00:00:00 IGIHE NETWORK KN KINYARWANDA EN ENGLISH FR FRANCAIS

Iherezo ry’ibibazo by’abaganga ba Baho International Hospital bashinjwaga urupfu rw’umurwayi

Yanditswe na Igizeneza Jean Désiré
Kuya 15 Mutarama 2023 saa 09:55
Yasuwe :

Ibirego byashinjwaga abaganga babiri ba Baho International Hospital by’uburangare mu rupfu rwa Kamanzi Ngwinondebe Chantal byageze ku iherezo, nyuma y’uko Urukiko rw’Ibanze rwa Kicukiro rwemeje ko nta bimenyetso simusiga bibigaragaza.

Ni ibintu ubuyobozi bwa BIH buvuga ko bihura neza n’igenzura bwikoreye, na raporo yagaragajwe nyuma yo gupima umubiri (autopsie).

Kamanzi wari ufite imyaka 54 yaganye BIH ku wa 7 Nzeri 2021, afite agapira ku nkondo y’umura kamufashaga kuringaniza urubyaro yifuza kugakuramo, apfa nyuma y’igihe gito agakuwemo.

Ku wa 26 Ukwakira 2021nibwo Urukiko rw’Ibanze rwa Kicukiro rwatangiye kuburanisha urubanza rwaregwagamo Mugemanshuro Alfred uzobereye mu gutera ikinya na Dr Ntahonkiriye Gaspard, inzobere mu by’indwara z’abagore, bashinjwa icyaha cy’ubwicanyi budaturutse ku bushake.

Uretse aba baganga, Ibitaro bya Baho na byo byashinjwaga kubura ibikoresho bimwe na bimwe birimo icyuma gitanga umwuka n’ibindi, byaba byaratumye umurwayi adatabarwa mu maguru mashya.

Nyuma y’urupfu rwa Kamanzi, Minisiteri y’Ubuzima na yo yahise itangiza iperereza ku mikorere y’ibyo bitaro. Hagenzuwe ingingo zirimo imitangire ya serivisi, ubushobozi bw’abakozi, harebwa by’umwihariko abaganga niba bafite ibyangombwa bibemerera gukora umwuga n’ibindi.

Urukiko rwemeje ko ikirego cy’ubushinjacyaha nta ishingiro gifite, ko Mugemanshuro Alfred na Dr Ntahonkiriye Gaspard badahamwa n’icyaha cy’ubwicanyi budaturutse kubushake.

Rwemeje kandi ko ikirego cy’indishyi nta shingiro gifite, ndetse ko Dr Mugemanshuro Alfred na Dr Ntahonkiriye Gaspard n’ibitaro bya Baho nta ndishyi bagomba gutanga.

Urukiko rw’ibanze rwa Kicukiro kandi rwavuze ko ingwate y’amagarama yatanzwe n’abaregera indishyi ihwanye n’ibyakozwe mu rubanza.

Ubuyobozi bwishimiye imikirize y’urubanza

Ubuyobozi bwa BIH bwatangaje ko umunsi biriya byago biba hari hateganyijwe kubagwa abantu batanu, nyakwigendera ari uwa kane, ndetse ko abamubanjirije babazwe neza, nta kibazo kibayeho. Uwa gatanu we kumubaga byahise bisubikwa.

Buti "Byumvikana ko nta bikoresho byashoboraga kubura ku muntu wa kane kandi hari n’uwa gatanu wagombaga gukorerwa nubwo atabazwe kubera ikibazo cyari kimaze kuba."

Mu mikirize y’urubanza, Urukiko ngo rwasanze ubushinjacyaha butagaragaza ku buryo budashidikanywaho ko uburyo bwo gukuramo agapira bwakoreshejwe butemewe, cyane ko abahanga babajijwe bagaragaje ko ubwo buryo bwemewe.

Ibi bitaro byishimiye ko ubutabera bwabonetse, mu gihe hari abantu bihutiye gufata ibyemezo no gufata uruhande muri iki kibazo mbere y’uko iperereza rigaragaza ukuri.

Ni ibintu ibitaro bivuga ko "byaduteje ibibazo bikomeye byaturutse mu konona izina ryacu."

Byashimiye inzego zitandukanye zagize uruhare mu kugira ngo ubutabera buboneke, hakagaragazwa ukuri "abenshi birengagizaga".

Inyubako ikoreramo Baho International Hospital

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .