Inyungu ya BK Group Plc yageze kuri miliyari 27.4 Frw mu 2018

Yanditswe na Ishimwe Israel
Kuya 28 Werurwe 2019 saa 02:46
Yasuwe :
0 0

BK Group Plc yatangaje ko mu mwaka ushize yungutse miliyoni 30.7 z’amadolari, ni ukuvuga agera kuri miliyari 27.4 Frw mu mwaka wa 2018, bingana n’inyongera ya 17.2% ugereranyije n’umwaka wabanje.

Kuri uyu wa 28 Werurwe 2019 nibwo BK Group PLC yashyize ahabona inyungu yabonye nyuma yo kwishyura imisoro mu mwaka ushize kugeza ku wa 31 Ukuboza 2018.

Umuyobozi wa BK Group Plc, Dr Karusisi Diane, yavuze ko mu mwaka ushize ubukungu bw’igihugu bwazamutse ku kigero gishimishije cya 8.6%, bigatuma n’ubw’iki kigo bukomeza gutera imbere nta nkomyi.

Yagize ati “Ibikorwa byacu byose byaba muri banki, mu bwishingizi, ikoranabuhanga n’izindi serivisi z’imari zitangwa na BK Capital byateye imbere. Turashimira abakiliya n’abashoramari batugannye, turabateganyiriza izindi serivisi nziza muri uyu mwaka.’’

Inyungu BK Group Plc ishingiye ku nguzanyo yatanze mu 2018, kuko zageze kuri miliyari 568.1 Frw, inyongera ya 20.4% ugereranyije n’umwaka wabanje.

Yavuze ko “Iyo dutanze amafaranga menshi natwe turunguka kuko abantu bishyura inyungu ku nguzanyo. Ubucuruzi bwacu bwanarenze banki, ubu turatanga ubwishingizi. Uyu munsi dufite amafaranga ahagije yo gutanga mu nguzanyo no gushora mu ikoranabuhanga.’’

Iyi banki ya mbere mu Rwanda, umutungo mbumbe wayo wazamutseho 20.7% ugera kuri miliyari 877.4 Frw mu 2018.

BK Group Plc ibumbiye hamwe ibigo birimo Banki ya Kigali, BK TecHouse, BK General Insurance na BK Capital.

Dr Karusisi yavuze ko “Ibigo byacu byitwaye neza byatumye twinjiza miliyari 27.4 Frw. Turakomeza kwibanda ku guha agaciro abanyamigabane bacu no gutegura uko iyi mibare yazazamuka mu mwaka wa 2019.’’

Umuyobozi wa BK Capital, itanga ubujyanama mu by’imari, Umutoni Carine, yavuze ko “BK Capital imaze ibyumweru bibiri itangijwe ku mugaragaro ariko yatangiye gukora mu mezi ya nyuma ya 2018 kandi yabonye miliyari ya 1.7 Frw binyuze muri gahunda yo kuzigamira izabukuru iri mu zo kigenzura.’’

Ni ubwa mbere BK Group Plc itangaje inyungu yayo kuva yageza imigabane ku isoko ry’imari n’imigabane i Nairobi muri Kenya. Iyi migabane miliyoni 222.2 yatangiye gucuruzwa ku wa 29 Ukwakira 2018 aho umwe uhagaze 270 Frw.

Dr Karusisi yavuze ko “Haracyari kare ngo tumenye ingaruka byagize ariko twizera ko nyuma yo gutangaza iyi mibare, hagiye kuboneka abantu benshi bagura imibagane yacu kuko twitwaye neza.’’

Mu 2018, Banki ya Kigali yakiriye abakiliya bato barenga 290,000 n’ibigo 24,000; yaguye aba-agent bayo ho abagera kuri 1,427. Ihererekanya ryabaye ringana na miliyoni ebyiri rifite agaciro ka miliyoni 103.6 Frw.

Ifite amashami 79, ibyuma bitanga amafaranga bizwi nka ‘ATM’ 95 n’utwuma 1,611 twishyurirwaho twa POS dushobora kwakira amakarita mpuzamahanga ya VISA na MasterCard.

BK Group PLC ifite intego yo kuba ikigo gifite agaciro ka miliyari y’amadolari ya Amerika mu gihembwe cya mbere cya 2019.

Abayobozi n'abakozi ba BK Group Plc bitabiriye igikorwa cyamurikiwemo uko ubukungu bwa banki bwari bwifashe mu gihembwe cya kane cya 2018 n'umwaka wose
Abayobozi bakuru muri BK Group Plc ubwo hatangazwaga inyungu Banki ya Kigali yabonye mu 2018
Inyungu BK Group PLC yabonye mu 2018 yatangarijwe mu nyubako ikoreramo mu Mujyi wa Kigali rwagati
Umuyobozi ushinzwe Imari, Nathalie Mpaka, yavuze ko inyungu ya BK Group yazamutse kandi izakomeza kwiyongera kurushaho kubera imikoranire myiza hagati ya banki n'abakiliya
Umuyobozi wa BK Capital, itanga ubujyanama mu by’imari, Umutoni Carine
Umuyobozi wa BK Group Plc, Dr Karusisi Diane, yavuze ko muri uyu mwaka banki ihishiye byinshi abakiliya bayo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza