Ikigega Agaciro cyashyizwe ku mwanya wa kabiri mu bihagaze neza muri Afurika

Yanditswe na Cyprien Niyomwungeri
Kuya 5 Kamena 2018 saa 07:40
Yasuwe :
1 0

Ihuriro ry’abantu bakomeye baharanira impinduka Afurika ikeneye, AfroChampions Initiative, ryashyize Agaciro Development Fund, ku mwanya wa kabiri mu bigega byo kwizigama by’ibihugu bikora neza kuri uyu mugabane.

Ni ubwa mbere hakorwa igipimo kigaragaza uko ibigega byo kwizigamira bihagaze, aho mu bihugu 12 bifite ibigega ari byo byemeye gutanga amakuru kuri ririya huriro.

Amanota yatanzwe hagendewe ku buryo ibyo bigega biyobowe, uko bikorera mu mucyo no gutanga amakuru, uko bihagaze mu bwizigame, impamvu yatumye bishyirwaho ndetse n’aho bikura imari.

Umuyobozi ushinzwe Imari mu Agaciro Development Fund, Patrick Marara Shyaka, yasobanuye ko iki gipimo ari ugushima imbaraga zikomeje gukoreshwa kugira ngo iki kigega gitere imbere.

Yagize ati “Burya igihe udafite igipimo ureberaho ntabwo umenya uko uhagaze. Iki gipimo kirimo kudufasha kuvuga ngo za ngufu twashyizemo n’abandi bafatanyabikorwa hari umusaruro zatanze. Kuba ku bwa mbere badushyize ku mwanya wa kabiri ni umusaruro mwiza ariko turacyafite urugendo.”

Igihugu cyaje ku mwanya wa mbere ni Nigeria yahize u Rwanda ku bijyanye n’ingano y’ubwizigame. Kuri iyi ngingo ifite amanota 0.29% mu gihe u Rwanda rufite 0.04%. Muri rusange Nigeria ifite amanota 62.49% naho u Rwanda rukagira 62.24%.

U Rwanda rwabonye amanota menshi mu miyoborere no gukorera mu mucyo aho ku manota 35% rufite 34.70%. Ikigega Agaciro usanga gitandukanye n’ibindi bigega by’ibihugu by’ubwizigame kuko ibyinshi usanga bifite ubukomoka ku mutungo kamere mu gihe cyo ari Leta n’abaturage bakusanya imari ikijyamo.

Agaciro Development Fund ni ikigega cyashyizweho mu Nama y’Umushyikirano ya Cyenda gitangizwa ku mugaragaro na Perezida Paul Kagame ku wa 23 Kanama 2012. Iki kigega kiyoborwa n’Inama y’ubutegetsi (Board) ishyirwaho n’Inama y’Abaminisitiri kigakorerwa ubugenzuzi buri gihembwe.

Kugeza ubu Agaciro Development Fund ifite ubwizigame bwa miliyari 49.6 z’amafaranga y’u Rwanda avuye kuri miliyari 18 yatangiranye mu 2012.

Ibihugu byashyizwe kuri uru rutonde ni Nigeria, u Rwanda, Ghana, Angola, Sénégal, Gabon, Botswana, Morocco, Libya, Algeria, Guinée Équatoriale na Mauritania.

Muri Gicurasi 2018, abanyeshuri 34 biga muri Lycée de Ruhango Ikirezi bakusanyije amafaranga y’impamba bahawe n’ababyeyi babo angana n’ibihumbi 100 Frw bayashyira mu Kigega Agaciro
Umuyobozi ushinzwe Imari mu Kigega Agaciro, Patrick Marara Shyaka, yasobanuye ko iki gipimo ari ugushima imbaraga zikomeje gukoreshwa mu rugendo rwo kwigira
Agaciro Development Fund ni ikigega cyashyizweho mu Nama y’Umushyikirano ya Cyenda gitangizwa ku mugaragaro na Perezida Paul Kagame ku wa 23 Kanama 2012

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza