00:00:00 IGIHE NETWORK KN KINYARWANDA EN ENGLISH FR FRANCAIS

Inkomoko y’Imigongo Art Center imaze kwigarurira imitima y’abakunda ikawa i Kayonza

Yanditswe na Hakizimana Jean Paul
Kuya 31 May 2022 saa 05:36
Yasuwe :

Niba ujya ukoresha umuhanda Kigali-Kayonza ugakomeza mu tundi turere cyangwa muri Pariki y’Igihugu y’Akagera, ushobora kuba waribazaga impamvu kuri uwo muhanda hatagaragara ahantu umuntu ashobora kugura ikawa ’Coffee’ cyangwa ibindi bintu byo kurya, ku buryo yahita yikomereza urugendo.

Ni inenge yari izwi ku bantu bakoresha uyu muhanda kuko bagereranyaga n’ibyo babona ahazwi nka Nyirangarama ku bajya Musanze na Rubavu cyangwa ahahoze hazwi nko kwa Hadji ku bajya i Huye n’ahandi henshi ntari burondore muri iyi nkuru.

Rimwe ndibuka nigeze kugendana n’abanyamakuru bagenzi banjye bagenda banenga uburyo abatuye Iburasirazuba badakoresha neza amahirwe bafite kandi haca ba mukerarugendo benshi bajya gusura Pariki y’Akagera, muri weekend ho biba akarusho kuko abantu benshi bajya gusura inka zabo abandi bakajya gusura imiryango.

Iyo nenge yabaye amateka. Kuri ubu buri wese werekeza muri iki gice ashobora kuba yarabonye ahantu hitwa Imigongo Art Center, aha ni ku muhanda urenze gato Umujyi wa Rwamagana, ukarenga ahazwi nko kwa Gahiza mbese ugitangira kwinjira mu Karere ka kayonza.

Ni ahantu usanga ikawa nziza cyane iva mu zihingwa muri aka Karere ndetse no mu Ntara y’Iburasirazuba n’ibindi biribwa n’ibinyobwa bitandukanye byagufasha kwica isari. Uretse ibyo, unahasanga ibishushanyo byakozwe n’abanyabugeni batandukanye, ibirayi, ibitoki, imbuto bifunze neza bya Kinyarwanda, ibi nabyo watwaraho.

IGIHE yaganiriye na Ashimwe Charles washinzwe iki kigo mu mwaka wa 2018 nyuma yo kubona urujya n’uruza kuri uyu muhanda wa Kayonza ariko batagira aho bashobora kwicira isari ku muhanda ubundi bagakomeza urugendo.

Ashimwe avuga ko igitekerezo cyo gushinga ibi bikorwa cyaje hagamijwe kureba uko yazana impinduka muri aka karere ngo kuko yari amaze igihe ahabona amahirwe menshi ariko atazi uko yayabyaza umusaruro.

Yavuze ko agitangira byari bigoye cyane ngo kuko atari yakanogeje ibyo azakora neza ariko ngo kuri ubu biri kugenda neza, aho bakora ibintu by’ubukorikori, ubugeni, kwakira ababagana bakoresha ibiribwa, ibinyobwa, umusaruro uturuka ku buhinzi n’ubworozi n’ibindi byinshi.

Ati “Ubu hano twaharemye akazi ndetse n’ibintu bihoraho bifasha abantu banyura kuri uyu muhanda wacu. Ubu nta muntu waturuka i Kigali ngo wenda agere muri Pariki atarabona ibimuramira kuko iyo aciye hano ahabona ikawa yacu hano Kayonza akagenda ayinywa yumva uburyohe bwayo, ikindi ahabonera ibishushanyo by’ubugeni n’ibihingwa duhinga inaha ku buryo na byo iyo abishimye abigura.”

Ashimwe avuga ko kuri ubu afite abakozi 50 bahoraho nyamara mu itangira rye mu 2018 yari afite abakozi babiri gusa.

Kimwe mu bimushimisha ngo ni ukuntu abakerarugendo ndetse n’abandi baturage basigaye bahagarara iwe nibura bamwe bakabona ibibafasha mu kwica isari bagakomeza urugendo nta bibazo bagize.

Ikawa ya Kayonza yongerewe agaciro

Akarere ka Kayonza gafite ibiti bya kawa 2 500 000, kabarizwamo kandi inganda esheshatu zitunganya kawa ku mwaka nibura haboneka umusaruro ungana na toni ibihumbi 180.

Ikawa ituruka mu Karere ka Kayonza ni imwe mu ikundwa cyane hirya no hino ku isi kuko mu myaka yashize yagiye itoranywa mu marushanwa mpuzamahanga.

Ashimwe avuga ko ikawa ya Kayonza ikundwa cyane na ba mukerugendo ndetse n’abanyarwanda benshi bahanyura kuko iryoha ndetse ikanagira impumuro nziza. Kuba Imigongo Art Center ihari, byatumye abahinzi ba kawa bunguka kuko babonye isoko hafi.

Ati “Iyo uje hano ukagura ikawa yacu dore ko ikundwa cyane, uba uteye inkunga wa muhinzi uyihinga kuko bituma nanjye nsubira kuyimugurira kandi nkanamubwira ko abantu bayikunda, iyo mukerarugendo anyuzeho akabona imitako dukora ahava amenye byinshi ku Rwanda.”

Ashimwe avuga ko ari iby’agaciro kwakira ba mukerarugendo benshi basura Pariki y’Akagera kuko bava i Kayonza babonye na byinshi mu bikorwa n’abanyarwanda yaba ibijyanye n’ubuhinzi, ubukorikori n’ibindi byinshi.

Ati “Abantu barahitaga hano Kayonza ariko ubu bahagararaho gato hano iwacu bikaduha amahirwe yo kubereka ibyiza dufite, nibura hano twakiriya abantu bake ni 100 ku munsi ubundi bararenga, urumva uwo mubare ni abantu bakeneye kubona serivisi nziza kandi bakamenya byinshi ku gihugu cyacu.”

Urubyiruko rwahabonye akazi ku bwinshi

Mu bakozi 50 Ashimwe akoresha 90% ni urubyiruko naho 60% ni igitsina gore kuko aribo biganje mu gutunganya kawa no kwakira neza ababagana.

Mukantwari Mariam wabonye akazi mu Imigongo Art Center mu 2020, avuga ko kuri ubu amaze kuhamenyera gutegura ikawa neza.

Ati “Naje hano ntazi gutegura ikawa ariko ubu maze kubimenya neza ku buryo nanjye nshobora gufasha abandi, ikindi amafaranga mpembwa hano amfasha mu kwiteza imbere nkafasha umuryango wanjye.”

Ngabonziza Bonfils usanzwe ari umunyabugeni mu Imigongo Art Center, avuga ko babonye ahantu heza bamurikira ibishushanyo Nyarwanda byerekana umuco n’imibereho y’icyaro.

Yongeraho ko uretse abanyamahanga benshi bakunze kubagurira kuri ubu n’abanyarwanda ngo basigaye baramenye agaciro k’ubugeni.

Ati “Abanyarwanda nabo bamaze gutangira kubyumva kuko baraza hano bagasura bakatubaza ibiciro bamwe bakanagura, navuga ko rero hano hatumye ibihangano byacu bigira agaciro.”

Abakiriya bishimiye Imigongo Art Center

Bugabo Nicole ukoresha umuhanda wa Kigali Kayonza nibura kabiri mu cyumweru yavuze uburyo Imigongo Arts Center yamufashije kubona ahantu yicira isari kandi ngo ku muhanda.

Ati “Njye maze imyaka irenga itatu kuko mbere nacaga hano nkabura aho nakwiyakirira ariko ubu narahabonye. Nibura nza Iburasirazuba inshuro ebyiri mu cyumweru, urumva izo nshuro zose nca hano kandi banyakira neza.”

Kenyatta Moses we avuga kimwe mu byo yahakundiye ari uko hari ibintu nyaburanga byerekeranye n’umuco nyarwanda ngo ku buryo uwahinjiye ahakura ishusho y’uburyo abanyarwanda babayeho n’umuco wabo.

Ati “ Nakunze uburyo ibyo bakoresha byose ari Made in Rwanda guhera ku ntebe, imyenda bahacururiza, imitako byose birataka umuco nyarwanda, njye nanakunze ikawa yahoo ni nziza.”

Kuri ubu Ashimwe avuga ko yifuza gukomeza gukuza iki kigo yashinze ku buryo ngo nibura agera ku rwego rwo guha akazi abaturage 1000 avuye ku bantu 50. Yavuze ko yifuza gukuza ubuhinzi, kwigisha abantu gukora ubukorikori ndetse no kwigisha urubyiruko uburyo baba abahanga mu gutegura amafunguro n’ikawa muri rusange.

Ubuyobozi bw’Akarere ka Kayonza buvuga ko bwiyemeje kuzamura ubukerarugendo muri aka Karere nka kamwe mu kabarizwamo inyamaswa eshanu zikomeye ku isi, buvuga kandi ko bwashyize imbaraga mu gushyiraho ibice byinshi binywerwamo kawa kandi ku mihanda ku buryo byorohereza abagana aka karere.

Kenyatta Moses na mugenzi we bishimiye uko bakiriwe
Imyenda ya Made in Rwanda iri mu bihacururizwa
Mukantwari wabonye akazi mu Imigongo Art Center avuga ko ubu yamenye gutunganya kawa
Urubyiruko rwabonye akazi nyuma yo kwigishwa gukora imigongo
Ngabonziza ushushanya avuga ko kuri ubu abanyarwanda batangiye kugura ibishushanyo bikoze mu bugeni
Uretse kuhicira isari, abahageze banagura ibiribwa bitandukanye
Abajya muri Pariki y'Akagera ntibakicwa n'inzara kuko babonye aho banyura kandi batanga serivisi nziza
Abanyabugeni batandukanye baba bari gukora ibishushanyo bitandukanye
Ashimwe washinze Imigongo Art Center avuga ko afite intego zo kwagura iki kigo
Bugabo asigaye yishimira ko yabonye aho yicira isari agiye mu Burasirazuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .