00:00:00 IGIHE NETWORK KN KINYARWANDA EN ENGLISH FR FRANCAIS

Hagiye kumvwa abandi batangabuhamya mu rubanza rwa Kabuga

Yanditswe na IGIHE
Kuya 16 Mutarama 2023 saa 03:47
Yasuwe :

Urubanza rwa Kabuga Félicien rugiye gukomeza humvwa abatangabuhamya bafite icyo bazi ku uruhare rw’uyu mugabo muri Jenoside yakorewe Abatutsi mu 1994.

Mu mpera za 2022 nibwo abacamanza b’Urwego Mpuzamahanga rwashyiriweho Gukora Imirimo y’Insigarira y’Inkiko Mpanabyaha, IRMCT bahagaritse imirimo yo kuburanisha uru rubanza kubera ibiruhuko.

Biteganyijwe ko ruzasubukurwa ku wa Kabiri tariki 17 Mutarama mu 2023 humvwa abatangabuhamya.

Mu iburanisha riheruka mu Ukuboza 2022, humviswe abatangabuhamya babiri barimo n’umugore uvuga ko yahoze ari umuturanyi wa Kabuga ku Kimironko mu Mujyi wa Kigali.

Ubuhamya aba bantu uko ari babiri batanze bwagarutse cyane ku bikorwa by’interahamwe za Kimironko ziswe iza Kabuga.

Uyu mutangabuhamya w’umugore wahawe izina rya KAB 086 ku mpamvu z’umutekano we, yavuze ko yari umuturanyi wa hafi wo kwa Kabuga.

Yabajijwe n’Urukiko uburyo avuga ko yabonye Kabuga yakira Interahamwe iwe mu rugo kandi kwa Kabuga hari hazengurutswe n’igipangu.

Uyu mutungabuhamya yavuze ko yabonye Kabuga ubwo yakiraga izi nterahamwe aziha ikaze iwe ubwo zari zivuye muri mitingi ya politiki y’ishyaka MRND. Uyu mutangabuhamya we ngo icyo gihe yari ari mu muhanda.

Muri uru rubanza kandi humviswe ubuhamya bw’umugabo uvuga ko yari umufundi ndetse yakoze n’iyi mirimo mu rugo rwa Kabuga.

Uyu mutangabuhamya wahawe izina rya KAB 072, ubuhamya bwe yabutanze ari i Arusha muri Tanzania hifashishijwe uburyo bw’ikoranabuhanga nk’uko tubikesha Ijwi ry’Amerika

Uyu mugabo yavuze ko mu rugo rwa Kabuga yari ahazi neza kuko yari umuturanyi we kandi akaba yarajyaga akorayo imirimo y’ubufundi cyane cyane ibijyanye no gusana imiyoboro y’amazi.

KAB 072 yabwiye urukiko ko mu 1992 yiboneye n’amaso ye Interahamwe ziva mu rugo rwa Kabuga ziri mu makamyo ye, ndetse nyuma akaza kumva amakuru ko zagiye kwitoreza mu ishyamba rya Gishwati.

Uyu mutangabuhamya yabwiye urukiko ko yabonaga kenshi Interahamwe zitoreza kwa Kabuga, aho zimwe zahirirwaga zikanaharara, mu gihe izindi zo zatahaga zikagaruka mu gitondo. Aho ngo hari inzu nini interahamwe n’abakozi babagamo.

Yabwiye Inteko iburanisha ko mu gihe cya Jenoside mu rugo rwa Kabuga hari inzu yari irimo irahazamurwa byavugwaga ko ariyo izajya ikoreramo Radiyo ya RTLM. Yavuze ko aya makuru yayamenye kuko byari byanditseho ku gishushanyo mbonera cyayo, ndetse no ku ruhushya rwo kubaka.

Muri Nzeri mu 2022 nibwo Kabuga wari umwe mu banyemari bakomeye mu Rwanda mu gihe cya Jenoside yakorewe Abatutsi yatangiye kuburanishwa mu mizi i La Haye mu Buholandi.

Kabuga ashinjwa ibyaha birimo icyaha cya jenoside, guhamagarira abantu mu buryo butaziguye kandi mu ruhame gukora jenoside, ubwumvikane bugamije gukora jenoside, itsembatsemba, itoteza n’ubwicanyi nk’ibyaha byibasiye inyokomuntu, byakozwe mu rwego rwa jenoside yakorewe Abatutsi, mu Rwanda, mu mwaka wa 1994.

Kabuga Félicien agiye gusubira imbere y’ubutabera, humvwa abafite icyo bazi ku ruhare rwe muri Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .