00:00:00 IGIHE NETWORK KN KINYARWANDA EN ENGLISH FR FRANCAIS

Inzitizi mu isomwa ry’urubanza rw’abakozi ba IPRC Kigali bashinjwa ubujura

Yanditswe na IGIHE
Kuya 18 Ugushyingo 2022 saa 07:20
Yasuwe :

Urukiko rw’Ibanze rwa Kicukiro rwasubitse isomwa ry’icyemezo cyarwo ku ifunga n’ifungurwa ry’agateganyo ry’abahoze ari abayobozi n’abakozi b’Ishuri rikuru ry’Imyuga n’Ubumenyingiro rya Kigali (IPRC-Kigali), bashinjwa ibyaha birimo ubujura no kunyereza umutungo.

Ni abantu 19 barimo Eng Murindahabi Diogène wari Umuyobozi wa IPRC Kigali n’uwari Umuyobozi ushinzwe imari, Munyampundu Thomas Vander.

Barimo kandi uwari ushinzwe kubika ibikoresho, Nabo Jean Claude, umukozi ushinzwe iby’amazi, Hakizimana Venuste, bamwe mu barimu, abashinzwe umutekano n’abandi.

Ibyaha bashinjwa birimo ubujura, kunyereza umutungo wa leta, inyandiko mpimbano n’icyaha cyo guhishira ibikomoka ku cyaha.

Ubushinjacyaha buvuga ko ibikoresho bashinjwa kwiba bifite agaciro k’asaga miliyoni 113Frw.

Bagombaga gusomerwa kuri uyu wa 18 Ugushyingo 2022, ariko Urukiko rwatangaje ko ubunini bwa dosiye yabo bwatumye byigizwa inyuma.

Umucamanza yatangaje ko umwanzuro w’urukiko uzasomwa ku wa Kabiri tariki 22 Ugushyingo.

Mu iburanisha riheruka, umwe wenyine niwe wemeye ibyaha aregwa mu gihe abandi bose babihakanye bagasaba kurekurwa bagakurikiranwa bari hanze kuko ari abere n’izindi mpamvu zitandukanye bagiye bagaragaza.

Aba bakozi bashinjwa ubujura bwakozwe ku bikoresho by’ubwubatsi, ibikoreshwa n’abakora amazi, ibyuma byifashishwa mu gukora za muvero [amasafuriya manini atekerwamo].

Eng Mulindahabi wari Umuyobozi wa IPRC Kigali, yavuzweho kunyereza umutungo ndetse ngo hari imashini ikurura amazi basanze iwe mu rugo ndetse n’indi mashini nayo ikora mu bijyanye no gutunganya amazi. Izo mashini ebyiri zose zasanzwe iwe mu rugo.

Ikindi cyagarutsweho ni uko hari ibikoresho bifite agaciro k’asaga miliyoni 70Frw byasabwe mu ikoranabuhanga n’umwe mu bakozi ba IPRC Kigali ariko uburyo busanzwe bukoreshwa mu gusaba ibikoresho, bwerekanye uko uwari ushinzwe ibikoresho ariwe winjiye muri iryo koranabuhanga.

Muhimpundu yabwiye urukiko ko ari umwe mu bo bakorana wamwibye umubare w’ibanga agasaba ibyo bikoresho ubundi bigasohoka bikanyerezwa ntibikore icyo byari byateganyirijwe.

Avuga ko umunsi ibyo bikoresho byasabwe we yari yagiye mu bukwe atari ari mu kigo cyane ko hari no ku wa Gatandatu. Ku rundi ruhande ariko, umushoferi wamutwaraga yavuze ko uwo Muhimpundu ariwe wibye ibyo bikoresho akabisohora mu kigo.

Eng Mulindahabi Diogène n’abakozi yayoboraga muri IPRC Kigali batawe muri yombi ku wa 23 Ukwakira 2022. Ni nyuma y’itangazo Guverinoma yari yashyize hanze rivuga ko yafunze by’agateganyo IPRC Kigali mu gihe cy’ibyumweru bibiri.

Nyuma y’iperereza ku bujura bw’ibikoresho n’imyitwarire mibi yo kwiha umutungo rusange wa Leta, ishuri ryongeye gufungura imiryango, bamwe mu bayobozi n’abakozi baryo bakomeza iy’ubutabera.

Eng Mulindahabi wayoboraga IPRC Kigali, ni umwe mu bakurikiranyweho ibyaha birimo ubujura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .