00:00:00 IGIHE NETWORK KN KINYARWANDA EN ENGLISH FR FRANCAIS

Huye: Abakekwaho kwica umumotari baburanishirijwe ahabereye icyaha

Yanditswe na Prudence Kwizera
Kuya 30 Ugushyingo 2022 saa 11:01
Yasuwe :

Abagabo babiri bo mu Murenge wa Ruhashya mu Karere ka Huye bakekwaho kwica umumotari baburanishirijwe mu ruhame aho icyaha cyabereye.

Abo ni Nyandwi Viateur na Hakizimana Jean Claude bakomoka mu Kagari ka Muhororo mu Murenge Ruhashya mu Karere ka Huye, bakurikiranyweho icyaha cyo kwica umumotari witwa Ishimwe Zaburoni bakamwambura moto n’ibindi yari afite.

Ku wa 6 Ugushyingo 2022 umurambo w’uwo mumotari wabonetse mu ishyamba ry’Ikigo gishinzwe Iterambere ry’Ubuhinzi n’Ubworozi, RAB, riri mu Mudugudu wa Rubona mu Kagari ka Kiruhura, ahagana saa Yine zo mu gitondo.

Uwo mu motari w’imyaka 23 y’amavuko akomoka mu Mudugudu w’Igerero mu Kagari ka Ruhashya mu Murenge wa Ruhashya mu Karere ka Huye.

Kuri uyu wa Kabiri tariki ya 29 Ugushyingo 2022 Urukiko Rwisumbuye rwa Huye rwaburanishirije abo bagabo aho icyaha cyabereye mu Murenge wa Ruhashya.

Ubushinjacyaha bwagaragaje ko Nyandwi Viateur na Hakizimana Jean Claude, umugambi wo kwica Ishimwe Zaburoni bawucuze tariki ya 3 Ugushyingo 2022 bamubwira ko bafite umuzigo ngo bazahurire mu mudugudu wa Rubona mu Kagari ka Kiruhura mu Murenge wa Rusatira, bagamije kumwiba moto ye.

Bwavuze ko Nyandwi Viateur akimara gufatwa yemeye ko bishe Ishimwe Zaburoni kugira ngo atazatanga amakuru kuko yari azi Hakizimana Jean Claude.

Ubushinjacyaha bwasobanuye ko ku wa 4 Ugushyingo 2022 mu masaha y’ijoro aribwo abo bagabo bishe Ishimwe Zaburoni bamukubise imihini nk’uko raporo ya muganga yabigaragaje.

Nyuma yo kumwica bamwibye ibyo yari afite birimo moto, ibyangombwa n’imyambaro ndetse n’amafaranga.

Ubushinjacyaha bwavuze ko mu iperereza bwakoze bwasanze Hakizimana Jean Claude yarahaye Nyandwi Viateur ibihumbi 40 Frw mu bihumbi 100 Frw yari yamwemereye kugira ngo amufashe kwiba moto ya Ishimwe Zaburoni.

Abaregwa bahawe ijambo, bemera ko icyaha cyo kwica Ishimwe Zaburoni bagikoze banasaba imbazi ngo bagabanyirizwe ibuhano.

Bavuga ko bamwishe nijoro hagati ya saa Moya na saa Mbiri ku wa 4 Ugushyingo 2022, gusa bitana ba mwana ku wacuze uwo mugambi w’ubwicanyi.

Hakizimana Jean Claude yemera ko nyuma yo kwica Ishimwe Zaburoni, yafashe moto ye ayijyana i Kigali kugira ngo ayigurishe naho Nyandwi Viateur afata umurambo ajya kuwuhamba mu ishyamba.

Bamaze kwiregura ku byo bashinjwa, ubushinjacyaha bwabasabiye igihano cyo gufungwa burundu kubera icyaha bakoze gikomeye cyo kwica umuntu babigambiriye.

Nyuma yo kumva impande zombi, Urukiko Rwisumbuye rwa Huye rwavuze ko umwanzuro warwo uzasomwa tariki ya 7 Ukuboza 2022 saa Kumi z’Igicamunsi.

Bamwe mu baturage bari bitabiriye iburanisha bashimye icyemezo cy’urukiko cyo kuburanishiriza urubanza aho icyaha cyabereye kuko bitanga isomo kuri bo ryo kwirinda ibyaha.

Inkuru wasoma : https://mobile.igihe.com/amakuru/u-rwanda/article/huye-bakurikiranyweho-kwica-umumotari-bakamutaba-ishyamba

Aba bagabo babiri bakekwaho kwica umumotari baburanishirijwe ahabereye icyaha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .