00:00:00 IGIHE NETWORK KN KINYARWANDA EN ENGLISH FR FRANCAIS

Ibyaranze umunsi wa mbere w’iburanisha ry’ubujurire mu rubanza rwa Rusesabagina na bagenzi be

Yanditswe na Israel Ishimwe
Kuya 17 January 2022 saa 04:09
Yasuwe :

Urukiko rw’Ubujurire kuri uyu wa Mbere, tariki ya 17 Mutarama 2022, rwatangiye kuburanisha urubanza ruregwamo Paul Rusesabagina n’abandi 20 nyuma y’iminsi 119 bahamijwe uruhare mu byaha by’iterabwoba.

Tariki 20 Nzeri 2021 ni bwo Urugereko Rwihariye rw’Urukiko Rukuru Ruburanisha Ibyaha Mpuzamahanga n’Ibyambukiranya Imipaka rwatangaje umwanzuro ku rubanza ruregwamo Rusesabagina washinze Impuzamashyaka ya MRCD na bagenzi be.

Rusesabagina yahanishijwe gufungwa imyaka 25, Nsabimana Callixte ‘Sankara’ ahabwa 20. Uwahawe igifungo gito yahanishijwe imyaka itatu.

Nyuma y’uyu mwanzuro, Ubushinjacyaha bwahise buwujuririra bwerekana ko butanyuzwe n’ibihano abakurikiranywe bahawe bitewe n’uburemere bw’ibyaha bahamijwe. Ibi ni na ko byagenze ku baburanyi kuko muri bo 13 bajuririye umwanzuro w’Urukiko Rukuru.

Kuri uyu munsi, ni bwo hatangiye kumvwa ubujurire muri uru rubanza. Muri iyi nkuru tugiye kwitsa gato ku ngingo z’ingenzi mu byaranze iburanisha ryamaze isaha n’iminota 34 mbere yo gusubikwa.

Ababuranyi 20 ni bo bitabye urukiko, Rusesabagina ntiyahageze. Uru rubanza ruburanishwa n’Urukiko rw’Ubujurire, rugizwe n’Inteko y’abacamanza batatu n’umwanditsi.

  Sankara yahinduye umwavoka

Kuva Nsabimana Callixte ‘Sankara’ yatabwa muri yombi yahise yunganirwa na Me Nkundabarashi Moïse.

Ni na we wamwunganiye mu maburana yose kugeza Urukiko Rukuru rufashe umwanzuro wa nyuma, ruhanisha Sankara igifungo cy’imyaka 20. Yahamijwe ibyaha byo kuba mu mutwe w’iterabwoba, gukora no kugira uruhare mu mutwe w’iterabwoba, gupfobya Jenoside, guhakana Jenoside n’icyaha cyo guhabwa ku bw’uburiganya cyangwa gukora no gukoresha inyandiko mpimbano n’impapuro zitangwa n’inzego zabigenewe.

Kuri uyu munsi, yagaragaye mu rukiko yunganiwe na Me Jean Rugeyo usanzwe wunganira Nsengimana Herman.

Aba bagabo icyo bahuriyeho ni uko bose babaye abavugizi ba FLN mbere yo gutabwa muri yombi.

Me Nkundabarashi Moïse yavuye muri uru rubanza nyuma y’uko ku wa 10 Ukuboza 2021 yatangiye inshingano nshya zo kuyobora Urugaga rw’abavoka mu Rwanda. Yasimbuye Kavaruganda Julien wari umaze imyaka itandatu aruyoboye.

Me Nkundabarashi Moïse yabwiye IGIHE ko yahisemo kudakomeza kunganira Sankara kubera inshingano nyinshi.

Yagize ati “Kubera ikibazo cy’umwanya n’izindi nshingano ntabwo byankundira ko nkomeza kuboneka nk’uko nabonekaga mbere. Byari byiza ko agira undi muntu umwunganira kandi nta kibazo kirimo kuko n’uriya umwunganira [Rugeyo Jean] ni umuntu usanzwe muri dosiye. Byabaye ngombwa ko aba ari we umwunganira. Nta kibazo kibirimo.’’

Nsabimana Callixte ‘Sankara’ (ibumoso) aganira na Nsengimana Herman wamusimbuye ku mwanya w'Umuvugizi wa FLN. Aba bombi bunganiwe na Me Jean Rugeyo
Me Jean Rugeyo yari asanzwe yunganira Nsengimana Herman

  Ikoranabuhanga riracyakoreshwa, urubanza ruri kwerekanwa live

Nk’uko byagenze ubwo urubanza rwatangiraga kuburanishwa nyuma yo guhuzwa, ruri kwerekanwa binyuze ku mbuga nkoranyambaga zitandukanye no kuri YouTube.

Uyu munsi rwanyujijwe kuri YouTube ya RBA n’izindi mbuga nkoranyambaga zitandukanye nk’ikimenyetso cyo kwerekana ko ruciye mu mucyo.

Ishusho ya Me Rugeyo Jean imbere y'inteko iburanisha. Iburanisha ryanyujijwe ku mbuga nkoranyambaga zitandukanye no kuri YouTube Channel ya RBA

  Rusesabagina yanze kwitaba Urukiko rw’Ubujurire

Mu iburanisha rya none, igice kinini cyaryo cyihariwe n’impaka zakuruwe no kuba Rusesabagina Paul atitabye urukiko.

Ubushinjacyaha bwagaragaje ko uyu mugabo ufite ubwenegihugu bw’u Bubiligi yahamagawe byemewe n’amategeko ariko yanga gusinya ku nyandiko y’ihamagazwa.

Umushinjacyaha Habarurema Jean Pierre yavuze yeretse urukiko bimwe mu bimenyetso bishimangira ko Paul Rusesabagina yahamagajwe mu buryo bukurikije amategeko.

Yifashishije ingingo ya 128 y’Itegeko rigenga imiburanishirize y’imanza z’inshinjabyaha, agaragariza urukiko ko iyo umuburanyi yamenyeshejwe iby’iburanisha agahitamo kutitaba, urubanza rukomeza kuburanishwa.

Ingingo igaruka ku buryo ihamagazwa rya Rusesabagina ryakozwe, yatanzweho ibitekerezo n’abunganira ababuranyi bose. Bamwe bagaragaje ko ihamagazwa ryakozwe byemewe n’amategeko, abandi basaba urukiko gusuzumana iyo ngingo ubushishozi.

Paul Rusesabagina yakatiwe gufungwa imyaka 25. Mu iburanisha rya none ntiyigeze yitaba urukiko

Me Murangwa Faustin uhagarariye bamwe mu baregera indishyi barimo Nsengiyumva Vincent wari Gitifu wa Nyabimata ubwo FLN yagabaga ibitero, na we yunze mu ry’Ubushinjacyaha, avuga ko urubanza rwakomeza nubwo Paul Rusesabagina atitabye urukiko.

Umucamanza Ruberwa Bonaventure yavuze ko ibiteganywa n’itegeko byose byubahirijwe kugira ngo abaregwa bahamagazwe.

Yasobanuye ko ibiteganywa n’Ingingo ya 98 y’Itegeko rigena imiburanishirize y’imanza nshinjabyaha igena ko ihamagara rikorwa hakoreshejwe ikoranabuhanga byubahirijwe.

Ati “Igihe cyose byakozwe muri ubu buryo, ihamagara riba ryakurikije amategeko.’’

Yasobanuye ko ibyo byakurikijwe ndetse Gereza ya Nyarugenge iyishyikiriza abaregwa bayisinyaho. Abandi bose 20 bashyizeho umukono ariko Rusesabagina arabyanga. Icyo gihe gereza yamenyesheje Urukiko rw’Ubujurire ko yabyanze.

Me Rugeyo Jean yavuze ko ibijyanye no guhamagara ababuranyi hakoreshejwe ikoranabuhanga hari uburyo bikorwamo.

Yasobanuye ko ubuyobozi bwa gereza nta bubasha bufite bwo kwemeza ko uregwa atitabiriye iburanisha. Yahise asaba ko iburanisha ryasubikwa iyo ngingo igasuzumwa neza.

Ati “Ntaho bigaragara ko gereza ari yo imenyesha abo icumbikiye. Raporo z’ubuyobozi bwa gereza zaba zifite akahe gaciro mu bijyanye no kumenyesha abaregwa? Ubuyobozi bwa gereza nta bubasha bufite bwo kwemeza ko uregwa yanze kwitabira iburanisha. Turasaba ko iburanisha ry’uyu munsi risubikwa, uregwa Rusesabagina Paul agahamagazwa byemewe n’amategeko. Kwitaba kw’ababuranyi bamwe, ntibivanaho uburenganira bw’abandi.’’

Ubushinjacyaha kandi bwagaragaje ko ubwo ababuranyi biteguraga kwitaba urukiko nk’uko bigenda muri iyi minsi babanza gupimwa COVID-19 ariko Rusesabagina yanze kwipimisha.

Umushinjacyaha Habarurema Jean Pierre yabwiye Urukiko rw’Ubujurire ko no mu Rukuru Rusesabagina yikuye mu rubanza ku bushake kugera aho urubanza rwapfundikiwe adahari.

Yakomeje ati “Ibyo byose bikomeza kwerekana ko kutaza kwa Rusesabagina atari uko atamenyeshejwe mu buryo bukurikije amategeko, ahubwo ari umugambi wo kutitabira urubanza ku bushake bwe akomeje. No ku rwego rwa mbere imyitwarire imeze itya ni yo yamuranze, kuko urubanza rwakomeje kandi rupfundikirwa adahari.”

Nyuma yo kumva impande zose, Perezida w’Inteko Iburanisha, Rukundakuvuga François Regis, yatangaje ko umwanzuro ku mpaka zazamuwe no kuba Rusesabagina yaratumijwe byemewe n’amategeko cyangwa niba ashobora kongera guhamagazwa uzatangazwa ku wa Kabiri, tariki ya 18 Mutarama 2022 saa Kumi z’umugoroba.

  Amabwiriza ya COVID-19 yubahirijwe

Buri wese bitabiriye iburanisha rya none yabanje kwerekana ko yikingije COVID-19 kandi ko afite ibisubizo bitarengeje amasaha 24 byerekana ko atarwaye iki cyorezo.

Mbere yo kwinjira mu cyumba cy’iburanisha ku Kacyiru, buri wese yabanje gukarabywa intoki hifashishijwe umuti wabugenewe ‘hand sanitizer’.

Izi ngamba zanubahirijwe imbere mu rukiko kuko abantu bicajwe bahanye intera hagati yabo.

Abahawe ijambo mbere yo kuvuga cyangwa gusinya ku nyandiko z’iburanisha babanzaga gukaraba intoki mu kwirinda kwanduzanya. Iki cyemezo kigamije gukomeza kwirinda ikwirakwira ry’icyorezo cya COVID-19.

Uyu muti ni wo wifashishwaga mu gukarabya abinjira mu rukiko
Ababuranyi bari bicaye bahanye intera nk'uburyo bwo gukurikiza amabwiriza yo kwirinda COVID-19
Mukandutiye Angelina akaraba 'hand sanitizer' mbere yo gusinya ku nyandiko igaragaza ko yitabiriye iburanisha
Uhereye ibumoso: Inteko iburanisha igizwe na Gakwaya Justin, Perezida wayo, Rukundakuvuga François Regis na Kamere Emmanuel
Abaregwa ubwo binjiraga mu modoka itwara imfungwa n'abagororwa nyuma y'iburanisha

Amafoto: Nezerwa Salomon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .