00:00:00 IGIHE NETWORK KN KINYARWANDA EN ENGLISH FR FRANCAIS

Umutangabuhamya yasobanuye uko yari agiye kwicirwa hafi yo kwa Kabuga

Yanditswe na IGIHE
Kuya 6 Ukwakira 2022 saa 02:47
Yasuwe :

Ku munsi wa kabiri wo kumva abatangabuhamya mu rubanza Kabuga Félicien aregwamo ibyaha bya Jenoside, humviswe umutangabuhamya wagarutse ku buryo yarokotse Interahamwe zamutegeye hafi y’inyubako y’uyu mugabo, wari umushoramari ukomeye.

Ni urubanza rurimo kuburanishwa n’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), i La Haye mu Buholandi.

Ku munsi wa mbere hagarutswe ku buryo Kabuga yabaye umwe mu bakoze icengezamatwara ryo gushishikariza abahutu gukora Jenoside, abinyujije kuri Radio RTLM yari abereye perezida.

Ku munsi wa kabiri, umutangabuhamya wari ugezweho yasobanuye uburyo yatabawe n’Interahamwe biganye mu mashuri yisumbuye. Ni umugore wavuze ko muri Jenoside yakoraga muri Minisiteri y’Iganzamakuru, akaba yari atuye ku Kacyiru mu Mujyi wa Kigali.

Nyuma y’ihanurwa ry’indege y’uwari Perezida w’u Rwanda, Juvenal Habyarimana, yagumye aho yari atuye igihe gito, ariko kubera ubwoba bw’uko yashoboraga kwicwa, ahitamo guhungira muri Hotel des Mille Collines.

Hagati aho ngo yari afite akaradiyo kamufashaga gukurikirana no kumenya ibibera mu gihugu, ndetse yajyaga yumva uburyo radio RTLM yamamazaga ubwicanyi.

Mu rugendo rwe ava ku Kacyiru ajya muri Mille Collines, ni ho yahuriye n’ingorane zikomeye kuko byamutwaye umunsi wose kugira ngo agereyo. Yahagurutse saa mbili z’igitondo ahagera saa tanu z’ijoro.

Perezida w’urukiko yamubajije aho bariyeri yamukomereye bigatuma amara umwanya munini mu nzira, avuga ko yari ku Muhima hafi y’inzu ya Kabuga.

Yavuze ko akimara kuhagera, Interahamwe zahise zimusamira hejuru zitangira kumukurura ngo zimwinjize aho zari ziciye abandi benshi, n’imirambo igihari. Aho ngo ni mu nzu yacuruzaga ibikoresho bya Yahama yari ku murongo umwe n’iya Kabuga Felicien.

Yavuze ko Interahamwe yitwa Gatorano bari bariganye i Kibogora muri Tronc Commun yamumenye ikamuvuganira bigatuma bamureka. Ntiyibuka itariki ibyo byabereye icyakora ngo imvura yari ikigwa ari nyinshi.

Bamaze kumureka ngo yakomeje urugendo rwe agera muri Mille Collines, aho yasanze abandi bari bahahungiye. Yaje kuhava yerekeza muri zone Inkotanyi zari zarafashe.

Icyo gihe ngo yanyuze kuri Paruwasi Gatolika ya Gikondo ajya i Kabuga, ahamara igihe kugeza ubwo Kigali yabohowe yose, buri muntu agasubira aho yari atuye.

Nyuma yaje gusubira mu kazi mbere y’uko hashyirwaho Guverinoma y’Ubumwe ku wa 19 Nyakanga 1994.

Emmanuel Altit, umwavoka wunganira Kabuga, yabajije umutangabuhamya icyatumye ahunga, asubiza ko yatinyaga Interahamwe kubera ko na mbere hose zitari zimwishimiye bitewe n’akazi yakoraga. Ngo zavugaga ko Minisiteri y’Itangazamakuru ikoreshwa n’Inkotanyi.

Abajijwe icyatumaga atinya Interahamwe, yavuze ko batari abantu ahubwo zari inyamaswa.

Ati "Interahamwe ntabwo bari abantu mu by’ukuri, byari ibisimba. Umuntu wese ufite umutima muzima ntiyari kubura kuzitinya. Twari twarabonye ibikorwa bakoreye abatutsi mbere."

Yongeyeho ko umuntu wese wabaga utavuga rumwe na MRND zamuhigaga.

Ati "Nari mfite ubwoba ko umunsi umwe bashobora kungabaho igitero. Muri Jenoside ukuntu bitwaraga batwara ibyo basahuye ugasanga umuntu w’umugabo atwaye ukuguru kw’inka cyangwa umutwe w’umuntu bishe."

Me Altit yavuze ko afite byinshi ashaka kuzakomeza kubaza umutangabuhamya mu iburanisha rizakurikiraho.

Hakomeje kumvwa ibimenyetso bishinja Kabuga Felicien ukurikiranyweho ibyaha bya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .