00:00:00 IGIHE NETWORK KN KINYARWANDA EN ENGLISH FR FRANCAIS

Abarundi bane bahoze muri P5 basabiwe gufungwa burundu

Yanditswe na Ntabareshya Jean de Dieu
Kuya 9 Ukuboza 2021 saa 01:12
Yasuwe :

Ubushinjacyaha bwa Gisirikare bwasabiye Abarundi bane mu bahoze mu mitwe y’inyeshyamba ya P5 na Rud Urunana gufungwa burundu kubera ibyaha bakurikiranweho bifitanye isano n’ibikorwa by’iterambwoba bamwe basaba urukiko kurenganurwa bagasubira mu miryango yabo.

Aba bagombaga kuburana ku wa 25 Ugushyingo 2021 ariko Me Mfashingabo Aimable ubunganira ntiyaboneka mu Rukiko Rukuru rwa Gisirikare i Kanombe kubera impamvu yagaragarije urukiko zo kuba yari yitabiriye amahugurwa.

Uhagarariye Ubushinjacyaha bwa Gisirikare Capt. Kayihura Lievin yagaragaje ko Ndayizeye Said, Nduwayezu Ibrahim, Simpunga Grégorie na Bizimana Tharcisse binjiye mu mutwe wa P5 hagati ya 2017-2018 bavuye mu Burundi babifashijwemo n’abashinzwe ubutasi bw’u Burundi berekeza muri Repubulika Iharanira Demokarasi ya Congo.

Capt. Kayihura yavuze ko muri Mata 2019 bava muri Kivu y’Amajyepfo berekeza muri Kivu y’Amajyaruguru, bageze i Masisi bahuye n’ingabo za Congo zibagabaho ibitero baratatana, bamwe muri bo bakomereza muri Rud Urunana.

Yagaragaje ko bose bahurira ku byaha byo kujya mu mutwe w’ingabo zitemewe, kujya mu mutwe w’abagizi ba nabi, kugirira nabi ubutegetsi buriho no kubuhirika hakoreshejwe intambara, icyaha cy’iterabwoba, ubwinjiracyaha mu bwicanyi n’ubwinjiracyaha mu bujura bukoresha intwaro.

Yasabye urukiko ko rwakemeza ko habayeho impurirane mbonezamugambi bityo bagahabwa igihano kirusha ibindi gukomera nk’uko biteganywa n’itegeko riteganya ibyaha n’ibihano muri rusange mu ngingo yaryo ya 62.

Ubwo bahabwaga umwanya n’urukiko ngo bagire icyo babivugaho Ndayizeye Saidi yasabye urukiko ko rwamurenganura kuko yinjiye muri iyo mitwe ashutswe, agasubizwa mu muryango we i Burundi.

Ati “Mu mibereho yanjye ya buri munsi nari umuhinzi mbeshywa n’umuntu gucuruza amabuye y’agaciro. No muri dosiye yanjye narabibagaragarije, nigeze guturoka ndafatwa ndakubitwa. Uwacikaga wese yarafatwaga uwo kwicwa akicwa. Ibyabaye mu Karere ka Musanze byo nari maze amezi atatu ndi mu maboko ya Leta y’u Rwanda. Icyaha ni gatozi ku wagikoze, ababikoze ibyo byo mu Kinigi murabafite bari imbere yanyu. Nifuza ko nasubizwa mu muryango wanjye i Burundi.”

Nduwayezu Ibrahim yagize ati “Abandi bageragezaga gutoroka bagera mu Burundi bakabasangayo bakabagarura. Rero natekerezaga aho nzajya bikanyobera. Nafatiwe i Masisi noherezwa mu Rwanda. Ndasaba Leta y’u Rwanda namwe bacamanza ko mwandenganura.”

Ndagijimana Callixte, na we yagaragaje ko yageze muri uwo mutwe abeshywe akazi ndetse ko yageze mu Rwanda muri Nyakanga 2019 bityo ko ibyakorewe mu Karere ka Musanze nta ruhare yabigizemo kuko byabaye afunzwe. Ibi abihuriraho na Simbunga Gregoire.

Kuri Me Mfashingabo Aimable, yavuze ko urukiko rwazita ku mvugo n’ibisobanuro byabo yunganira bigaragaza ko nta mugambi bagize wo kujya muri iyo mitwe.

Ati “Urukiko ruzumve ko harimo impamvu nyoroshyacyaha rubagabanyirize ibihano, dore ko aba bahagaze imbere yanyu ari bwo bwa mbere bakurikiranweho mu nkiko. Ibyo byaba bihagije kubishingiraho bakagabanyirizwa ibihano.”

Aba na bagenzi babo uko ari 37 ndetse na Sergeant Emmanuel Ngirinshuti Alias Kanyemera wasabiwe ibihano adahari kuko yatorotse ubutabera ubushinjacyaha bwa Gisirikare bwabasabiye igihano cy’igifungo cya burundu.

Urubanza ruzasomwa ku wa 7 Mutarama 2022.

Abarundi bafatiwe mu mitwe y'iterabwoba basabiwe gufungwa burundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .