00:00:00 IGIHE NETWORK KN KINYARWANDA EN ENGLISH FR FRANCAIS

Ingoro y’ubutabera; umushinga ukomeye Dr Muganga asize muri ILPD yasabye ko wihutishwa

Yanditswe na Prudence Kwizera
Kuya 11 August 2022 saa 08:07
Yasuwe :

Dr Muganga Kayihura Didas uherutse kugirwa Umuyobozi w’Agateganyo wa Kaminuza y’u Rwanda (UR) yasoje urugendo rwe mu Ishuri Rikuru ryigisha Amategeko mu Rwanda (ILPD) Nyanza yari asanzwe ayobora.

Yahererekanyije ububasha na Dr Sezirahiga Yves wahawe kuyobora ILPD by’agateganyo, umuhango wabereye ku cyicaro cy’iryo shuri ku wa Gatatu tariki ya 10 Kanama 2022, witabirwa na Minisitiri w’Ubutabera akana n’Intumwa Nkuru ya Leta, Dr Ugirashebuja Emmanuel.

Mu ijambo rye, Dr Kayihura yagaragaje intambwe yatewe mu iterambere rya ILPD ariko by’umwihariko yerekana imishinga minini asize, asaba ko yitabwaho ikihutishwa kuko igamije iterambere ry’igihugu.

  Ingoro y’Ubutabera mu Rwanda

Dr Muganga yavuze ko mu mishinga yasize iteganyije gushyirwa mu bikorwa harimo Ingoro y’Ubutabera mu Rwanda izubakwa muri ILPD igaragaza amateka y’ubutabera mu Rwanda kuva hambere.

Yagize ati “Aho twifuza ko twazagaragaza uko ubutabera bwahoze mbere y’umwaduko w’Abazungu, igihe cy’Abazungu, Repubulika ya Mbere n’iya Kabiri kugeza uyu munsi turiho twishimira byinshi byagiye bigerwaho mu butabera.”

Bimwe mu byo bifuza kuzashyiramo bamaze gukusanya harimo amashusho n’amafoto y’ahahoze Urukiko rw’Ikirenga na Minisiteri y’Ubutabera ndetse n’ubuhamya bw’abasobanura amateka yaho.

Ikindi ni amashusho n’amafoto y’ahahoze gereza ya mbere mu Rwanda yitwaga 1930 n’abasobanura amateka yaho.

Ati “Twabikoze kuko twumvaga gahunda ya Leta uko irimo kugenda tubyumva ko Gereza ya 1930 igiye kuvanwaho, twumva ko hariya hari Minisiteri y’Ubutabera n’Urukiko rw’Ikirenga bagiye kuhahindura ariko tukumva twaba dutakaje ikintu gikomeye cyane. Twarabibitse rero kugira ngo bizabe mu byo tuzashyira muri iyo ngoro.”

Yasobanuye ko bifuza ko muri iyo ngoro umuntu azajya ageramo akaba yamaramo nk’iminsi ibiri ari kwiga ku mikorere y’ubutabera mu Rwanda.

Yavuze ko uyu mushinga w’ingoro y’ubutabera azakomeza kuwukurikirana n’ubwo avuye muri ILPD kubera akamaro kawo ku gihugu.

Ati “N’ubwo mvuye muri ILPD ndumva uyu mushinga ubuyobozi bwa ILPD bwawitaho kuko niteguye gutanga umusanzu wanjye bishoboka kugira ngo izo nzozi zacu zibe impamo.”

Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel (hagati), ni we wayoboye ihererekanyabubasha muri ILPD. Dr Muganga Kayihura Didas (ibumoso) yasimbuwe na Dr Sezirahiga Yves

  Filozofiya y’amategeko y’u Rwanda

Dr Muganga yavuze ko mu myigishirize y’amategeko mu Rwanda kugeza ubu batigisha Filozofiya y’Amategeko y’u Rwanda kandi mu bushakashatsi yakoze yasanze yarabagaho bityo akaba yaratekereje umushinga wo kujya yigishwa mu mashuri.

Ati “Mu bushakashatsi buke nakoze ari nabwo bwasembuye icyo gitekerezo ni uko nasanze yarabagaho. Iyo filozofiya yabagaho ariko hari ukuntu yatakaye ku bushake bwa bamwe batakundaga u Rwanda batuzanira iyabo.”

Yavuze ko yamaze no gukora imbanzirizamushinga kandi n’abashobora gutanga ibiganiro kuri uwo mushinga barimo abanyamateka, abanyamategeko abafilozofe, bahari.

Yagize ati “Naje kumenya ko mbere y’Igitabo cy’Amategeko ahana (code penal) dufite ubu, u Rwanda rwari rufite icyarwo gifite ingingo 602 cyari gifitanye isano n’icy’ubwiru. Kirahari kandi abo bashakashatsi banyijeje ko twakibona.”

Yagaragaje ko ibyo biramutse bigezweho bitafasha ILPD gusa ahubwo byafasha na Kaminuza y’u Rwanda mu gukora integanyanyigisho nziza irimo Filozofiya y’amategeko y’u Rwanda ku buryo bigisha umunyamategeko wumva neza icyo ubutabera mu Rwanda bwabaga buvuze.

Ati “Tukubaka Umunyarwanda uzaba ufite izo ndangagaciro w’umunyamategeko mu Rwanda.”

Yavuze ko hari n’indi mishinga irimo uwo kubaka inzu mpuzamikino nini ihuza imikino igera kuri irindwi icyarimwe; inzu y’inama nini mu ntara n’iyindi.

Umuyobozi w’Agateganyo wa ILPD, Dr Sezirahiga Yves, yavuze ko bishimira iterambere iryo shuri rigezeho kandi inshingano ahawe azazikorana umurava afatanyije na bagenzi be.

Ati “Turabizeza ko izi nshingano tuzazikorana umwete kandi tuzajya dukenera n’inama zanyu.”

Minisitiri w’Ubutabera, Dr Ugirashebuja Emmanuel, yavuze ko bafite icyizere ko ILPD izakomeza gutera imbere, yizeza ubufatanye ndetse abwira na Dr Muganga ko bazamuba hafi mu buyobozi bwa UR.

Yagize ati “Duhereye ku byo wakoze hano kuri ILPD n’ahandi wagiye uyobora turizera ko uzabigeraho ariko tukanakwifuriza ko uzabigeraho neza ndetse tukanakwizeza ko tuzafatanya nawe mubyo ugiyemo kuko ntiwigeze udutererana.”

Yijeje ko imishinga iteganyijwe muri ILPD irimo uw’itegeko n’indi itandukanye bazakomeza ubufatanye mu kuyirangiza kugira ngo ishyirwe mu bikorwa.

Kuva ILPD yafungura imiryango mu 2008 imaze gutanga impamyabumenyi ku banyamategeko b’umwuga bagera ku 2500, ubu hari kwigamo abarenga 590.

Itangirwamo n’amahugurwa y’igihe gito mu bijyanye n’amategeko aho mu mwaka umwe hahugurirwa abarenga 3000.

Kugeza ubu abagana iri shuri baturuka mu bihugu birimo Cameroun, Zambia, Sudani, u Burundi, Uganda, Kenya, Sudani y’Amajyepfo, Malawi n’u Rwanda.

Dr Muganga Kayihura Didas yagaragaje imishinga minini ikwiye gukomeza kwitabwaho muri ILPD
Umuyobozi w’Agateganyo wa ILPD, Dr Sezirahiga Yves, yavuze ko inshingano ahawe azazikorana umurava afatanyije na bagenzi be
Umuhango w'ihererekanyabubasha witabiriwe n'abayobozi batandukanye ndetse n'abarimu bo muri ILPD
Minisitiri w’Ubutabera akaba n’Intumwa Nkuru ya Leta, Dr Ugirashebuja Emmanuel, yavuze ko bafite icyizere ko ILPD izakomeza gutera imbere, abizeza ubufatanye
Nyuma y'umuhango w'ihererekanyabubasha, abayobozi bafashe ifoto y'urwibutso
Inyubako ikoreramo Ishuri Rikuru ryigisha Amategeko mu Rwanda, ILPD

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .