Iposita y’u Rwanda yinjije ikoranabuhanga rishya muri serivisi itanga

Yanditswe na Twarabanye Venuste
Kuya 19 Kamena 2020 saa 07:57
Yasuwe :
0 0

Ikigo cy’Igihugu cy’Amaposita cyatangaje ko muri gahunda zo kuvugurura ibikorwa byacyo kiri kurushaho kwimakaza ikoranabuhanga mu rwego rwo kunoza serivisi gitanga.

Umuyobozi Mukuru w’Iposita, Kayitare Célestin, yabigarutseho ubwo batahaga ku mugaragaro inyubako y’iposita, Ishami rya Huye bavuguruye.

Yavuze ko kuvugurura inyubako bakoreramo biri muri gahunda rusange yo kuvugurura imikorere y’iposita no guhindura isura y’icyo kigo cyakunze kugaragara nk’igikora ibintu bishaje, kiba ahantu hashaje cyangwa kitajyana n’ibihe.

Gahunda rusange irimo kuvugurura inyubako iposita ikoreramo, kongera serivisi batanga no kunoza izisanzwe hakaba no guhindura imikorere ikajyana n’ikoranabuhanga kurusha uko byari bisanzwe.

Yagize ati “Ni muri gahunda yo kwivugurura, muri rusange dutanga isura nziza ariko atari mu bishushanyo gusa cyangwa ku nzu zigaraga neza, ahubwo no mu mikorere ndibwira ko tuzajya twerekana imikorere myiza ku batugana kugira ngo bumve ko twahinduye imikorere ariko tunakora n’ibintu mu buryo bujyanye n’igihe. Bizatuma n’uje aho dukorera asanga hasukuye hameze neza ariko na serivisi agasanga inoze.”

Mu bijyanye no kuvugurura serivisi, Kayitare yavuze ko harimo gucengeza cyane ikoranabuhanga mu mikorere y’Iposita y’u Rwanda.

Yagize ati “Mu bijyanye na serivisi ni ukuvugurura imikorere tugenda ducengeza kurushaho ikoranabuhanga. Nakubwira nk’ubu dufite serivisi yari imenyerewe abantu baza mu iposita gufata ubutumwa bwabo. Ubundi abantu bafataga inzira bakaza kureba mu iposita niba ubutumwa bwabo bwarahageze. Ubu tubibamenyesha batari baza.’’

“Dufite ikoranabuhanga rizajya ribwira abantu ko ubutumwa bwabo bwahageze bityo bakaba bashobora kuza kubufata bikabarinda ko bashobora kuza batabizi bahagera bagasanga wenda nta burimo.”

Ku rundi ruhande yagaragaje ko iposita izunganirana n’ubucuruzi bukoresha ikoranabuhanga (e-Commerce) aho abantu banyura ku mbuga z’ubucuruzi bagahaha nayo ikabibagezaho.

Yagize ati “Iposita irifuza kuba umuyoboro wizewe kandi udahenze, ufasha buri wese kubona ibyo yatumije hakoreshejwe ikoranabuhanga.”

Akarere ka Huye katangaje ko kuvugurura iyo nyubako byazamuye isura y’Umujyi wa Huye uri mu yunganira Kigali.

Inyubako y’Ishami ry’Iposita ya Huye iherereye mu Mudugudu wa Karubanda, Akagari ka Butare, Umurenge wa Ngoma, mu Karere ka Huye. Imirimo yo kuyivugurura yatwaye miliyoni 48 Frw.

Ikigo cy’Igihugu cy’Amaposita (NPO) cyashyizweho mu 1992, gikorana n’andi maposita yo mu bindi bihugu ku Isi ari nabyo bigifasha gutanga serivisi ku bantu bagira ibyo batumiza mu mahanga, ikababibagezaho mu Rwanda. Ihuriro ry’amaposita ku Isi ririmo agera ku bihumbi 660.

Umuyobozi Mukuru w’Iposita, Kayitare Célestin, mu muhango wo gutaha ku mugaragaro inyubako y’iposita, Ishami rya Huye
Inyubako ivuguruye y'Ishami ry'Iposita mu Karere ka Huye yahinduye isura y'Umujyi wa Huye uri mu yunganira Kigali
Imirimo yo kuvugurura iyi nyubako yatwaye miliyoni 48 Frw
Inyubako y'Iposita Ishami rya Huye yamuritswe ku wa 18 Kamena 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .