MTN igiye guhagarika ibikorwa byayo mu Burasirazuba bwo Hagati

Yanditswe na IGIHE
Kuya 10 Kanama 2020 saa 08:18
Yasuwe :
0 0

Ikigo cya mbere muri Afurika mu Itumanaho rya Telefoni, MTN Group, cyatangaje ko kigiye guhagarika ibikorwa mu Burasirazuba bwo Hagati, kugira ngo kirusheho gushyira imbaraga ku Mugabane wa Afurika.

Umuyobozi Mukuru wa MTN Group, Rob Shuter, yabitangaje ku wa 5 Kanama ubwo iki kigo cyatangazaga inyungu yacyo y’igice cya mbere cy’uyu mwaka.

Yavuze ko muri ibi bihe by’icyorezo, MTN yongereye imbaraga mu kwita ku bakozi n’abakiliya bayo, aho bamwe bakorera mu ngo, ndetse ikagira uruhare mu kwita ku bagizweho n’ingaruka n’iki cyorezo muri rusange.

Shuter yatangaje ko mu gihe kiri imbere, iki kigo kigiye kwibanda cyane ku isoko ryo muri Afurika kurusha uko byari bisanzwe.

Yagize ati “Mu bikorwa bikomeje byo gusuzuma imikorere yacu, twumva neza ko mu gihe kiri imbere ikigo cyabona inyungu kurushaho mu kwita kuri gahunda yacyo muri Afurika. Bityo tuzava ku isoko ryo mu Burasirazuba bwo Hagati mu buryo bwateguwe neza bw’igihe kiringaniye. Nk’intambwe ya mbere, tugeze kure ibiganiro byo kugurisha imigabane 75% dufite muri MTN Syria.”

Biteganywa ko iyo migabane izagurwa na TeleInvest bari kuganira, ari nayo yari isanganywe imigabane mike muri MTN Syria ingana na 25%.

MTN Group izanagurisha ibikorwa byayo muri Yemen na Afghanistan, inagurishe 49 ku ijana by’imigabane ifite muri MTN Irancell.

Bibarwa ko ibikorwa bya MTN mu Burasirazuba bwo Hagati, byari byihariye 4% by’amafaranga yinjiye, mbere yo kubara inyungu, imisoro n’ibindi.

MTN Group ivuga ko igice cya mbere cy’uyu mwaka yakoze neza, aho yabashije kongera abafatabuguzi miliyoni 10.6 ku muyoboro wayo, bakagera kuri miliyoni 261.5, ndetse yabashije kurenza miliyoni 100 z’abakoresha internet yayo, ikagira miliyoni 38 bakoresha serivisi za Mobile Money.

MTN Group igiye guhagarika ibikorwa byayo mu Burasirazuba bwo Hagati

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .