Imisanzu y’abanyamuryango b’ikigega Ejo Heza yageze kuri Miliyari mu mwaka umwe

Yanditswe na Iradukunda Serge
Kuya 28 Ukuboza 2019 saa 09:54
Yasuwe :
0 0

Nyuma y’umwaka Guverinoma y’u Rwanda itangije ikigega cy’ubwizigame bw’igihe kirekire bwiswe ‘Ejo Heza’, Ikigo cy’Igihugu cy’Ubwiteganyirize mu Rwanda (RSSB), cyatangaje ko imisanzu y’Abanyamuryango imaze kugera kuri Miliyari imwe.

‘Ejo heza’ yatangijwe mu isozwa ry’Inama y’Igihugu y’Umushyikirano yo ku wa 14 Ukuboza 2018 nk’uburyo buzafasha igihugu kwihutisha iterambere, aho buri umwe azaba abasha kwiteganyiriza.

Ubwo yatangizaga ubu bwizigame Minisitiri w’Imari n’Igenamigambi, Dr Ndagijimana Uzziel, yavuze ko buzafasha abantu basanzwe binjiza ariko bitari mu buryo bw’umushahara kubona pansiyo, amacumbi ndetse n’ubwishingizi bw’ubuzima.

Yagize ati “Inyungu za ‘Ejo Heza’ harimo kubona pansiyo ihoraho ya buri kwezi nk’ihabwa abakozi bakorera imishahara, kuba uwizigamiye ashobora kugera ku bindi by’ ingenzi nko kubona icumbi, ubwishingizi bw’ubuzima, kuriha amashuri no gukoresha igice cy’ubwizigame nk’ ingwate ku nguzanyo.”

Umuyobozi ushinzwe imirimo rusange muri RSSB, Nyirishema Innocent yavuze ko nyuma y’umwaka ubu bwizigame butangijwe, ubwitabire buhagaze neza.

Ati “Ubwitabire muri Ejo Heza bumeze neza ubungubu imibare igaragaza ko nyuma y’umwaka itangiye abamaze kwinjiramo ndetse bagatangira no kwizigamira bamaze kurenga ibihumbi 200, uyu munsi bakaba bamaze kwizigamira amafaranga arenga miliyari y’amanyarwanda.”

Nyirishema yongeyeho ko Ejo Heza izafasha umuntu winjiza amafaranga ayo ari yo yose kuba yakwizigamira amafaranga azamufasha mu gihe azaba atagishoboye gukora, anakangurira abatariyandikishamo kuyigana.

Ati “Umunyarwanda wese uyu munsi ushoboye gukora no kugira icyo yinjiza, igihe azaba atakibishoboye azabe afite igisimbura wa mubyizi yacyuraga. Ejo Heza rero ni cyo gisubizo yaje ituzaniye, nicyo gituma dukangurira Abanyarwanda ko bayinjiramo.”

Uwizigamye muri Ejo Heza mu gihe azaba agize imyaka 55, ubwizigame bwe azatangira kubuhabwa nka pansiyo ya buri kwezi. Icyakora mu gihe yaba amaze kurenza umusanzu wa miliyoni 4FRW, akagaragaza umushinga nk’uwo kubaka icumbi cyangwa kwishyura amashuri, ashobora guhabwa ikigero runaka cyarenga kuri miliyoni enye.

Mu gihe cy’imyaka itatu uhereye igihe Ejo Heza yatangirijwe, umunyamuryango uri mu cyiciro cya mbere cyangwa icya kabiri cy’ubudehe mu gihe yizigamiye muri Ejo Heza, nibura amafaranga 15 000 ku mwaka, leta izamwongereraho uruhare rwayo rungana 100% ariko ku buryo rutarenga 18000 FRW.

Ubwishingizi bw’ubuzima n’ubwo gushyingura

Abanyamuryango bari mu cyiciro cya mbere n’icya kabiri cy’ubudehe bizigamiye nibura 15 000 FRW muri Ejo Heza ku mwaka. Bazahabwa ubwishingizi bw’ubuzima n’ubwo gushyingura mu mwaka ukurikiraho.

Ubwizigame fatizo muri ‘Ejo heza’ ku bari mu cyiciro cya mbere n’icya kabiri ni ibihumbi 15 Frw ku mwaka, abo mu cya gatatu ni ibihumbi 18 Frw ku mwaka ariko n’utayagezeho ntabuzwa kuzigama, abo mu cya kane ni ibihumbi 72 Frw, kandi umuntu yihitiramo uburyo bumworoheye azajya ayatangamo.

Gufungura konti muri ‘Ejo Heza’ bikorerwa kuri telefoni. Umuntu akanda *506# ku mirongo ya MTN na Airtel &Tigo.

Kwiteganyiriza ni kimwe mu bizafasha u Rwanda kugera ku ntego yo kuzamura ubukungu bwarwo bukava ku rwego rw’ibihugu bikennye rukagera mu biyingayinga ibikize mu 2035 no kugera mu bikize mu cyerekezo cya 2050.

Umuyobozi ushinzwe imirimo muri RSSB, Nyirishema Innocent yavuze ko ubwitabire muri 'Ejo Heza' buhagaze neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .