KCB Bank yahuguye abacuruzi basaga 200 muri gahunda yayo ya Biashara Club

Yanditswe na Akayezu Jean de Dieu
Kuya 15 Ugushyingo 2019 saa 08:03
Yasuwe :
0 0

Banki y’Ubucuruzi ya KCB Bank Rwanda Plc, yahuguye ba rwiyemezamirimo n’abacuruzi babarizwa muri Biashara Club ku buryo bwabafasha kugira ubucuruzi bufite icyerekezo kandi buzaramba na nyuma yabo.

Gahunda ya Biashara Club yatangijwe muri Kanama 2019, igamije gufasha abacuruzi bo mu Rwanda kubona amahugurwa ku byo bakora no kubahuza na bagenzi babo mu bihugu byo mu Karere n’ibyateye imbere mu bucuruzi hirya no hino ku Isi.

Kuri uyu wa Kane tariki 14 Ugushyingo 2019, nibwo ku nshuro ya mbere ba rwiyemezamirimo n’abacuruzi bagera kuri 200 bahawe amahugurwa nk’imwe mu ntego ya Biashara Club.

Bahuguwe ku buryo bwo kugira ubucuruzi buhamya, imiyoborere y’ibigo byabo ndetse no gutegura ahazaza bijyanye n’umuntu uzagusimbura mu bucuruzi bwawe haba ku buyobozi cyangwa igihe uzaba utakiriho.

Umuyobozi w’Ishami rishinzwe abakiliya n’uburyo bwo guhererekanya amafaranga muri KCB Bank, Innocent Ntwali yavuze ko aya mahugurwa yateguwe hagamijwe gutanga ibirenze serivisi za banki mu rwego rwo gutsura umubano hagati ya banki n’abakiliya.

Yagize ati “ Birabafasha cyane kuko niba bigishwa uko bacunga ibigo by’ubucuruzi bwabo ni ikintu gikomeye umuntu wese aba akeneye kandi uko batera imbere twe nka banki tubyungukiramo.”

Prof. Karuranga Egide, wabahuguye yababwiye ko umuntu utegura umushinga aba agomba kureba uburyo ibikorwa bye bizabaho n’igihe we azaba atakiriho.

Yavuze ko “Nk’urugero niba ufite imyaka 40 ugatangiza umushinga uba ugomba gutegura ikintu kizamara imyaka 100, ibi rero bishoboka igihe utangiye kujya utegura uzagusimbura ku buryo rya zina ry’ikigo rizakomeza kubaho.”

Yavuze ko niba umuntu afite umuryango, aba agomba kuganira nawo nk’umuntu ufite umwana agatangira kumutoza uko ibyo akora bikorwa kugira ngo azabisigarane kandi abikore neza nk’uko umubyeyi we yabikoraga cyangwa akarushaho.

Abitabiriye aya mahugurwa bagaragaje ko ubumenyi batahanye burabaherekeza mu bucuruzi bwabo kandi biteze impinduka ziganisha ku iterambere.

Murera Mathias ufite iduka ryitwa One Stop Shopping rikora ubucuruzi yagize ati “Ubundi umuntu yacuruzaga agashaka amafaranga ariko batubwiye ko iyo ufite ubucuruzi ugomba gutegura abazagusimbura kandi ukamenya ko kuganira ku bucuruzi bitangirira mu muryango.”

Uwitwa Murekatete Francine yagize ati “Mbonye aya mahugurwa yari meza ku giti cyanjye, abatangiye bakora business hari ubuyro twayikoraha umeze nk’uyirundamo, ukumva byose biri kuri wowe."

"Nabonye hari uko ngomba kujya nshyira abanyu mu myanya kugira ngo imikorere irusheho kunoga.”

Kugeza ubu KCB Bank ikorana n’abacuruzi babarirwa mu bihumbi 100 barimo abakora ubucuruzi buciriritse n’ubwo ku rwego rwo hejuru, abari muri Biashara Club babarirwa muri 400, bose bazahugurwa muri iyi gahunda.

Ibisabwa kugira ngo umucuruzi yemererwe kujya muri Biashara Club, ni ukuba uri umucuruzi kandi uri umukiliya wa KCB Bank, kwishyura amafaranga ibihumbi 100Frw y’ubunyamuryango buri mwaka cyangwa ibihumbi 12 Frw buri kwezi.

Ubuyobozi bwa KBC Bank bwatangaje ko aya mahugurwa azakomeza mu Cyumweru gitaha mu Karere ka Huye mu Majyepfo n’I Rubavu mu Burengerazuba.

Abacuruzi batandukanye bitabiriye amahugurwa yateguwe na KCB Bank
Abacuruzi bahawe umwanya wo gutanga ibitekerezo
Bamwe mu bacuruzi bari muri Biashara Club bitabiriye amahugurwa bavuze ko bungukiyemo byinshi
Prof. Karuranga Egide, yabwiye ba rwiyemezamirimo ko ibiganiro ku bucuruzi bitangirira mu muryango
Murera Mathias yavuze ko aya mahugurwa ayungukiyemo byinshi bigiye kumufasha gukomeza kuzamura ubucuruzi bwe
Umuyobozi w'Ishami ry'abakiliya muri KCB Bank, Innocent Ntwali yavuze ko aya mahugurwa ari gahunda izahoraho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza