00:00:00 IGIHE NETWORK KN KINYARWANDA EN ENGLISH FR FRANCAIS

Hikanzwe igisasu mu rubanza rwa Laurent Bucyibaruta i Paris

Yanditswe na Rabbi Malo Umucunguzi
Kuya 29 June 2022 saa 02:51
Yasuwe :

Inzego z’umutekano mu Bufaransa zikanze igisasu mu ngoro y’ubutabera irimo kuburanishirizwamo abarimo Laurent Bucyibaruta wabaye Perefe wa Gikongoro, abari mu rukiko bose basohorwa igitaraganya.

Umunyamategeko Richard Gisagara uri mu rukiko i Paris, yabwiye IGIHE ko icyabaye “kwari ukwikanga igisasu. Nta kintu cyaturitse."

Uko kwikanga kwanabereye mu kindi cyumba gitandukanye n’icyo Bucyibaruta arimo kuburaniramo, ariko biba ngombwa ko bagendera hamwe. Kuri Cour d’Assises de Paris ni ahantu hagari cyane.

Abantu bahise basohoka, nyuma yo kugenzura neza bongeye kwinjira, urubanza rurakomeza.

Kuri uru rukiko umutekano wakajijwe bihambaye, kubera ko kuri uyu wa Kabiri haza gusomerwa urubanza rw’abantu 20 rw’abaregwa iterabwoba, bakekwaho uruhare mu bitero byagabwe mu Bufaransa ku wa 13 Ugushyingo 2015.

Ibyo bitero byagabwe i Paris na Saint-Denis bihitana abantu 131, abagera kuri 350 barakomereka. Nibyo bitero byahitanye abantu benshi icyarimwe mu mateka ya vuba mu Bufaransa, biza no kwigambwa n’umutwe wa Islamic State.

Biteganyijwe ko uru rubanza rw’ibitero by’i Paris rusomwa guhera saa kumi n’imwe, nyuma y’amezi icumi ruburanwa kuko rwatangiye ku wa 8 Nzeri 2021.

Urubanza rwa Bucyibaruta rurakomeje

Bucyibaruta wabaye Perefe wa Gikongoro, akomeje kuburanishwa ku byaha birimo icyaha cya Jenoside, aho aregwauruhare mu iyicwa ry’Abatutsi babarirwaga mu bihumbi bari bahungiye ku ishuri rya Murambi, bishwe n’Interahamwe ku wa 21 Mata 1994.

Anaregwa uruhare mu kwica abanyeshuri b’Abatutsi bagera muri 90 bigaga muri Ecole Marie Merci de Kibeho, ku wa 7 Gicurasi 1994.

Kuri uyu wa Kabiri imbere ya Cour d’assises de Paris, urukiko rwagombaga kumva abatangabuhamya barimo Général Ndindiliyimana, watanzwe n’uregwa.

Ni nyuma yo kumva ubuhamya bw’abarimo Dismas Nsengiyaremye wabaye Minisitiri w’Intebe na Général Emmanuel Habyalimana wabaye Minisitiri w’Ingabo.

Abanyamategeko bahagarariye abarokotse Jenoside bagize umwanya wo kumubaza ku buhamya bwe, Tabazwa n’ubushinjacyaha, hakaza gusoza abavoka ba Bucyibaruta.

Laurent Bucyibaruta akurikiranyweho ibyaha bya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .