari abanyeshuri bagendaga bahunga bageze kuri bariyeri yarindaga. Yafashe umwe muri abo bakobwa babamanukana mu ishyamba aho bitaga ku iseta bajya ku basambanya.

Ubushinjacyaha bwavuze ko bushingiye kuri izo mpamvu, Mico akwiye gufungwa by’agateganyo kuko ashobora gutoroka ubutabera hashingiwe ku buremere bw’ibyo akurikiranyweho.

Bwanavuze ko kuba yarafashwe hashize igihe kirekire ashakishwa bityo ifungwa rye ni bwo buryo bwonyine bwatuma adasibanganya ibimenyetso ndetse ntashyire ku nkeke abatangabuhamya na bamwe mu bahohotewe.

Ubushinjacyaha bwagaragaje ko urukiko rushingiye kuri izo mpamvu zikomeye no ku ngingo z’amategeko rwategeka ko Micomyiza afungwa iminsi 30 y’agateganyo.

  Mico yahakanye ibyo aregwa

Micomyiza ahawe umwanya ngo yisobanure, yahakanye ibyo kuba muri Comité de Crise, avuga ko yabyumviye mu rukiko. Yashimangiye ko ibyo byaha byose Ubushinjacyaha bumukekaho atigeze abikora.

Yagize ati “Sinigeze mfata ku ngufu, sinigeze nica umuntu, birashoboka ko ibyo bintu byakozwe nkaba naribeshyweho. Biraboneka ko hashobora kuba hari abantu bashakaga gukingira ikibaba ibyaha bakoze cyangwa kugikingira abandi bantu kuko ibyavuzwe byose sinari mpari ariko birashoboka ko inzego z’igihugu zizamfasha.”

Yavuze ko mu batanze ubuhamya yatunguwe no kuba ari abantu atazi avuga ko yifuza kubamenya. We yavuze ko yibaza impamvu abo batangabuhamya bahisemo kubeshya inzego zikomeye nk’Ubushinjacyaha.

Mico yavuze ko impamvu yabiteye ari uko yakuriye ahantu hari hakunze kuba uburinzi kandi ko ibyo byo gufunga imihanda nta cyo abiziho.

Abajijwe n’umucamanza aho yari Jenoside igitangira ndetse no kugeza irangiye, Micomyiza yavuze ko yari iwabo mu rugo kandi ko nta kintu yigeze akora.

Yavuze ko atigeze aba interahamwe ndetse nta n’ishyaka yigeze abamo kandi ko kuva yabaho nta muntu n’umwe yigeze agirira nabi.

Me. Rugwizangoga Marcellin, umwe mu bunganira Micomyiza yavuze ko Jenoside yakorewe Abatutsi yabaye ku manywa y’ihangu ndetse isiga n’ingaruka zikomeye ku Banyarwanda bityo ko ntawe ukwiye gushyigikira umuco wo kudahana.

Yakomeje avuga ko ku ruhande rwa Micomyiza yanenze iperereza ryakozwe n’Ubushinjacyaha ashingiye ku mvugo ziteye urujijo kandi mu by’ukuri ari nabyo byagakwiye kugaragaza ukuri.

Avuga ko Ubushinjacyaha bwagakwiye kuba bushingira ku bimenyetso byemeza nta shiti ko ukekwa yakoze icyaha koko ndetse akaba ari na bumwe mu buryo bwo gutanga ubutabera.

Me. Rugwizangoga yavuze ko inyandiko y’Ubushinjacyaha ikubiyemo imvugo ziteye urujijo n’iz’abatangabuhamya zirimo kwibaza bityo nta mpamvu zikomeye bwashingiraho ngo abe afunzwe by’agateganyo.

Yasabye urukiko kurekura Micomyiza kuko Ubushinjacyaha bwagize igihe gihagije cyo gukora iperereza kandi mu gihe ryaba ntacyo ryagezeho bikwiye gusuzumwa rukemeza ko afungurwa.

Abunganira Micomyiza kandi bavuze ko mu gihe cy’urubanza mu mizi azazana abatangabuhamya bo kumushinjura ku byaha Ubushinjacyaha bumukurikiranweho.

Bagaragaje ko mu gihe Urukiko rwashingira ku mpamvu z’Ubushinjacyaha bukemeza ko Micomyiza akwiye gufungwa hazashingirwa ku ngingo ya 70 y’itegeko rigena imiburanishirize y’imanza nshinjabyaha bityo akagenzurwa hifashishijwe ikoranabuhanga aho gufungwa.

Me Rudakemwa Félix na we yashimangiye ko impamvu zatanzwe n’Ubushinjacyaha zo kuba yafungwa by’agateganyo ngo adatoroka ubutabera atari byo kuko umwirondoro we uzwi kandi kugeza ubu ntacyo yishinja.

Yagaragaje ko ibyo kuba yabangamira iperereza nabyo bitagakwiye gushingirwaho kandi Ubushinjacyaha bumaze igihe burikoze ndetse ko na mbere y’imyaka itatu y’uko afatwa bwari bumaze igihe buririmo.

Ku birebana no kuba yashyira ku nkeke abatangabuhamya, Me Rudakemwa yavuze ko nabyo nta mpungenge bikwiye guteza kuko uwo yunganira [Micomyiza Jean Paul] agaragaza ko nta n’umwe muri bo azi.

Urubanza rwahise rupfundikirwa nyuma y’amasaha abiri n’iminota 20; umucamanza yemeza ko umwanzuro uzatangazwa ku wa 19 Gicurasi 2022 saa Tatu z’igitondo.

Ubushinjacyaha bwagaragaje ubugome ndengakamere bushingiye ku byaha byakozwe na Micomyiza Jean Paul muri Jenoside yakorewe Abatutsi
Micomyiza yahakanye ibyaha byose akurikiranyweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .