00:00:00 IGIHE NETWORK KN KINYARWANDA EN ENGLISH FR FRANCAIS

Dr Ntezilyayo yagaragaje ubukemurampaka nk’inzira ya bugufi yacogoza idindira ry’imanza

Yanditswe na Ntabareshya Jean de Dieu
Kuya 16 June 2022 saa 10:48
Yasuwe :

Perezida w’Urukiko rw’Ikirenga, Dr Faustin Ntezilyayo, yagaragaje ko inkiko zikwiye kuyoboka inzira y’ubukemurampaka mu kwirinda idindira ry’imanza n’umubare w’abazigana bikaba byatuma ubutabera butinda gutangwa.

Ibi yabigarutseho mu Nama Mpuzamahanga ya Afurika y’Iburasirazuba ku Bukemurampaka yahuje abaturutse mu bihugu bitandukanye hirya no hino ku Isi yateraniye i Kigali ku wa 16 Kamena 2022.

Urwego rw’ubukemurampaka mu Rwanda rwashyizweho mu 2008, naho Ikigo Mpuzamahanga cy’Ubukemurampaka cya Kigali cyatangiye gukora mu 2012 aho gikemura amakimbirane ashingiye ku bucuruzi no ku masezerano hagatombye kwitabaza inkiko.

Perezida w’Urukiko rw’Ikirenga, Dr Faustin Ntezilyayo, yagarutse ku kamaro k’ubukemurampaka mu kwirinda umubare munini w’imanza za hato na hato kandi zari zikwiye kuba zarangirira muri iki cyiciro, asaba inkiko gushyira imbere umuco w’ubukemurampaka kandi bukozwe kinyamwuga.

Yagize ati “Birakwiye ko hagaragara isano iri hagati y’ubukemurampaka n’inkiko cyangwa no kuba ibintu byuzuzanya aho kugira ngo bibe bimeze nk’ibihanganye. Inkiko zikwiye kugira inzego z’ubukemurampaka inshuti za hafi.”

“Inkiko z’u Rwanda kimwe n’iz’ahandi zikwiye gushyira imbaraga mu buhuza n’ubukemurampaka kubera ko bifasha mu kugabanya umubare w’imanza mu nkiko no kugabanya umubare w’imanza z’ibirarane bikunze kuboneka mu nkiko. Ni yo mpamvu n’ubuyobozi bw’u Rwanda bukomeza gushishikariza abantu gukoresha inzira z’ubukemurampaka ku nzego izo ari zo zose.”

Dr Ntezilyayo yavuze ko bifuza ko Ikigo Mpuzamahanga cy’Ubukemurampaka cya Kigali cyaba icy’icyitegererezo ku bindi bihugu ku buryo byaza kwigiraho inzira n’uburyo bwo gukoresha mu gukemura amakimbirane

Yavuze kandi ko u Rwanda rukeneye gukomeza kuzamura ubushobozi bw’abakemurampaka b’Abanyarwanda kugira ngo Umunyarwanda cyangwa umuntu wo mu Karere ajye ayoboka ubukemurampaka bwo mu Rwanda kandi yumve ko akemuriwe ibibazo nk’uko abyifuza

Yakomeje agaragaza ko mu gihe habayeho ubukemurampaka bukozwe neza bishobora kugeza ku butabera buboneye kandi butangirwe ku gihe ndetse ubukemurampaka buri mu buryo bwizewe kuko bubikira ibanga ababuranyi.

Umuyobozi w’Ikigo mpuzamahanga gishinzwe Ubukemurampaka mu Rwanda, Kigali International Arbitration Centre, Mugabe Victor, yavuze ko urwego rw’ubukemurampaka rugihura n’imbogamizi zirebana n’imyumvire.

Ubusanzwe uburyo bw’ubukemurampaka bukoreshwa cyane mu bijyanye n’ubucuruzi kandi ko dosiye igize mu rwego rw’ubukemurampaka ihita yihuta biryo bikarinda gusiragira mu manza.

Ati “Ntabwo tugira amadosiye menshi y’ibirarane nka ya yandi yo mu nkiko ahubwo iyo ihageze ikorwa vuba vuba bishoboka, kuko bireba cyane cyane abacuruzi kuko idakoreshwa mu manza z’inshinjabyaha. Imikorere y’ubukemurampaka abantu bumva ko ari ibintu bitamenyerewe iwacu.’’

“Abantu baricara mu bunzi nibyanga bajye mu nkiko bahangane; impamvu imyumvire ikiri ikibazo ntibarumva imyumvire yayo. Ubundi ni ubutabera bwigenga ariko bwemewe n’amategeko. Kenshi uzasanga kugira ngo uhamagare abantu ubicaze ku meza amwe baganire batabyumva. Nubwo abantu bafitanye ikibazo ariko ntigikwiye kubabuza kwicarana no bagikemure.”

Umuyobozi w’Urwego rw’Ubukemurampaka muri Kenya, Lawrence Muiruri Ngugi, yavuze ko ibihugu bigize Umuryango wa Afurika y’Iburasirazuba byari bikwiye gushyiraho uburyo bumwe bw’ubukemurampaka.

Kuva mu 2012 mu Rwanda hatangizwa urwego rw’ubukemurampaka rumaze kwakira nibura ibirego 200 kandi bigakemurwa neza, bivuze ko buri mwaka nibura hashobora kwakirwa dosiye ziri hagati ya 25-30.

Perezida w'Urukiko rw'Ikirenga, Faustin Ntezilyayo, yagaragaje akamaro k'ubukemurampaka mu kwihutisha ubutabera
Umuyobozi w'Urugaga rw'Abavoka mu Rwanda, Nkundabarashi Moïse, yagaragaje ko urwego rw'ubukemurampaka rukwiye kurushaho kongererwa imbaraga
Iyi nama yitabiriwe n'abaturutse mu bihugu bitandukanye hirya no hino ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .