00:00:00 IGIHE NETWORK KN KINYARWANDA EN ENGLISH FR FRANCAIS

Dj Brianne na Djihad basobanuye uko bisanze muri RIB n’icyatumye bakorwaho iperereza

Yanditswe na Mahoro Vainqueur
Kuya 17 May 2024 saa 07:25
Yasuwe :

Gateka Esther Brianne na Uzabakiriho Cyprien [Djihad] basobanuye icyatumye RIB ibakoraho iperereza rijyanye n’icyaha cyo gukangisha gusebanya.

Aba bombi bahuriye mu kiganiro (Space) cyanyujijwe ku rubuga rwa X, bemeza ko bahamagawe na RIB mu minsi ishize bagira ibyo babazwa bijyanye n’amashusho y’urukozasoni bashinjwaga ko babitse.

Djihad na DJ Brianne bahakaniye RIB bayibwira ko ayo mashusho ntayo bazi ndetse yagize n’umwanya wo gusuzuma telefone zabo ireba niba koko ibyo bavuga ari ukuri ayo mashusho atarageze muri telefone zabo.

Djihad avuga ko yahamagawe na RIB mu gitondo cya tariki 10 Gicurasi 2024 ubwo yari avuye mu kiganiro akora kuri Isibo Radio.

Uyu musore yakomeje avuga ko yatunguwe no gusanga ari kubazwa amashusho y’urukozasoni y’undi muntu bivugwa ko yaba abitse.

Yabajijwe iby’aya mashusho bitewe n’uko hari ikirego RIB yakiriye kivuga ko hari abantu barimo Djihad na DJ Brianne babitse amashusho ye ndetse bamuteye ubwoba bamusaba amafaranga , bavuga ko natayatanga bazamushyira hanze.

Ati “Nagezeyo mbazwa amashusho (video) y’urukozasoni naba mfite ku buryo nayakangishije ngo bampe amafaranga kugira ngo ntayishyira hanze, ndumirwa nkubitwa n’inkuba.”

“Noneho ndababaza nti amashusho yande ubwo ? bambwira uwo muntu ntaribuvugire hano , ndavuga nti rero ayo mashusho ntayo nzi nta n’ayo mfite, icyakora amashusho mfite y’uyu muntu ni ayo ari mu modoka ari kwigana indirimbo bati ntabwo ari ayo dushaka, ndasobonura nditahira banafashe telefone bareba koko niba ntayarimo.”

DJ Brianne we avuga ko yahamagawe tariki 9 Gicurasi 2024 abazwa iby’amashusho y’urukosani abitse nkuko byagenze kuri mugenzi we.

Icyakora DJ Brianne we yemera ko yigeze kuvugana n’uyu mugabo bivugwa ko ari muri ayo mashusho ndetse ari we ubwe wamwihereye amashusho ye ari kumwe n’umukobwa bari mu modoka bari kuririmba indirimbo , amubaza niba asanzwe azi uwo mukobwa.

Ati “Ni umugabo wambwiye ko aba i Roma kwa Papa ntabwo nari muzi, nagiye kubona mbona aranyandikiye ibintu byinshi cyane, ndamwihorera kuko sinkunda gusubiza abantu ntazi.”

“Nyuma nibwo yampaye amashusho ari kumwe n’umukobwa bari kuririmbana indirimbo bicaye mu modoka bisanzwe, arambaza ati uyu mukobwa uramuzi ? Namubwiye ko muzi njya mubona kuko yabyaranye n’umu-DJ mugenzi wanjye.”

DJ Brianne yakomeje avuga ko uyu mugabo yamutakiye amubwira ko uwo mukobwa yamuhemukiye cyane, akamurya amafaranga menshi ndetse amwoherereza n’amajwi y’ibiganiro bagiye bagirana mu bihe bitandukanye.

Uyu mugabo yakomeje gusaba DJ Brianne gushyira hanze inkuru y’uwo mukobwa wamuhemukiye mu rwego rwo kumufasha kwihorera.

Yakomeje agira ati “Nyuma yaho yakomeje kunsaba gushyira hanze ibyo bintu byose , nanjye ndamubaza nti kubera iki wa mugabo we ushaka ko nshyira hanze inkuru y’uyu mu-DJ mugenzi wanjye n’umugore we, warangiza ukambwira ngo wowe singushyiremo.”

“Uwo mugabo atangira kumbwira ngo uwo mugore nakweretse mfite amashusho ye turyamanye , ni umugore wanjye kandi nayahaye inshuti ze, hari bamwe yayahaye gusa njye ntabwo yigeze ayampa.”

Nyuma yaho nibwo DJ Brianne ngo yahaye Djihad y’amashusho ya wa mugabo na wa mukobwa bari mudoka, amubwira ko afite inkuru ishyushye agiye gushyira ku mbuga nkoranyambaga.

Wa mukobwa uvugwa mu nkuru nibwo yabonye ubwo butumwa Djihad yari ashyize ku mbuga nkoranyambaga ze , ahitamo guhamagara DJ Brianne amubirwa uburyo uwo mugabo wamuhaye amakuru yagiye amuhohotera inshuro nyinshi, amusaba kureka kuvuga inkuru zabo kuko uwo mugabo ameze nk’ufite ikibazo mu mutwe.

DJ Brianne nyuma yo kumva ikibazo umukobwa mugenzi we afite, ngo yamugiriye inama yo gushaka uko yakwigira umwana mwiza kuri uwo mugabo kugeza igihe agereye kuri telefone ye agasiba amashusho yabo y’urukozasani bifashe.

Ati “Uwo mukobwa mu kanwa ke ni we wanyibwiriye uburyo uwo mugabo yamunaniye , afite amashusho yabo baryamanye ndetse amukangisha ko azayaha inshuti ze n’abo mu muryango we.”

“Nyuma y’iminota 30 uwo mugabo na we yarampamagaye ansaba ko nasiba ibintu yari yaranyoherereje byose kugira ngo uwo mu –DJ w’undi atazabibona, nahise mubwira ngo wa mugabo we sinkuzi, ujya kunyohererza ibi bintu ntabwo nari nabigusabye, ntabwo nabisiba kugira ngo bive muri telefone yanjye ugomba kunyishyura n’uwo mukobwa na we narabimubwiye ngo ubwire uriya mugabo wawe uguharabika, umubwire ko ibintu yampaye ndabisiba ari uko anyishyuye ambwira ko agiye kumubwira.”

Amazina ya DJ Brianne na Djihad yageze muri RIB ate kuri iki kibazo?

Nyuma y’igihe nibwo uwo mugabo yatangiye gukanga uwo mukobwa amubwira ko afite amashusho ye yambaye ubusa ndetse yayahaye abanyamakuru ngo bamushyire hanze mu rwego rwo kwihorera kuko nawe yamuriye amafaranga menshi.

Aha niho uyu mugabo yahereye abwira umukobwa ko mubo yahaye amashusho barimo Djihad na DJ Brianne, avuga ko bagiye kumushyira hanze bidatinze.

Uyu mukobwa yegereye DJ Brianne amuhakanira ko ayo mashusho ntayo yigeze abona ahubwo amugira inama yo kujya kurega uwo mugabo we kugira ngo adashyira hanze ayo mashusho.

Nk’uko DJ Brianne abivuga, yemeza ko uyu mukobwa ari we wabwiye RIB ko mu bahawe ayo mashusho barimo DJ Brianne na Djihad ndetse atabizeye kuko isaha n’isaha nabo bayashyira hanze.

Ibi nibyo byatumye bahamagarwa muri RIB mu rwego rwo gukorwaho iperereza.

DJ Brianne ati “Ndashimira RIB cyane, kuko nari nabatesheje umutwe mbabaza ukuntu bamarana telefone yanjye iminsi ibiri bashakisha amashusho y’ubusambanyi ntanafite , baradufashije telefone barazidusubije rwose. RIB Nta kosa ifite kuko yakoze akazi kayo, yari iri mu iperereza.”

DJ Brianne avuga ko atigeze akanga umuntu n’umwe amubwira ko azamushyira hanze ndetse ngo ubu yafashe umwanzuro w’uko umuntu wese umuhaye amashusho y’urukozasoni azajya ahita amushyikiriza RIB nyuma yo gusobanukirwa ko kwifata ayo mashusho ukayasakaza nabyo bigize icyaha.

Djihad na DJ Brianne bahisemo gutangaza ukuri ku iperereza ryabakozweho mu rwego rwo kumara impungege abatekerezaga ko bafunzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .