00:00:00 IGIHE NETWORK KN KINYARWANDA EN ENGLISH FR FRANCAIS

Afungiwe mu bitaro: Ibimaze kumenyekana ku buzima bwa Kabuga i La Haye

Yanditswe na Rabbi Malo Umucunguzi
Kuya 14 June 2022 saa 12:45
Yasuwe :

Urwego rwasigaranye Imirimo y’Inkiko Mpanabyaha zirimo Urwashyiriweho u Rwanda (IRMCT), rwanzuye ko Kabuga Félicien uregwa ibyaha bya Jenoside atangira kuburanishwa, afungiwe mu Buholandi aho kujyanwa i Arusha.

Kabuga w’imyaka 87 yafatiwe mu Bufaransa muri Gicurasi 2020, maze abamwunganira, Ubushinjacyaha n’Ubwanditsi bw’Urukiko basaba ko bijyanye n’ubuzima bwe - mu gihe icyorezo cya COVID-19 cyari kimeze nabi hirya no hino ku isi - atoherezwa i Arusha muri Tanzania.

Yoherejwe muri Gereza z’Umuryango w’Abibumbye i La Haye mu Buholandi (UNDU), "kugira ngo hakorwe isesengura ry’abaganga harebwa niba yakoherezwa ku Ishami rya Arusha n’uburyo byakorwamo, akaba ariho aburanira."

Kugeza ubu urubanza rwe ruracyari mu mirimo y’ibanze, ndetse impuguke mu by’ubuzima ntizihuza, niba koko afite ubushobozi bwo kuburana yumva ibirimo kuba n’uburemere bwabyo.

Uru rubanza ni ikintu gikomeye ku butabera ku bazize Jenoside yakorewe Abatutsi n’abayirokotse, kuko Kabuga afatwa nk’umuterankunga wayo.

Icyemezo cy’abacamanza batatu lain Bonomy nka Perezida na bagenzi be Graciela Susana Gatti Santana na Elizabeth Ibanda-Nahamya, cyo ku wa 13 Kamena 2022, kigaragaza byinshi binyuze muri raporo zakozwe ku buzima bwa Kabuga.

Kivuga ko "Kuva yagera i La Haye mu Ukwakira 2020, Kabuga yashyizwe mu bitaro bisanzwe inshuro nyinshi mu buryo bwihutirwa cyangwa se akeneye kuvurwa n’inzobere. Amaze kubagwa inshuro ebyiri. Ubu ntabwo aba muri UNDU, ahubwo aba mu bitaro bya gereza kubera ko akeneye kwitabwaho mu masaha 24."

Guhera ku wa 9 Ukuboza 2020, urukiko rwahabwaga raporo ebyiri z’abaganga mu kwezi ku buzima bwa Kabuga.

Mu Ukuboza 2020 na Mutarama 2021 zerekanaga ko Kabuga atameze neza, ariko nk’umuntu usheshe akanguhe.

Muri raporo yatanzwe ku wa 3 Gashyantare 2021, umuganga wo kuri Gereza y’i La Haye yavuze ko asanga ibyo byose bitabuza ko Kabuga yoherezwa i Arusha.

Ni icyemezo cyaje gushimangirwa na raporo yakozwe n’umwe mu mpuguke mu bibazo by’abageze mu zabukuru (gerontologist), ku buryo byashyiraga ari uko Kabuga yari hafi kwisanga i Arusha.

Ibintu byatangiye guhinduka

Ku wa 5 Gashyantare 2021, Ubwanditsi bwa IRMCT bwaje kumenyesha umucamanza ko Kabuga yikubise hasi, "avunika igufwa ryo mu itako (femur), bityo ko akeneye kubagwa."

Raporo z’abaganga zahise zerekana ko ubuzima bwe bwahise busubira hasi.

Muri Werurwe 2021 noneho raporo yaje ivuga ko afite indwara zinyuranye z’umutima n’ibihaha, na Osteoporosis ituma amagufwa yoroha cyane ku buryo acika vuba.

Mu kuganira na we kandi ngo byagaragaye ko afite ikibazo cyo kwibagirwa ikintu mu kanya gato, ntashobore gushyira ibintu ku murongo, mu mvugo ze akagenda abivangavanga.

Gusa nk’impamvu nyamukuru yari yatumye Kabuga ajyanwa i La Haye, Ubwanditsi bwa IRMCT bwahaye akazi inzobere mu bibazo by’izabukuru (Expert Gerontologist), Prof Francesco Mattace-Raso.

Uyu yagombaga gusuzuma ubushobozi bw’umubiri wa Kabuga, niba yajya mu ndege akagera i Arusha, akaburanishirizwayo.

Urukiko rwamusabye ko muri raporo ashyiramo n’ubushobozi afite bwo kuba yakwitabira iburanisha buri gihe, ndetse niba bikenewe ko asuzumwa n’abaganga bo mu bindi byiciro by’ubuvuzi mbere y’uko hafatwa icyemezo cyo kumujyana i Arusha.

Ku wa 18 Kamena 2021, Professor Mattace-Raso, yatanze raporo ye avuga ko "nta mpamvu yabuza ko yoherezwa muri Tanzania, kubera ko gufungirwa hariya ntaho bitandukaniye n’aho afungiwe.”

Uburwayi bwakomeje kwibasira Kabuga

Urukiko rwaje kumenyeshwa ko Kabuga akeneye kubagwa, ndetse ko byateganywaga muri Kanama 2021.

Icyo gihe ngo rwamenyeshejwe ko amaze gushyirwa mu bitaro inshuro ebyiri kubera uburwayi bw’impyiko (renal failure) no guta ubwenge bw’akanya gato kubera ko amaraso atagera neza mu gice kimwe cy’ubwonko, bizwi nka "trans-ischemic attack".

Ubwo burwayi bwahise bugira ingaruka ku myanzuro ya raporo ya Prof Mattace-Raso, bityo hagombaga gukorwa indi ku buzima bwe.

Icyemezo cy’urukiko gikomeza kiti “Nyamara, Kabuga yaje kugira ubundi burwayi bw’umusonga, hiyongeraho igitutu ku nzego z’ubuzima mu Buholandi kubera icyorezo cya Covid-19, bituma kumubaga byigizwa ku wa 7 Ukrakira 2021.”

Prof Mattace-Raso yaje gutanga indi raporo avuga ko “Kabuga nta byago afite bidasanzwe ugereranyije n’abandi bantu bo mu kigero cye" mu bijyanye n’ingendo z’indege, ndetse adakeneye kwitabwaho n’impuguke.

Yasabye ko noneho umuganga w’ubuzima bwo mu mutwe yasuzuma Kabuga, akareba niba afite ubushobozi bwo kuzaburana.

Umuganga wa mbere yasanze Kabuga adashobora kuburanishwa

Ubwanditsi bwa IRMCT bwaje kwifashisha Prof. Gillian Mezey, aza guhura na Kabuga ku wa 17 Mutarama 2022.

Nyuma yo kumusuzuma no gukoresha imashini (Magnetic resonance imaging, MRI) mu kumureba mu bwonko, yatanze raporo ko ubwonko bwa Kabuga bwatakaje ubushobozi, nk’ibimenyetso by’indwara ya Alzheimer.

Yavuze ko ari hafi kugera mu cyiciro cyo kutabasha kwibuka, kwiga ibintu bishya, cyangwa gutekereza byatuma afata icyemezo.

Ni ibintu ngo yasanze bikura, ko ahubwo na Prof Mezey “ashobora gusubiramo neza isuzuma yakoze”.

Gusa yemeje ko Kabuga “ashobora kumva imiterere y’ibyaha aregwa, mu gihe bisobanuwe neza, gahoro gahoro, ndetse ko ashobora kugera mu cyiciro cyo kugira icyo abivugaho.”

Icyakora, kuba atabasha kugumana mu mutwe ibintu byagiyemo, no kutabasha gusoma no kwandika, guteshaguzwa bya hato na hato, ko Kabuga bigaragaza ko “adafite ubushobozi bwo guha amabwiriza umwunganizi we no gutanga ubuhamya.”

Ku bwe, ngo ntashobora kugira uruhare mu rubanza mu buryo bwuzuye.”

Hitabajwe n’umuganga w’Umunyarwanda

Ku wa 15 Werurwe 2022, Urukiko rwemereye Ubushinjacyaha gushyiraho indi mpuguke y’umuganga uvuga Ikinyarwanda, bwihitiyemo, ngo na we akore isuzuma kuri Kabuga.

Urukiko rwavuze ko "hagendewe ku myanzuro ya Professor Mezey ko Kabuga atameze neza ku buryo yaburana, bishobora gushingirwaho mu guhagarika amaburanisha, urukiko rusanga ari ngombwa ko haboneka igitekerezo cy’impuguke ya kabiri yigenga".

Rwanasabye ubwanditsi gushyiraho indi mpuguke yigenga, zombi zikazatanga raporo mu minsi 30.

Ubwanditsi bwashyizeho Prof Henry Gerard Kennedy, asura Kabuga ndetse aganira n’abaganga be.

Yaje gutanga raporo avuga ko Kabuga “Yujuje bimwe mu bimenyetso by’ugutakaza ubushobozi k’ubwonko (Mild neurocognitive disorder) ugereranyije n’ikigero cy’izabukuru n’ubushobozi bw’umubiri.”

Yasanze bitakwitwa ko arwaye Alzheimer, ahubwo ko ari ugusaza bisanzwe, kandi ko bigena bikura.

Ageze ku bushobozi bwo kuburana, Prof Kennedy yanzuye ko “Kabuga afite ubushobozi bwo kumva igisobanuro cyo kwemera icyaha cyangwa kugihakana n’ubushobozi bwo kumva imiterere y’ibyaha aregwa.”

Kugira ngo yumve urubanza n’ingingo z’ingenzi zirugize ariko, ngo byasaba ko ahabwa ubufasha bukwiye, nko gukoresha amagambo make.

Ku ruhande rw’Ubushinjacyaha, rwahaye akazi impuguke mu buvuzi, Dr. Rutakayile Bizoza, wo mu Rwanda.

Yahuye na Kabuga ku wa 21 Mata 2022, atanga raporo avuga ko Kabuga “afite ubushobozi bwo kwibuka ibyabaye” ndetse abasha “gukurikiranya neza ibintu”.

Dr. Bizoza yanzuye ko Kabuga ashobora kuburana, kumva imiterere y’ibyo aregwa, ariko akaba yatanga ubuhamya ari uko afite abamufasha kumva neza.

Uruhande rwa Kabuga narwo rwaje gusaba ko rwakwishyiriraho impuguke mu buvuzi, igasuzuma niba koko afite ubushobozi bwatuma aburana.

Baje gushyiraho Dr. An Chuc, wari warigeze no gusuzuma Kabuga ku buryo yari azi ubuzima bwe ari mu Bufaransa.

We yanzuye ko Kabuga akeneye ubwunganizi buhoraho hafi mu bintu byose akora mu buzima bwa buri munsi.

Ngo aba afite ibyago biri hejuru byo kwitura hasi, ku buryo ari hafi yo gutakaza ubushobozi bwo kuba yagira ikintu yikorera ku giti cye.

Ku bwe, ngo yasanze "bidashoboka kwemeza mu buryo bwa kiganga" ko Kabuga ashobora kuburana yumva neza agaciro n’uburemere bw’ibyo avuga, n’ibivugwa n’abandi."

Urukiko rwaje gufata icyemezo

Urukiko rwavuze ko bigaragara ko Kabuga amaze gutakaza ubushobozi bw’ubwonko, ariko ngo impuguke ngo zagaragagaje ko afite ubushobozi bwo kugira icyo avuga ku byo aregwa, abyemera cyangwa abihakana.

Ibyo kandi ngo akabikora yumva uburemere bw’ibyaha aregwa n’ingaruka z’urubanza arimo.

Urukiko rwavuze ko ku bijyanye no kumwohereza i Arusha, nubwo muri iki gihe Kabuga ashobora kuba adakeneye umuganga w’inzobere, bigaragara ko mu gihe yamukenera ataboneka i Arusha cyangwa hafi aho.

Byongeye, ngo Ubushinjacyaha ntibwakomeje ubusabe bw’uko Kabuga yakoherezwa i Arusha, ahubwo icyemezo bwagishyize muniko y’urukiko.

Urukiko rwanzuye ko abunganira Kabuga batabashije kugaragaza ko adafite ubushobozi bwo kuba yakwitabira urubanza rwe.

Byongeye, ngo ibyo Dr. Chuc yavuze nk’impuguke bishakiye, nubwo byumvikana ntibyagenderwaho atari inzobere muri ‘forensic psychiatry’.

Yategetse ko Kabuga akomeza gufungirwa mu Buholandi, "akaba ari naho urubanza rwe rutangirira kugeza hafashwe ikindi cyemezo."

Iki cyemezo ariko ngo ntigikuraho ko Kabuga aramutse amerewe neza, yajyanwa i Arusha ndetse akaba ariho afungirwa.

Urukiko rwasabye ko mu bunganira Kabuga hashyirwamo uvuga Ikinyarwanda, ndetse agakomeza gukurikiranwa n’abaganga batatu bazajya batanga raporo ku rukiko ku bushobozi bwe bwo kuburana, mu minsi 180.

Barimo Professor Gillian Mezey, Professor Henry Kennedy n’ubundi muganga umwe w’inzobere mu kuvura indwara z’ubwonko (neurologist), utarigeze agira aho ahurira n’uru rubanza.

Ubuzima bwa Kabuga bugeze habi
Perezida wa IRMCT, Umucamanza lain Bonomy

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .