00:00:00 IGIHE NETWORK KN KINYARWANDA EN ENGLISH FR FRANCAIS

Afurika y’Epfo yavuye ku izima mu gukurikirana abarimo Fulgence Kayishema

Yanditswe na Rabbi Malo Umucunguzi
Kuya 15 June 2022 saa 08:37
Yasuwe :

Umushinjacyaha mukuru w’urwego rwasigaranye imirimo y’inkiko mpanabyaha (IRMCT), Serge Brammertz, yashimye ko Afurika y’Epfo, yavuye ku izima, yemera imikoranire ishobora gutuma hafatwa abakekwaho uruhare muri Jenoside yakorewe Abatutsi.

Kuri uyu wa Kabiri tariki 14 Kamena 2022, Brammertz yagejeje ijambo ku kanama k’Umuryango w’Abibumbye gashinzwe umutekano, agaragaza ibyo urwego ayoboye rurimo gukora n’imbogamizi zihari.

Yari afite byinshi byo kwishimira ahereye ku ifatwa rya Kabuga muri Gicurasi 2020, ubu ubushinjacyaha ngo butegereje ko urubanza rutangira.

Yagize ati "Nshimishijwe cyane no kubamenyesha ko mu myaka ibiri ishize, Ibiro byanjye byabashije gushyikira kimwe cya kabiri cy’abo twashakishaga bahunze ubutabera. Barimo batatu bitwaga ko ari bo bakuru muri bo: Felicien Kabuga, Augustin Bizimana, ndetse mu byumweru bike bishize, Protais Mpiranya wari ukuriye abarindaga perezida."

Kabuga ubu afungiwe i La Haye mu Buholandi, Bizimana wabaye Minisitiri w’ingabo byemejwe ko yapfiriye i Pointe Noire muri Congo, naho Mpiranya yaguye muri Zimbabwe.

Undi uheruka kumenyekana irengero rye ni Lt Col Phénéas Munyarugarama, byemejwe ko yaguye i Kankwala muri RDC.

Brammertz yavuze ko ubwo yahabwaga izi nshingano mu 2016, zarimo kumenya aho abo bantu baherereye, ubundi ashyira imbaraga mu buryo bwo kubashakisha no kongera ubumenyi mu itsinda ribikora, hakanifashishwa ikoranabuhanga rigezweho mu itumanaho.

Yavuze ko ku bazize Jenoside, kubaha ubutabera ari ugutahura ababikoze bakabiryozwa, nubwo bidasibanganya ibyo bakoze.

Ubu mu bantu bahawe uru Rwego ngo rubakurikirane, hasigaye bane gusa hatarasobanuka irengero ryabo.

Abo ni Kayishema Fulgence wari umupolisi muri Komini Kivumu muri Perefegitura ya Kibuye, Ndimbati Aloys wari Burugumesitiri wa Komini Gisovu ku Kibuye, Ryandikayo Charles wari umucuruzi muri Komini Gishyita na Sikubwabo Charles wari Burugumesitiri wa Komini Gishyita.

Brammertz ati "Ubu hari abantu bane bahunze ubutabera, barimo uwo duhanze amaso cyane, Fulgence Kayishema. Muri urwo rwego natangaza ko nyuma y’imyaka myinshi igoranye, noneho hari intambwe irimo guterwa na Repubulika ya Afurika y’Epfo. Kubera ubufasha bwa Perezida wa Afurika y’Epfo na Guverinoma ye, haheruka gushyirwaho Itsinda ryihariye rigomba gufasha ibiro byanjye."

"Amatsinda yacu yakoranye inama i Pretoria mu byumweru bitatu bishize, ndetse ibiro byanjye byatanze ibintu bya mbere byo gukurikiranwa. Dufite icyizere ko mu bufatanye bwuzuye na Afurika y’Epfo, urugendo rwa Kayishema rwo guhunga ubutabera vuba aha ruragera ku iherezo."

Yashimangiye ko bihaye intego ko mu gihe Akanama gashinzwe umutekao kazaba kagiye kongera guterana gasuzuma ibikorwa by’urwego, bariya bantu uko ari bane bose bakekwaho uruhare muri Jenoside yakorewe Abatutsi, bose bazaba baramaze gufatwa.

Kayishema ari mu bakekwaho uruhare muri Jenoside bashyiriweho igihembo cya miliyoni $5 ku muntu uzatanga amakuru y'aho baherereye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .