00:00:00 IGIHE NETWORK KN KINYARWANDA EN ENGLISH FR FRANCAIS

Dosiye ya Shema ukurikiranyweho ubwambuzi bushukana yagejejwe mu bushinjacyaha

Yanditswe na Ntabareshya Jean de Dieu
Kuya 21 Mutarama 2023 saa 04:43
Yasuwe :

Dosiye y’umusore w’imyaka 20 Shema Prince washinze ikigo cya P&A Group ukurikiranyweho ubwambuzi bushukana abandi yashyikirijwe ubushinjacyaha.

Uyu musore yatawe muri yombi ku wa 16 Mutarama 2023 nyuma y’uko RIB yari imaze kwakira ibirego by’abantu batanu baregaga uyu musore kubambura amafaranga akoresheje ubushukanyi.

Kuri ubu uyu musore ukurikiranyweho ubwambuzi bushukana amakuru avuga ko akurikiranyweho asaga miliyoni 70 Frw yambuye abantu, akaba yari amaze kuregwa n’abantu bagera kuri 13.

Nyuma yo gutabwa muri yombi urwego rw’Igihugu rw’Ubugenzacyaha rwakoze Iperereza ku byavugwaga n’abaturage batanze ikirego ndetse kuri ubu dosiye ye yamaze gushyikirizwa ubushinjacyaha kuri uyu wa Gatanu tariki ya 20 Mutarama 2023.

Umuvugizi wa RIB, Murangira B. Thierry aherutse kugaragaza ko muri ibi bihe abantu bari kwihisha inyuma y’iterambere bakava mu byaha by’ubugome bakinjira mu bikoreshwa amayeri menshi asaba buri muturarwanda kuba maso.

Yakomeje agira ati “Nk’uwo Shema Prince usanga mu bantu yashutse harimo n’abamuruta, bamurusha kugira amakuru ahagije y’ubuzima.”

Yasabye abantu bafite umutima wo gukomeza gukora ibyaha ko babireka kuko ntaho bazacikira ukuboko k’ubutabera.

RIB yagaragaje ko yahagurukiye abantu bafite gahunda yo gushukisha abanyarwanda uduhendabana bagamije kubacucura utwabo barimo ibigo bitandukanye bigenda byizeza abantu ibidahari binyuze mu gushora ayabo, hanyuma bakayaheza.

Abaturage basaba ko mu kwemeza ibigo bishya by’ishoramari hajya harebwa cyane ku bushobozi ba nyirabyo bafite mu kwirinda ko abaturage babibeshyerwamo bizezwa ibitaboneka.

Kuri iki ariko Murangira yagaragaje ko bigoye kubera ko hari abajya kwandikisha ibiko byabo mu Urwego rw’Igihugu rushinzwe Iterambere RDB ariko ibyo bandikishije bazakora ntabe ari byo bakora ari naho ahera asaba abaturage kurushaho gushishoza mu byo bagiye kujyamo no kugenzura ko batazabihomberamo.

Ubushukanyi bugamije kwambura iby’abandi Shema akurikiranyweho yabukoze akoresheje ikigo cye cyitwa P&A Group ngo akabeshya abaturage ko abatumiriza imodoka mu mahanga nyamara agamije kubarya amafaranga.

Abaturage nabo baramuyobotse bakamuha amafaranga ngo azabatumiriza imodoka nk’uko yabibizezaga ariko bikarangira atazibahaye n’amafaranga ntayabasubize.

Ibi nibyo byatumye bitabaza RIB ngo kuko yari abibakoze igihe kitari gito kandi ari abantu benshi.

Mu baturage bareze harimo abavuga ko bahaye Shema amafaranga mu bihe binyuranye, barimo babiri bamuhaye miliyoni 4Frw kuri buri umwe, uwamuhaye 7 Frw n’uwamuhaye miliyoni 10 Frw.

Icyaha cyo kwihesha ikintu cy’undi hakoreshejwe uburiganya (Escroquerie), gihanwa n’ingingo ya 174 ivuga ko umuntu wese wihesha umutungo w’undi, imari ye yose cyangwa igice cyayo mu buryo bw’uburiganya yiyitiriye izina ritari ryo cyangwa umurimo adafitiye ububasha cyangwa akizeza icyiza cyangwa agatinyisha ko hari ikibi kizaba, aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka ibiri ariko kitarenze imyaka itatu n’ihazabu y’amafaranga y’u Rwanda atari munsi ya miliyoni 3 Frw ariko atarenze miliyoni 5 Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .