U Rwanda rwasobanuye ibya $ 35 acibwa abashoferi binjije ibicuruzwa banyuze ku mupaka wa Rusumo

Yanditswe na IGIHE
Kuya 8 Ukuboza 2020 saa 07:30
Yasuwe :
0 0

Umunyamabanga wa Leta muri Ministeri y’Ububanyi n’Amahanga ushinzwe umuryango wa Afurika y’Iburasirazuba, Prof Nshuti Manasseh, yatangaje ko amadolari 35 acibwa buri kamyo yinjije ibicuruzwa mu Rwanda ivuye muri Tanzania, atari umusoro ahubwo ari aya serivisi bahabwa bategereje gufashwa ngo ibicuruzwa byabo byinjire.

Abitangaje nyuma y’uko inama y’abacuruzi bo mu muryango wa Afurika y’Iburasirazuba ( East African Business Council, EABC) tariki 30 Ugushyingo yatangaje ko hari imbogamizi ku madolari 35 acibwa imodoka zitwaye ibicuruzwa zinjiye mu Rwanda, agatangwa nk’agamije gufasha abacuruzi kubona icumbi n’ibyo kurya mu gihe bari mu bigo by’agateganyo byakira abatarapimwa Covid-19.

Nshuti Manasseh yavuze ko EAC igira amategeko n’amabwiriza agena uko ibintu bigenda ku bicuruzwa bigeze ku mupaka, icyakora kubera coronavirus, hari byinshi byahindutse mu buryo ibicuruzwa byasohokaga mu gihugu n’uko byinjiraga.

Ati “Ariya madolari 35 ntabwo yishyurwa Guverinoma, ajya mu bikorera bita ku byo abashoferi bakeneye nk’amafunguro, gutera imiti yica virusi mu gihe bategereje ko imizigo yabo igenzurwa. Ubundi yahoze ari amadolari 50, none ubu ni amadolari 35.”

Prof Nshuti yavuze ko ayo mafaranga adakwiriye gufatwa nk’umusoro, ndetse yerekana ko hari ibindi bikorwa batishyuzwa nko kurindirwa umutekano bava ku mupaka kugeza aho imodka igiye.

Ati “Ntabwo bakwiriye kubibona nk’ibigamije kubangamira ubucuruzi. Covid-19 niyo ibangamye, umunsi yarangiye ibintu bizasubira mu buryo.”

Umuyobozi ushinzwe ubucuruzi bw’imbere mu gihugu muri Minisiteri y’Ubucuruzi n’Inganda, Cassien Karangwa, yabwiye The New Times ko umwanzuro wo guca ayo mafaranga wabanje kumenyeshwa ibindi bihugu bigize EAC mbere yo kuwushyira mu bikorwa.

Mu bindi inama y’abacuruzi ba EABC yagaragaje ko bibangamiye ubucuruzi, ni ugupima Covid-19 ku mipaka, aho yasabye ko hakoreshwa uburyo bw’ikoranabuhanga rya GPS rimenya aho umushoferi yanyuze, kugira ngo hirindwe ko apimwa aho anyuze hose.

Mu nama EABC iherutse kugirana n’abashinzwe kugenzura umupaka uhuriweho wa Rusumo, basabye ko habaho guhuza ibiciro no kugabanya amafaranga bacibwa ajyanye no kugenzura ibicuruzwa byerekeye n’ibiribwa n’imiti iyo binjiye mu Rwanda.

Bavuze ko imodoka itwaye ibyo bicuruzwa icibwa 0.8 % mu gihe ahandi ari 0.2 %. Karangwa yavuze ko bagiye kuganira n’izindi nzego bireba babishakira umuti.

Prof Nshuti yavuze ko ikibazo cy’amafaranga ahanitse acibwa ku bijyanye n’ibiribwa n’imiti, kigiye gitandukanye mu karere. Yavuze ko hakozwe inyigo igaragaza uburyo ibiciro byahuzwa, bakaba bategereje icyo Tanzania ivuga kuri iyo raporo.

Umupaka wa Rusumo ufatwa nk’ukomeye cyane kuko unyuraho 80% by’ibicuruzwa byinjira mu Rwanda bivuye ku cyambu cya Dar es Salaam. Mbere ya Coronavirus wanyuragaho amakamyo 400 ku munsi, icyakora kubera icyorezo yaragabanyutse agera kuri 235 ku munsi.

Inama y'abacuruzi muri EAC yasabye ko amadolari 35 acibwa abatwaye amakamyo ku mupaka wa Rusumo yakurwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .