00:00:00 IGIHE NETWORK KN KINYARWANDA EN ENGLISH FR FRANCAIS

Abahoze ari abasirikare bakuru muri FDLR batangiye kwiregura mu rukiko

Yanditswe na Prudence Kwizera
Kuya 30 Ugushyingo 2022 saa 02:07
Yasuwe :

Abagabo batandatu bahoze mu mutwe w’iterabwoba wa FDLR urwanya u Rwanda ukorera mu mashyamba ya Repubulika Iharanira Demokarasi ya Congo batangiye kwiregura ku byaha baregwa birimo iterabwoba.

Abo ni ari Mujyambere Leopold alias Musenyeri, Habyarimana Joseph alias Mchebo Sophoni, Habimana Marc, Ruzindana Felicien, Habimana Emmanuel na Mpakaniye Emilien.

Baregwa kurema umutwe w’ingabo utemewe, kuba mu mutwe w’iterabwoba n’ubugambanyi bugamije kugirira nabi ubutegetsi buriho mu Rwanda.

Bafatiwe muri DRC mu bihe bitandukanye mbere ya 2019 bohererezwa mu Rwanda.

Bari kuburanishwa n’Urukiko Rukuru rw’Urugereko Ruburanisha Ibyaha Mpuzamahanga n’Ibyambukiranya Imipaka ruri i Nyanza mu Majyepfo y’u Rwanda.

Kuri uyu wa Kabiri tariki ya 29 Ugushyingo 2022 nibwo bitabye urukiko i Nyanza kugira ngo biregure ku byaha baregwa.

Habyarimana Joseph alias Sophonie Mucebo wari ufite ipeti rya General Major muri FDLR ni we wabimburiye abandi mu kwiregura. Uyu Ubushinjacyaha buvuga ko yari ashinzwe ibikorwa by’ubutasi muri FDLR.

Yabwiye urukiko ko ahakana ibyaha byose aregwa n’ubushinjacyaha, avuga ko yahunze mu 1994 afite ipeti rya Lieutenant mu ngabo za FAR.

Yavuze ko kuva yahunga atigeze agaruka mu Rwanda gukora ibyaha ahubwo yagiye mu mutwe wa FDLR mu rwego rwo kwirwanaho no kurwana ku mpunzi aho babaga i Masisi ngo kuko baterwaga n’imitwe ya Mai-Mai.

Yabwiye urukiko ko nta muntu cyangwa agatsiko yigeze aha amabwiriza yo gukora ibyaha mu Rwanda.

Habyarimana yavuze ko mu Ukwakira 2016 yavuye mu mutwe wa FDLR ahitamo kuba umusivile kuko yitegura gutahuka ku bushake.

Gusa ngo mu 2018 ubwo yari atashye yafashwe n’ingabo za Repubulika ya Demokarasi ya Congo zijya kumufungira i Kinshasa.

Yasobanuye ko ifungwa rye na Croix-Rouge irizi kuko yamuhaye ikarita imuranga.

Yasabye ko yasubizwa mu buzima busanzwe nk’uko byagiye bigenda ku bandi bahoze muri FDLR.

Umwunganira mu mategeko yavuze ko kuba yaratinze kuva muri FDLR ari uko ko yari azwi kandi ko iyo apfa kuvamo byari kumugiraho ingaruka zirimo no kwicwa, amusabira ko yasubizwa mu buzima busanzwe.

Undi wireguye ni Habimana Marc wari ufite ipeti rya General de Brigade muri FDLR. Yabwiye urukiko ko mu ngabo zatsinzwe yari afite ipeti rya Sous Lieutenant mbere yo guhungira muri DRC.

Yavuze ko mu 1996 yatahutse ku bushake ariko mu 1998 aza kongera guhungira muri DRC kubera intambara y’abacengezi yari iwabo muri Nyabihu.

Yasobanuye ko yamaze imyaka irenga 20 mu mutwe wa FDLR ariko yawinjiyemo avuga ko bidaturutse ku bushake bwe ahubwo bwari uburyo bwo kwirwanaho bakumira ibitero bagabwagaho.

Na we yavuze ko yafashwe mu 2018 ubwo yatahaga yerekeza mu Rwanda.

Yavuze ko nubwo yari afite ipeti rya General de Brigade muri FDLR nta bubasha bwo gutanga amabwiriza yari afite kuko atatumirwaga m8 nama zifata ibyemezo.

Yahakanye uruhare rwe mu bitero byagabwaga mu Rwanda avuga ko yabyumvaga mu itangazamakuru atazi igihe byateguriwe.

Mu kwisobanura, Habimana yagowe no kumvisha umucamanza impamvu mu ntambara y’abacengezi yahisemo guhunga asubira muri DRC aho kwerekeza mu tundi duce tw’u Rwanda twari dutekanye.

Yasoje kwiregura asaba urukiko ko yasubizwa mu buzima busanzwe nk’abandi barwanyi bo muri FDLR bamubanjirije.

Habyarimana Joseph na Habimana Marc bamaze kwiregura, urukiko rwategetse ko iburanisha risubikwa rikazakomeza kuri uyu wa Gatatu humvwa bagenzi babo basigaye.

Aba bagabo batandatu bahoze ari abasirikare bakuru muri FDLR batangiye kwiregura mu rukiko

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .