00:00:00 IGIHE NETWORK KN KINYARWANDA EN ENGLISH FR FRANCAIS

Ingingo zashingiweho hajuririrwa Rusesabagina, ‘Sankara’ n’abandi 19- Uko iburanisha ryagenze (Amafoto)

Yanditswe na Israel Ishimwe
Kuya 20 January 2022 saa 08:30
Yasuwe :

Ubushinjacyaha bwatangiye gusobanurira Urukiko rw’Ubujurire ingingo ku yindi impamvu bwashingiyeho bujuririra icyemezo cy’Urukiko Rukuru rwahamije Rusesabagina Paul, Nsabimana Callixte ‘Sankara’ n’abandi 19 ibyaha bifitanye isano n’ibikorwa by’iterabwoba.

Kuri uyu wa Kane, tariki ya 20 Mutarama 2022, ni bwo uru rubanza rwakomeje kuburanwa mu bujurire nyuma y’uko ku wa Mbere rwari rwasubitswe nyuma y’ibura rya Rusesabagina uri mu baburanyi utaragaragaye mu rukiko.

Ibura rye ryagizweho impaka ariko Urukiko rw’Ubujurire rwanzura ko Rusesabagina yahamagawe byemewe n’amategeko ariko yanga kwitaba ku bushake bwe.

Kuri uyu munsi, Ubushinjacyaha bwatangiye kwerekana impamvu bwashingiyeho bujurira zikubiye mu ngingo zitandukanye zirimo inyito y’ibyaha ababuranyi bahamijwe ndetse n’ibyaha bagizweho abere.

Uruhande rw’abaregwa rwo rwagaragarije urukiko ko hari bamwe bahawe ibihano batemera ndetse banatanga ingingo zibishimangira.

Izindi ngingo ebyiri zizaburanwaho muri bujurire bw’uru rubanza harimo ibihano abaregwa bahawe ubushinjacyaha butemera ndetse n’abaregera indishyi bavuga ko hari abahawe nke hashingiwe gusa ku bushishozi bw’urukiko n’abataragize izo bahabwa.

UKO IBURANISHA RYAGENZE:

14:08: Iburanisha ryo kuri uyu munsi rirasojwe. Perezida w’Inteko Iburanisha, Rukundakuvuga François Regis, yavuze ko urubanza ruzasubukurwa ku wa Mbere, harebwa ibijyanye n’ibihano byahawe ababuranyi ariko Ubushinjacyaha bukaba butabyemera. Uruhande rw’abaregera indishyi rwo ruzatangira kumvwa ku wa Gatatu w’icyumweru gitaha.

13:58: Umushinjacyaha Dushimimana Claudine yavuze ko mu kurega Nizeyimana Marc hibanzwe ku bikorwa yakoze ku giti cye nka Nizeyimana Marc.

Ati “Nta na hamwe tubona Nizeyimana Marc avuguruza ibyo urukiko rwashingiyeho. Ntagaragariza Urukiko rw’Ubujurire inenge Urukiko Rukuru rwaba rwaragize mu kumuhamya uruhare mu Gukora no kugira uruhare mu bikorwa by’iterabwoba.’’

  Icyaha cyo Gukora no kugira uruhare mu bikorwa by’iterabwoba

Nizeyimana Marc yavuze ko ibivugwa ko yafashwe ajyanye ingabo gutera u Rwanda nta kimenyetso gifatika Ubushinjacyaha bubigaragariza.

Ati “Nta misiyo yo kujya mu Rwanda twari dufite, nta n’ibikoresho twari dufite. Kuba naravuganye na Gwado [ni umusirikare wa FLN] twari dusanzwe tuvugana bisanzwe. Njye nta yindi mikoranire nari mfitanye n’abateguye ibitero usibye abampaga amategeko.’’

Yavuze ko bageze muri Uvira bari kumwe n’abasirikare 150, kandi batari guhaguruka bose icyarimwe.

Ati “Kuba nari ngiye imbere, ntibivuze ko twari tugiye mu Rwanda. Twari tugiye ahandi hafite umutekano. Mbere na nyuma y’uko mfatwa abo twari kumwe nta gikorwa nzi cy’iterabwoba baba barakoze.’’

Mu maburanisha yo mu Rukiko Rukuru, Ubushinjacyaha bwasobanuye imiterere y’ibyaha icyenda biregwa Col Nizeyimana Marc. Bwavuze ko yahoze mu bayobozi bakuru muri FLN muri Secteur Nord ari na yo yoherezaga abarwanyi benshi mu bagabye ibitero mu Rwanda.

  Icyaha cyo kugambana no gushishikariza abandi gukora igikorwa cy’iterabwoba

Nsabimana Jean Damascène wakatiwe gufungwa imyaka 20 yavuze ko atigeze ashinjwa iki cyaha ndetse n’Ubushinjacyaha mu mwanzuro wabwo rwavuze ko iki cyaha atakirezwe ndetse adakwiye kugihanirwa.

Nsabimana Jean Damascène alias Motard yarezwe Kuba mu mutwe w’iterabwoba, Ubwinjiracyaha bw’ubwicanyi nk’igikorwa cy’iterabwoba no gukoresha binyuranyije n’amategeko ikintu giturika ahantu hakoreshwa na rubanda.

13:16: Umushinjacyaha Dushimimana Claudine avuga ku byatangajwe na Nizeyimana Marc yasobanuye ko uregwa atagaragariza urukiko ibimenyetso bitandukanye n’ibyifashishijwe n’ibyashingiweho mu rukiko rubanza.

Ati “Ibyo avuga, urukiko nyuma yo gusesengura ibigize icyaha cyo kuba mu mutwe w’iterabwoba, ntagaragaza uko imvugo ze zagoretswe. Dusanga impamvu z’ubujurire bwe nta shingiro zifite kuko umuburanyi aba agomba kugaragaza inenge ku rubanza rwajuririwe. Hakwiye kugumanaho umwanzuro w’urukiko rukuru.’’

Umushinjacyaha ku rwego rw'igihugu, Dushimimana Claudine
Abashinjacyaha Habarurema Jean Pierre na Dushimimana Claudine

13:08: Umushinjacyaha Dushimimana Claudine yasobanuye ko impamvu zatanzwe na Nshimiyimana Emmanuel ari zo yatanze no mu Rukiko Rukuru. Rwamwemeje ko yabaye mu Mutwe w’Iterabwoba hashingiwe ku bimenyetso byagaragajwe.

Ati “Ntabwo Nshimiyimana yagaragarije Urukiko rw’Ubujurire inenge ituma avuga ko hari ikosa ryakozwe mu kumuhamya ibyaha. Ntagaragaza ikosa Urukiko Rukuru rwakoze mu kumuhamya icyaha. Icyo yavuze ko urukiko rwirengagije ibimenyetso, ntabyo kuko na we ubwe ntabyo yagaragaje.’’

13:04: Urukiko rwasubije ko Ntabanganyimana Joseph atajuriye ahubwo yashatse kugira icyo avuga ku byo Ubushinjacyaha bwashyize muri system. Uyu yakatiwe imyaka itatu.

13:00: Umushinjacyaha Mukuru Wungirije, Habyalimana Angelique yasabye urukiko kubanza gusuzuma ko niba Ntabanganyimana Joseph yarajuriye kuko bwo busanga icyo yakoze ari ugutanga igitekerezo ku mwanzuro watanzwe n’Ubushinjacyaha.

Umushinjacyaha Mukuru Wungirije, Habyalimana Angelique

12:41: Col Nizeyimana Marc yasobanuye ko kuva mu 1994 yongeye kugera ku butaka bw’u Rwanda mu 2020.

Yasobanuye uko ubwo yafatwaga atari agamije kujyana ingabo yayoboraga ku butaka bw’u Rwanda ahubwo bashakaga ahantu hatuje hatari amasasu kandi babonaga mu Kibira mu Burundi ari ho hakwiye kuko ntaho bari guhurira n’Ingabo za RDC n’iz’u Burundi.

Ati “Usibye ibyo nasobanuye byumviswe nabi, nta bimenyetso bifatika byerekana ko nabaye mu mutwe w’iterabwoba.’’

12:31: Nshimiyimana yavuze ko ubwo yageragezaga kwerekeza muri Monusco ngo atahe, yakubiswe inkoni 300.

Yakomeje ati “Hari abayobozi bakuru bagiye biyemerera uko batwinjizaga muri iyo mitwe ku ngufu.’’

Yatanze ingero zitandukanye nk’aho abarimo Brig Gen Mberabahizi David, Col Gatabazi Joseph na Lt Col Kagemana Simon, bose bagiye basobanura mu mabazwa atandukanye ko urubyiruko rwari mu mashyamba ya Repubulika Iharanira Demokarasi ya Congo rwahatirwaga kwinjira mu mitwe y’iterabwoba.

Ati “Nk’uko nagaragaje ibimenyetso, Ubushinjacyaha butashoboye kuvuguruza, nta n’ubwo buvuguruza inyandikomvugo z’abatwinjizaga muri iyo mitwe. Ubaze imyaka yanjye, mu 1993 ukageza mu 2010 ubwo ninjizwaga mu gisirikare nkuwe mu ishuri, icyo gihe nari mfite imyaka 17. Nsanga nkwiye kutaryozwa icyaha cyo kuba mu mutwe w’iterabwoba, kuko nayinjijwemo ku gitutu, agahato ntashoboraga kwigobotora. Ndasaba kugirwa umwere.’’

12:21: Nshimiyimana Emmanuel yavuze ko asaba kugirwa umwere ku cyaha cyo kuba mu mutwe w’iterabwoba kuko yayinjijwemo nta bushake be bubirimo.

Ati “Ninjijwe mu mitwe ku gahato. No kuyisohokamo ntibyari byoroshye kubera ibihano bya kinyamaswa birimo n’igihano cy’urupfu cyahabwaga abashaka kuyivamo.’’

Yifashishije inyandikomvugo zo mu maburanisha atandukanye zerekana ko ubwo yari afite imyaka 17, yigaga mu mwaka wa gatatu w’amashuri yisumbuye, agaragaza ko yinjiye mu mitwe y’iterabwoba ku gahato.

12:19: Umucamanza Kamere Emmanuel yavuze ko kuri Ntabanganyimana Joseph yajuriye asaba urukiko kumuhanaguraho icyaha cyo kuba mu mutwe w’iterabwoba, akaba umwere.

Umucamanza Kamere Emmanuel

12:16: Kuri Nizeyimana Marc avuga ko yemera ko yabaye mu mutwe w’ingabo utemewe. Yasobanuye uko yabaye muri FDLR, kugeza yinjiye muri FLN yanabereye Umuyobozi wa Secteur.

Yavuze ko ibindi byaha byose yarezwe [Gukora iterabwoba no kuba mu mutwe w’iterabwoba] ntaho ahuriye nabyo kuko Ubushinjacyaha nta bimenyetso bwagaragaje.

12:11: Nshimiyimana Emmanuel mu iburanisha ryo ku rwego rwa mbere yabwiye urukiko ko bamukuye ku ishuri afite imyaka 17, akavuga ko yayinjijwemo ku gahato bityo akwiye gusubizwa mu buzima busanzwe.

Ubushinjacyaha buvuga ko Urukiko Rukuru rwamuhamije kuba mu mutwe w’iterabwoba rushingiye ku byo yiyemereye mu mabazwa atandukanye. Yemeye ko yabaye muri FDLR/FOCA na FLN kugeza afashwe.

12:08: Ababuranyi batatu ni bo banenze ko bahamijwe icyaha cyo Kuba mu mutwe w’iterabwoba. Ni Nshimiyimana Emmanuel, Nizeyimana Marc na Ntabanganyimana Joseph.

  Ibyaha abaregwa bahamijwe n’urukiko batishimiye

Umucamanza Kamere Emmanuel yasobanuye ko ingingo ya gatatu yajuririwe ari ibyaha abaregwa bahamijwe n’urukiko ariko ntibabyishimire bakabijurira.

11:54: Umushinjacyaha Ruberwa Bonaventure yifashishije ingingo ya 61 y’Itegeko riteganya ibyaha n’ibihano muri rusange, mu kwerekana ko ibyaha mpuzamugambi bishobora gukurikiranwa muri dosiye imwe.

Ati “Niba tuvuga gutera inkunga, ntabwo byakuraho ko igikorwa cyasuzumwa mu cyaha cyo kuba mu mutwe w’iterabwoba no gutera inkunga iterabwoba. Noneho hakazarebwa ibitaganywa n’icyo itegeko riteganya.’’

11:45: Umushinjacyaha Dushimimana Claudine yavuze ko kuba Urukiko Rukuru rwaravuze ko uwahamwa n’icyaha cyo gutera inkunga iterabwoba ataba uwawushinze na byo binyuranye n’icyo itegeko riteganya kuko ashobora kuba uwashinze umutwe cyangwa uri hanze yawo.

Ati “Dusanga impamvu yatanzwe n’Urukiko Rukuru inyuranyije n’amategeko, ni amakosa yakozwe.’’

Rusesabagina ni we washinze Impuzamashyaka ya MRCD/FLN anayibera umuyobozi. Urukiko rwamugize umwere ku cyaha cyo gutera inkunga iterabwoba.

11:37: Urubanza rwakomeje Ubushinjacyaha buvuga ku cyaha bwajuririye aho Urukiko Rukuru rwagize umwere Rusesabagina Paul ku cyaha cyo gutera inkunga iterabwoba.

11:36: Inteko iburanisha yagarutse mu byicaro byayo. Iburanisha rigiye gusubukurwa.

10:59: Inteko iburanisha itanze akaruhuko k’iminota 30, iburanisha rirasubukurwa mu kanya gato.

10:51: Me Sharif Yusuf Mugabo yavuze ko ingingo Ubushinjacyaha bushingira busobanura kuba mu mutwe w’ingabo utemewe nta shingiro zifite.

Ati “Ndasaba urukiko ko mu nyungu z’abo nunganira ni uko Urukiko Rukuru ibikorwa barezwe cyo kuba muri iyo mitwe, baragikoze mu mugambi wo gukora iterabwoba. Umurongo urukiko rwafashe ukurikije amategeko kandi ntukwiye guhindurwa.’’

10:49: Me Uramije James yavuze ko abo yunganira barimo Iyamuremye Emmanuel na Niyirora Marcel yasobanuye ko we abakiliya be bashinjwa kwinjira mu mutwe w’ingabo utemewe ariko bo basobanura ko batabikoze ku bushake bwabo.

10:46: Me Rugeyo Jean wunganira Nsabimana Callixte ‘Sankara’ yavuze ko Ubushinjacyaha butagaragarije urukiko ingingo zifatika zifashishwa mu gukuraho imiburanishirize y’imanza za Deo Mushayidi na Ingabire Victoire.

Ati “Niba imanza eshatu za nyuma zarafashe umwanzuro utandukanye n’imanza ebyiri za mbere, ntaho byerekana ko umwanzuro wafashwe. Byagaragarizwa urukiko niba bihari.’’

10:40: Umushinjacyaha Dushimimana Claudine yavuze ko kuri Rusesabagina Paul na Nsabimana Callixte ‘Sankara’ icyo bakoze ari ukurema umutwe w’ingabo.

Ati “Urukiko Rukuru rwemeje ko aba bombi bahamijwe kurema umutwe w’Ingabo za FLN ushamikiye kuri MRCD. Abandi baregwa kwinjira mu mutwe w’ingabo utemewe nka FLN na FDLR/FOCA ariko kuri bo dusanga na bo bakwiye guhamywa n’iki cyaha kuko ibyashingiweho n’Urukiko mu guhamya ko atari umutwe w’ingabo utemewe twagaragaje ko atari byo kandi twabisobanuye.’’

10:33: Umushinjacyaha Ruberwa Bonaventure yavuze ko kuba imanza zo mu myaka ya vuba ikibazo cyasuzumwaga cyari kimwe ariko rugahitamo kuvugisha icyo itegeko rigena, rukanzura ko ikiba kigamijwe ari ugutera inkunga igitero cy’intambara, ntabwo wakwibanda ku ngero zashize mu gihe Urukiko rw’Ikirenga rwaragaragaje ko imyumvire yabaye mu manza zo mu 2010 zirimo urwa Ingabire Victoire itari yo.

Ati “Turasaba urukiko kumva ko umurongo uhari ari uwa vuba.’’

10:20: Umushinjacyaha Dushimimana yavuze ko bereka urukiko imanza zaciwe mu buryo butari bwo, ahagiye hirengagizwa amategeko.

Ati “Ingingo ya 459 iba igamijwe ni ugushyigikira igitero cy’intambara. Ni cyo gikomeye kandi gihura n’icyo twabwiye urukiko bigaragaza ko Urukiko Rukuru rwanyuranyije n’Urukiko rw’Ikirenga.’’

Yifashishije izindi manza zaciwe n’Urukiko rw’Ikirenga, zirimo urwa Habyarimana Emmanuel waregwaga icyaha cyo kurema umutwe w’ingabo bitemewe.

Mu gika cya 17 cy’uru rubanza, Urukiko rw’Ikirenga rwagarutse ku bikorwa Habyarimana yari akurikiranyweho bihura n’iby’abakurikiranywe muri iyi dosiye.

Ati “Dusanga hakwiye gutangwa umurongo nk’uwafashwe n’Urukiko rw’Ikirenga. Mu rubanza rwa Habyarimana nta na hamwe byagaragajwe ko muri uwo mutwe w’ingabo ko harimo abacanshuro, nta hagaragajwe ko hari hagamijwe komeka u Rwanda ku bindi bihugu by’amahanga. Dusanga izi manza, icyo zihuriyeho ari igikorwa cyakozwe n’uwo ari we wese mu gushyigikira igitero cy’izindi ngabo atari izemewe z’igihugu.’’

10:07: Umushinjacyaha Dushimimana Claudine yavuze ko Urukiko Rukuru rwahamije abaregwa ko ari abere ku cyaha cyo kurema umutwe, ‘nta shingiro bifite’ ahubwo binyuranyije n’itegeko.

Ati “Ubushinjacyaha bwabigaragarije ibimenyetso. Abantu bagizwe abere ku kintu kitateganyijwe n’itegeko.’’

10:07: Umushinjacyaha ku rwego rw’igihugu, Dushimimana Claudine, yasobanuye ko kuba urukiko rwarashingiye ku manza za Deo Mushayidi na Ingabire Victoire Umuhoza nta cyo urukiko rwavugishije bitari byo.

Ati “Ntitwemeranya n’ibikubiye muri ziriya manza kuko hari ibitarasobanuwe mu buryo bukwiye.’’

09:57: Umucamanza Kamere Emmanuel yasobanuye ko ingingo ya kabiri bwashingiyeho butanga ubujurire ijyanye n’ibyaha ababuranyi bagizweho abere.

Yavuze ko iyo ngingo ireba ku byaha bibiri birimo Kurema umutwe w’ingabo bitemewe no Gutera inkunga iterabwoba.

Ubushinjacyaha bwavuze ko abagizwe abere ku cyaha cyo Kurema umutwe w’ingabo bitemewe ari Rusesabagina Paul, Nsabimana Callixte alias Sankara, Nizeyimana Marc, Bizimana Cassien, Nsengimana Herman, Shabani Emmanuel, Marcel, Nshimiyimana Emmanuel, Ndagijimana Jean Chrétien, Nsanzubukire Félicien, Munyaneza Anastase, Kwitonda André na Hakizimana Théogène.

Ubushinjacyaha bwasabye ko abarimo Rusesabagina na Sankara bahamwa n’icyaha cyo kurema umutwe w’ingabo bitemewe, abandi icyenda bagahamwa n’icyaha cyo kwinjira mu mutwe w’ingabo utemewe.

Abaregwa batanu ari bo Rusesabagina, Sankara ntacyo bavuze ku mpaka zikubiye mu myanzuro yashyikirijwe urukiko.

09:38: Nsabimana Callixte Sankara yavuze ko atemeranya n’Ubushinjacyaha kuko buvuga ko agomba guhanwa nk’abasirikare bagiye ku irasaniro bakoze ibyaha.

Ati “Uyu munsi Ubushinjacyaha bwumva ko ngomba kubazwa ibyakorewe kuri terrain n’abarwanyi ba FLN, mu gihe Col Gatabazi Joseph ni we wari ushinzwe gutegura ibitero. Uwo bamujyanye i Mutobo ngo bamusubize mu buzima busanzwe. None bumva ko ari njye ukwiye kubibazwa wari muri Comores. Bakumva njye Sankara wari Umuvugizi ngomba gufungwa imyaka 25, ni ho mbonamo akarengane nyakubahwa perezida.’’

Nsabimana Callixte 'Sankara' yavuze ko bidakwiye ko aryozwa ibyaha mu gihe uwateguraga ibitero yoherejwe i Mutobo mu buzima busanzwe
Rugeyo Jean wunganira Nsabimana Callixte 'Sankara' imbere y'Inteko Iburanisha
Nsabimana Callixte ’Sankara’ na Rugeyo Jean umwunganira mu mategeko ubwo bari imbere y'abacamanza

09:38: Me Rugeyo Jean wunganira Nsabimana Callixte Sankara yavuze ko ibyavuzwe n’Ubushinjacyaha atari byo kuko ingingo bwashatse ko Urukiko Rukuru rukurikiza atari yo.

Yagize ati “Ibyo Ubushinjacyaha buheraho buvuga ko Urukiko Rukuru rwari gushingira ku ngingo ya 2, dusanga atari byo kuko isobanura termes ntabwo itanga ibihano. Gutanga ibihano biri mu ngingo ya 18 n’iya 19. Twe dusanga nta kosa urukiko rwakoze.’’

09:28: Umushinjacyaha Ruberwa Bonaventure yasobanuye ko kuba Umuyobozi w’Umutwe yatanze inkunga, agashishikariza abandi gukora iterabwoba aba yagize uruhare mu iterabwoba.

Ati “Gihanwa mu ngingo ya 19 ihana kugira uruhare mu gikorwa cy’iterabwoba.’’

“Iyo haza kubamo umuturage wacumbikiye bariya baterabwoba, akabereka nk’inzira yafatwa nk’uwagize uruhare mu gikorwa cy’iterabwoba ariko umuyobozi we bimugira uwakoze igikorwa cy’iterabwoba. Turasaba urukiko kuzasuzuma ko bakoze igikorwa cy’iterabwoba nk’abantu bari abayobozi.’’

09:23: Umushinjacyaha Ruberwa Bonaventure yasobanuye ko umuyobozi aba yakoze igikorwa cy’iterabwoba iyo yatanze inkunga, yashishikarije abandi gukora iterabwoba.

Ati “Aba yakoze iterabwoba ryuzuye, ntabwo aba yagize uruhare mu gikorwa cy’iterabwoba.’’

09:17: Umushinjacyaha Ruberwa Bonaventure yasobanuye ko ibyo Ubushinjacyaha bunenga ari uko igikorwa cy’iterabwoba cyafashwe.

Ati “Urukiko rwemeje ko Paul Rusesabagina, Nsabimana Callixte Sankara na Nizeyimana Marc batakoze igikorwa cy’iterabwoba ahubwo bagize uruhare mu bikorwa byakozwe n’abarwanyi ba MRCD/FLN.’’

Yasobanuye ko aho batemeranya n’urukiko ari ukuba ingingo ya kabiri y’itegeko ryerekeye kurwanya iterabwoba igaragaza igikorwa cy’iterabwoba mu bice bibiri.

Igice cya mbere ni uko isobanura iterabwoba nk’ikintu gishobora kwangiza umutungo w’umuntu, umutungo kamere n’ibindi byo guhatira Leta gukora cyangwa kugendera ku mahame runaka.

Uhereye ibumoso: Ubushinjacyaha muri uru rubanza buhagarariwe na Dushimimana Claudine, Habarurema Jean Pierre, Umushinjacyaha Mukuru Wungirije, Habyalimana Angelique na Ruberwa Bonaventure

  Inyito y’ibyaha byahamijwe ababuranyi

Ubushinjacyaha bwagaragaje ko butemera inyito y’icyaha cyo Gukora no kugira uruhare mu gikorwa cy’iterabwoba gikubiyemo ibyaha byarezwe Rusesabagina Paul, Nsabimana Callixte Sankara na Nizeyimana Marc.

Ubushinjacyaha bwifashishije ingingo zitandukanye zigaragaza uko uwagize uruhare mu bikorwa by’iterabwoba ahanwa yaba ari gatozi cyangwa umufatanyacyaha.

09:05: Umwe mu bavoka yasabye ko hazatekerezwa ikijyanye no gusubiza mu buzima busanzwe abahoze ari abarwanyi mu gihe bataba bahamijwe ibyaha.

09:03: Abunganira abaregera indishyi basabye ko hari abatangabuhamya bazemererwa kuza mu rukiko bakerekana ibimenyetso bifatika kugira ngo bemererwe guhabwa indishyi.

Urukiko rwabasabye gushyira umwirondoro wabo muri system n’incamake y’ubuhamya bwabo.

  Amafoto y’ababuranyi imbere y’Inteko Iburanisha

Mukandutiye Angelina yakatiwe gufungwa imyaka itanu mu Rukiko Rukuru

  Urukiko rwatangiye kugaragaza imiterere y’ubujurire

Perezida w’Inteko Iburanisha, Rukundakuvuga François Regis, yasobanuye ko ingingo zizasuzumwa zikubiye mu bintu bitanu birimo inyito y’ibyaha ababuranyi bahamijwe, ibyaha ababuranyi bagizweho abere, ibyaha abaregwa bahamijwe batemeranya n’urukiko, ibihano bahawe ubushinjacyaha butemera ndetse n’abaregera indishyi.

Nko mu bujurire bwa Nsabimana Callixte ’Sankara’, yagaragaje ko urukiko rutamugabanyirije igihano bihagije kandi yemera icyaha mu buryo budashidikanywaho, asaba kongera kukigabanyirizwa.

Sankara yahamijwe ibyaha birimo kuba mu mutwe w’iterabwoba, akatirwa igifungo cy’imyaka 20.

08:46: Perezida w’Inteko Iburanisha, Rukundakuvuga François Regis yasobanuye ko kugira ngo urubanza rwihute iburanisha rizajya riburanishwa umunsi umwe, habeho gusiba undi kugera rurangiye.

Ati “Urubanza ruzagendera ku ngingo z’ubujurire aho gusubira mu rubanza mu mizi.’’

Perezida w’Inteko Iburanisha, Rukundakuvuga François Regis

08:40: Perezida w’Inteko Iburanisha, Rukundakuvuga François Regis, yabanje gusoma amazina y’ababuranyi bose harebwa abitabye iburanisha rya none. Ababuranyi bose bitabye usibye Rusesabagina Paul utagaragaye.

08:30: Inteko Iburanisha igizwe n’abacamanza batatu n’umwanditsi w’urukiko yageze mu byicaro byayo.

08:00: Ababuranyi bose uko ari 20 bageze ku rukiko aho iburanisha ryabereye. Rusesabagina wikuye mu rubanza kuva rukiri kuburanishwa mu Rukiko Rukuru ntiyitabye nanone.

Tariki ya 17 Mutarama 2022 ni bwo uru rubanza rwatangiye kuburanishwa mu bujurire. Ni nyuma y’uko Urugereko rwihariye rw’Urukiko Rukuru ruburanisha Ibyaha Mpuzamahanga n’Ibyambukiranya Imipaka ruhamije Rusesabagina na bagenzi be ibyaha.

Rusesabagina yakatiwe igifungo cy’imyaka 25, runaha Nsabimana Callixte Sankara imyaka 20 rubahamije ibyaha bifitanye isano n’ibikorwa by’iterabwoba byakozwe n’Umutwe w’Iterabwoba wa MRCD/FLN.

Uyu mwanzuro wahise ujuririrwa n’Ubushinjacyaha bugaragaza ko butanyuzwe n’ibihano abaregwa bahawe.

Ku wa Mbere w’iki cyumweru ni bwo urubanza rwatangiye kuburanishwa mu bujurire. Kuri uwo munsi, ababuranyi bose baregwa mu rubanza baritabye ariko Rusesabagina Paul ntiyaboneka.

Ibura rye ryazamuye impaka nyinshi zishingiye ku buryo yahamagawe niba bukurikije amategeko.

Urukiko rw’Ubujurire ku wa 18 Mutarama 2022 rwanzuye ko urubanza rukomeza kuburanishwa Rusesabagina adahari kuko yanze kwitaba urukiko ku “bwende bwe.”

Ibihano byahawe Rusesabagina na bagenzi be mu Rukiko Rukuru

  Paul Rusesabagina: Imyaka 25

  Nsabimana Callixte Sankara: Imyaka 20

  Nizeyimana Marc: Imyaka 20

  Bizimana Cassien: Imyaka 20

  Matakamba Jean Berchmans: Imyaka 20

  Shaban Emmanuel: Imyaka 20

  Ntibiramira Innocent: Imyaka 20

  Byukusenge Jean Claude: Imyaka 20

  Nsabimana Jean Damascène: Imyaka 20

  Nikuzwe Siméon: Imyaka 10

  Nsanzubukire Félicien: Imyaka 5

  Munyaneza Anastase: Imyaka 5

  Hakizimana Théogène: Imyaka 5

  Nsengimana Herman: Imyaka 5

  Iyamuremye Emmanuel: Imyaka 5

  Niyirora Marcel: Imyaka 5

  Kwitonda André: Imyaka 5

  Mukandutiye Angelina: Imyaka 5

  Ntabanganyimana Joseph: Imyaka 3

  Nshimiyimana Emmanuel: Imyaka 3

  Ndagijimana Jean Chrétien: Imyaka 3

Inkuru y’iburanisha ryabanje: Urubanza rw’ubujurire ruregwamo Rusesabagina rwatangiye hagibwa impaka ku ihamagazwa rye- Uko iburanisha ryagenze (Amafoto)

Nsabimana Callixte ’Sankara’ (ibumoso) na Nsengimana Herman baganira na Rugeyo Jean ubunganira mu buryo bw'amategeko. Hari imbere y'uko urubanza rutangira kuburanishwa
Mbere y'uko iburanisha ritangira, ababuranyi baba baganira n'ababunganira mu mategeko banoza uko bari bwiregure
Nsabimana Callixte 'Sankara' (ibumoso) aganira na Nsengimana Herman wamusimbuye ku mwanya w'ubuvugizi bwa FLN ubwo yari amaze gutabwa muri yombi
Mbere yo kwinjira mu rukiko, abaregwa babanza kwamburwa amapingu

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .