00:00:00 IGIHE NETWORK KN KINYARWANDA EN ENGLISH FR FRANCAIS

Abayobozi babiri ba Cogebanque bashinjwa icyenewabo mu gutanga inguzanyo ya miliyari 6Frw barekuwe

Yanditswe na IGIHE
Kuya 26 Nzeri 2022 saa 05:19
Yasuwe :

Urukiko rw’Ibanze rwa Nyarugenge rwarekuye by’agateganyo George Ndizihiwe ukuriye ishami ry’inguzanyo muri Cogebanque na mugenzi we ushinzwe ubucuruzi muri iyi banki, Joel Kayonga, bakurikiranyweho ibyaha byo gukoresha nabi umutungo ufitiye rubanda akamaro n’icyenewabo.

Abo bakozi bombi bashinjwa ko bemeje inguzanyo ya miliyari 6 Frw yahawe David Byuzura binyuze muri sosiyete ye yitwa Builder Holdings Ltd, mu gihe atari yujuje ibyangombwa bisabwa.

Nyuma yo kuburana ifunga n’ifungurwa, Urukiko rw’Ibanze rwa Nyarugenge rwanzuye ko aba bagabo bombi bakomeza gukurikiranwa bari hanze.

Ni icyemezo cyafashwe nyuma yo gusanga kurekurwa by’abateganyo kwabo kutabangamira iperereza.

Mu iburanisha ryabanje bahakanye ibyaha bashinjwa, bavuga ko umwanzuro wo gutanga iyo nguzanyo wafashwe n’Inama y’Ubutegetsi ya Banki.

Ndizihiwe yabwiye urukiko ko amabwiriza akurikizwa mu mitangire y’inguzanyo yose yubahirijwe. Ngo mbere y’uko inguzanyo itangwa, byemezwa na komite ebyiri hanyuma n’inama y’ubutegetsi ikabyemeza.

Kayonga we yavuze ko atazi impamvu bafunzwe mu gihe inguzanyo yatanzwe ikanishyurwa yose uko yakabaye n’inyungu za miliyoni 600 Frw.

Ubushinjacyaha buvuga ko aba bagabo bombi bakoze ibyaha bashinjwa umwaka ushize ubwo bemezaga ko Byuzura ahabwa inguzanyo ya miliyari 6 Frw. Iyo nguzanyo yatanzwe mu Ukuboza kugira ngo ayifashishe agura uruganda rw’itabi rwa miliyari 10 Frw.

Abashinjacyaha bavuze ko raporo yatanzwe na Banki Nkuru y’Igihugu, BNR, yagaragaje ko iyo nguzanyo yatanzwe mu buryo butaboneye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .