00:00:00 IGIHE NETWORK KN KINYARWANDA EN ENGLISH FR FRANCAIS

Hagiye gutangazwa umwanzuro ku rubanza rwa Ntaganzwa wajuririye igifungo cya burundu

Yanditswe na Ntabareshya Jean de Dieu
Kuya 4 Mutarama 2023 saa 04:06
Yasuwe :

Ntaganzwa Ladsilas wahamijwe ibyaha bya Jenoside yakorewe Abatutsi mu 1994 agakatirwa gufungwa burundu azasomerwa umwanzuro w’urukiko rw’ubujurire muri Gashyantare 2023.

Mu 2020 nibwo Urukiko Rukuru ruburanisha ibyaha mpuzamahanga n’ibyambukiranya imipaka urugereko rwa Nyanza rwakatiye Ntaganzwa Ladislas wahamijwe ibyaha bya Jenoside yakorewe Abatutsi mu yahoze ari Komine Nyakizu muri Perefegitura ya Butare, igifungo cya burundu.

Iki gihano yagikatiwe nyuma yo gutesha agaciro icyo yari yahawe n’Inkiko Gacaca cyo gufungwa burundu y’umwihariko kubera uruhare rwe yagize mu kwica Abatutsi.

Nyuma yo gukatirwa yahise ajurira iki cyemezo ndetse mu Ukuboza 2022 urukiko rw’ubujurire rwamuburanishije humvwa impamvu ze z’ubujurire n’icyo ubushinjacyaha buzivugaho.

Mu iburanisha ryo ku wa kuwa 22 Ukuboza 2022 Ntaganzwa yahawe umwanya wo kwisobanura imbere y’inteko iburanisha urubanza rwe mu bujurire agaruka ku mpamvu zamuteye kujurira.

Umwanzuro wa Ntaganzwa wo ku wa 21 Kamena 2020 wagaragaje ko anenga ko yaciriwe urubanza hashingiwe ku batangabuhamya bivuguruzaga, bavuga ibyo babwiwe cyangwa bibagiwe no gushingira ku nyandiko z’ubuyobozi zitari gushingirwaho we yiyandikiye ubwo yari Burugumesitiri.

Ibi ni nabyo yaburanye asobanura agaragaza ko mu mvugo zagiye zikoreshwa n’abatangabuhamya mu rukiko hari aho zinyurana cyangwa abandi bagasobanura ibintu uko bitari.

Nko ku kijyanye no kuba yarajyanye abajandarume kuri Paruwasi ya Cyahinda abavanye i Butare ku wa 15 Mata 1994 ari nabo barimbuye Abatutsi bari bahahungiye bafatanyije n’impunzi z’Abarundi, avuga ko atari agamije kwica Abatutsi ahubwo byari mu rwego rwo kubacungira umutekano.

Ashingiye ku buhamya bwatanzwe n’umutangabuhamya DND yavuze ko uyu watanze ubuhamya atari kubasha kumenya ibyabereye i Cyahinda cyane ko we yari yasigaye Nyagisozi.

Ati “Gusaba abajandarume no kubajyana i Cyahinda nta cyaha kirimo, ariko uyu mutangabuhamya ntazi ibyabereyeyo kuko we yivugiye ko atageze aho bari bagiye.”

Ikindi yagaragaje ni ubuhamya bwatanzwe ku bavugaga ko ubwo bamubonaga kuri Paruwasi ya Cyahinda hari abavuze ko yari yambaye imyenda ya gisirikare abandi bakavuga ko yari yambaye isanzwe bityo ko bitari gushoboka ko bamwibeshyaho kandi bari bamuzi neza.

Yaburanye agaragaza ko urukiko rutigeze rusesengura neza amakuru rwahawe n’abatangabuhamya bamushinja kandi ibyaha yahamijwe bikaba byari bishingiye ku buhamya batanze.

Ntaganzwa yahamijwe uruhare muri Jenoside yakorewe Abatutsi mu 1994, ibyaha ashinjwa ko yakoreye muri komini Nyakizu yayoboraga aho Ubushinjacyaha bugaragaza ko yakoze ibyaha bya Jenoside, gushishikariza gukora Jenoside, ubwicanyi, gusambanya abagore ku ngufu n’ibindi. By’umwihariko ashinjwa kwica abatutsi bagera ku bihumbi 20 muri Komine yari ayoboye mu gihe cya Jenoside.

Ubushinjacyaha buhawe umwanya wo kugira icyo buvuga ku bwisobanure bwa Ntaganzwa Ladislas wakatiwe gufungwa burundu, Me Nkusi Faustin wari ubuhagarariye yavuze ko uko Ntaganzwa yaba yari yambaye kose uwo munsi bidafite agaciro gakomeye, ku buryo abatangabuhamya baba bakibyibuka nyuma y’imyaka 27 ishize, cyane ko bamubonye mu bihe bitoroshye aho kwibuka imyambaro bitari kuza mu bintu by’ingenzi umuntu yazirikana.

Nkusi yakomeje avuga ko icy’ingenzi ari ibihamya bihagije bishimangira ko Ntaganzwa yagaragaye ahabereye ubwicanyi, harimo no kuba na we ubwe yiyemerera ko yari ahari igihe ubwicanyi bwakorwaga.

Nkusi anyomoza uko kwiregura wavuze ko amasasu yarashwe ku munsi wa mbere yabaye nk’impanuka, yibajije uburyo amasasu yavuze ku bw’impanuka yishe imbaga y’Abatutsi n’uburyo Interahamwe zafashafa abajandarume gucungira abatutsi umutekano.

Ati “Uretse n’ibyo, ntihari Abajandarume gusa. Interahamwe n’impunzi z’Abarundi bitwaje intwaro gakondo bari kumwe na bo, babafasha mu bwicanyi. Abo na bo se barimo kubungabunga umutekano w’abaturage?”

Nkusi yagarutse ku mutangabuhamya wavuze ku magambo Ntaganzwa yabwiye Abatutsi bari kuri Paruwasi ya Cyahinda asa n’ubishima hejuru muri icyo gihe avuga ko “Amafaranga yanyu mwayaguze inka, ayacu tuyagura imbunda. Ubwo rero mushikame maze amahembe y’inka zanyu abakingire amasasu.”

Nyuma y’ayo magambo ni bwo urufaya rw’amasasu rwahise rwumvikana, Abatutsi batagira ingano kwicwa na yo abandi bahorahozwa n’Interahamwe ndetse n’impunzi z’Abarundi, bifashishije imipanga, amahiri n’izindi ntwaro gakondo.

Nkusi yabwiye Urukiko ko nyuma y’ibyo bitero, Ntaganzwa yanditse raporo ayoherereza abayobozi bamukuriye abamenyesha ko barwanye n’Inkotanyi muri Cyahinda bakazinesha.

Ati “Niba amasasu yararekuwe mu buryo bw’impanuka nk’uko abivuga, ni gute byarangiye ahitanye abana bato, abasaza n’abagore?”

Umwanzuro ku rubanza rwa Ntaganzwa uzasomwa kuwa 17 Gashyantare 2023 hamenyekane niba azagabanyirizwa igihano cyangwa urukiko rw’ubujurire ruzunga mu cyo yahawe n’urukiko rukuru.

Kugeza ubu Ntaganzwa afungiye mu Igororero rya Mpanga nubwo mu gihe cy’iburanishwa mu bujurire yajyanywe i Mageragere kubera ko urubanza rwaberaga i Kigali mu rukiko rw’Ubujurire.

Ntaganzwa yafatiwe muri Repubulika Iharanira Demokarasi ya Congo (RDC) mu mwaka wa 2015 yoherezwa mu Rwanda mu 2016.

Ntaganzwa Ladislas azasomerwa muri Gashyantare uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .