00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwatangiye kohereza avoka mu mahanga hakoreshejwe ubwato

Yanditswe na Igizeneza Jean Désiré
Kuya 26 Ugushyingo 2022 saa 08:55
Yasuwe :

Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi, NAEB cyatangaje uburyo bwatangijwe bwo kohereza avoka mu mahanga hakoreshejwe ubwato buzongera umusaruro ku buryo ushobora kuva kuri miliyoni 4.5$ ukagera kuri miliyoni 9$ ku mwaka.

Iyi ntego yagarutsweho ku wa Gatanu tariki 25 Ugushyingo 2022, mu muhango wo gutangiza ku mugaragaro iyoherezwa rya avoka mu mahanga hakoreshejwe ubwato. Iki gikorwa cyabereye mu cyanya cy’inganda giherereye i Masoro.

Mbere kohereza avoka mu mahanga hakoreshwaga indege, aho kuzitwara byatwaraga 1$ ku kiro, ibyatumaga hagenda nkeya, mu gihe kuzitwara hakoreshejwe ubwato bitazajya birenga 0.6$ ndetse ikamyo imwe ikaba yatwara toni zirenga 20 icyarimwe izigeza ku cyambu.

Ni uburyo kandi buzafasha mu gutuma avoka zituruka mu Rwanda zihora ku masoko mpuzamahanga kuko zizajya zigemurwa ku bwinshi bityo ibibazo by’ibura ryazo rya hato na hato bigahinduka amateka.

Umuyobozi w’ishami rishinzwe guteza imbere ibihingwa bishya n’ibikomoka ku matungo byoherezwa mu mahanga muri NAEB, Munyaneza Jean Marie Vianney yavuze ko avoka za mbere zijyanywe n’ubwato zizoherezwa i Dubai, anemeza ko mu minsi iri imbere bazagurira ibikorwa ku yindi migabane.

Ati "Hari izindi avoka duteganya vuba kohereza i Burayi ku Cyambu cya Rotterdam, turebe muri rusange iminsi bitwara, umwimerere zizahagerana n’ibindi. Duteganya kwagura iki gikorwa ku buryo kizagera mu bice byose by’Isi."

Yatangaje ko uko ibihe bihita ari na ko umusaruro wiyongera "kuko mu mwaka wa 2020/2021 twinjije miliyoni 1.6$ na ho mu 2021/2022 hinjira 4.5$, turashaka ko wiyongera ku buryo uzagera kuri miliyoni 8$ cyangwa 9$."

Mu 2020 umusaruro wa avoka zoherezwa mu mahanga wavuye kuri toni 1000 zigera kuri toni 2600.

Umuyobozi w’Ikigo cyohereza imbuto n’imboga hanze y’igihugu cya Garden Fresh, Harerimana Emmanuel nawe avuga ko bizeye inyungu irenze ku yo babonaga, gusa yemeza ko bagikeneye umusaruro utubutse cyane ko ubwato buzajya butwara izirenze izatwarwaga.

Ati "Turi gufatanya n’abafatanyabikorwa dufatanije na NAEB na Minisiteri y’Ubuhinzi n’Ubworozi ku buryo haboneka ibiti bya avoka byinshi, mu myaka itatu umusaruro uzaba wabaye mwinshi cyane."

Mugenzi we, Umugwaneza Latifa washinze ikigo High Lum na cyo cyohereza mu mahanga ibikomoka ku buhinzi, yavuze ko ubu buryo buje kunganira ubwari busanzwe ku buryo avoka zituruka mu Rwanda zigiye kwiyongera mu gihe igiciro cyo kubigezayo cyo kitazahinduka.

Ati "Nk’ubu iyo turi mu bihe byiza na toni 50 turazitanga, urumva niba hiyongereyeho ubundi buryo bwo kuzigeza ku isoko mpuzamahanga, ingano twajyanaga iziyongera bityo n’umusaruro twakuragamo wiyongere."

Ni igikorwa cyagezweho ku bufatanye n’inzego zitandukanye zirimo Leta y’u Rwanda, Umuryango w’Abahorandi ufasha abikorera mu kohereza imboga n’imbuto hanze wa IDH, abohereza hanze avoka ndetse n’abandi.

Umuyobozi wa IDH mu Rwanda, Nirere Sylvie yavuze ko impamvu nyamukuru yatumye batekereza iki gikorwa ari uko abaguzi bo mu mahanga batangiye kugura ibicuruzwa by’ibihugu byabagezeho bikoresheje ubwato mu kurengera ikirere, "u Rwanda rero na rwo ntirwagombaga gusigara."

Umuyobozi ushinzwe ubutwererane n’Iterambere muri Ambasade y’Abaholandi mu Rwanda, Martin Koper yavuze ko iyi gahunda ihuza neza na politiki y’u Buholandi yo guteza imbere ubucuruzi burambye mu Rwanda, yemeza ko "hakenewe ubufatanye butandukanye kugira ngo urwego rwo guteza imbere imboga n’imbuto rutere imbere.

Avoka zoherezwa mu mahanga kurusha izindi ni izo mu bwoko bwa Hass ndetse na Fuerte. Kugeza ubu mu Rwanda hari ibiti by’avoka birenga miliyoni 1.5 zihinzwe ku buso bwa hegitari 6000.

U Rwanda rwatangiye kohereza avoka mu mahanga hakoreshejwe ubwato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .