Imyiteguro igeze kure ngo amasezerano ashyiraho isoko rusange rya Afurika atangire muri Mutarama

Yanditswe na IGIHE
Kuya 4 Ukuboza 2020 saa 10:34
Yasuwe :
0 0

Iminsi isigaye irabarirwa ku ntoki ngo amasezerano ashyiraho isoko rusange rya Afurika (AfCFTA) atangire kujya mu bikorwa, ibucuruzwa byakorewe muri Afurika byemererwe kuyicuruzwamo nta misoro ihanitse.

Ni uburyo bwitezweho gutangira tariki ya 1 Mutarama 2021, aho ibicuruzwa byakorewe kuri uwo mugabane bizaba bifite amahirwe yo gucuruzwa ku isoko ry’abaturage basaga miliyari batuye uyu mugabane, nta bisitaza bibangamira ubucuruzi nk’imisoro byatumaga umugabane wa Afurika uba isoko ry’iyindi migabane kurusha uko ari isoko ry’ibiwukorerwamo.

Icyakora mbere y’uko amasezerano atangira gushyirwa mu bikorwa, hari ibigekenewe kunozwa ngo bitazabangamira ubucuruzi ubwo igihe kizaba cyageze.

Minisitiri w’ubucuruzi n’inganda, Soraya Hakuziyaremye, yabwiye The New Times ko kuri uyu wa Gatandatu tariki 5 Ukuboza, hari inama idasanzwe ya y’Umuryango wa Afurika Yunze Ubumwe (AU) izemeza ibikenewe byose ngo amasezerano atangire gushyirwa mu bikorwa tariki ya 1 Mutarama 2021 nta nkomyi.

Ati “Nk’u Rwanda, dutegerezanyije amatsiko iki gikorwa, nyuma y’imyaka ibiri n’amezi umunani amasezerano ashyiraho isoko rusange asinyiwe i Kigali.”

“Nubwo Covid-19 yadukomye mu nkokora, EAC yabashije kujya mu biganiro bituma za gasutamo zitanga urutonde rw’ibicuruzwa byakuriweho imisoro mbere y’inama (izaba kuwa Gatandatu) . Byemejwe ku wa Gatatu (tariki 2 Ukuboza).”

Umujyanama mukuru ku masezerano ya AfCFTA muri Komisiyo ya AU, Prudence Sebahizi, yavuze ko hari byinshi bimaze gukorwa ngo amasezerano azatangire gushyirwa mu bikorwa muri Mutarama umwaka utaha.

Yagize ati “Ibihugu binyamuryango byamaze kurangiza ibiganiro ku kijyanye n’inkomoko y’ibicuruzwa ku kigero cya 80 %, ibijyanye n’imisoro nabyo byamaze gutangwa kugira ngo ubuhahirane butangire.”

Ibihugu 34 byamaze kugaragaza ibijyanye n’ibucuruzwa bizavanirwaho imisoro, mu gihe ibihugu 28 bimaze kubigenza gutyo ku bijyanye na serivisi.

Kugira ngo aya masezerano atangire gushyirwa mu bikorwa hakenewe kubanza gushyiraho urutonde rw’ibicuruzwa n’uburyo bisoreshwa, aho bikomoka n’inyandiko zigaragaza aho igicuruzwa cyemerewe gucuruzwa nta rutangira.

Urutonde rw’ibijyanye n’imisoro rugaragaza ibucuruzwa byakuriweho cyangwa byagabanyirijwe imisoro mu gihe byinjiye mu gihugu. Amategeko agenga inkomoko y’igicuruzwa agaragaza ibigenderwaho ngo igicuruzwa cyemerwe nk’icyakorewe ahantu runaka, ku buryo byoroha kumenya niba gihabwa rugari mu isoko rusange cyangwa niba kigomba gusoreshwa ngo cyinjiremo.

Minisitiri Hakuziyaremye yatangaje ko mu Rwanda hariho imikoranire hagati y’ibigo bya leta bitandukanye nka Minisiteri y’ubucuruzi n’inganda, Minisiteri y’Ububanyi n’amahanga, Ikigo cy’Imisoro n’amahoro, ikigo gishinzwe ibyoherezwa mu mahanga, urwego rw’abikorera n’abandi, kugira ngo ayo masezerano ku ruhande rw’u Rwanda azubahirizwe kandi atange umusaruro.

Yavuze ko u Rwanda rwiteguye kuba mu bihugu bya mbere bizatangira gucuruza ku isoko rusange rya Afurika.

Rwiyemezamirimo w’umunyarwanda, Solange Nisingizwe, ukora mu bijyanye n’ubudozi, yavuze ko hari amahirwe menshi amasezerano y’isoko rusange natangira gushyira mu bikorwa.

We na bagenzi be bashyizeho urubuga Cuumba.com bitezeho gukoresha bamamaza ibikorwa byabo, banabishakira amasoko hanze.

Yagize ati “Iki gitekerezo twakigize bitewe n’ubunararibonye twavanye muri Covid-19 ubwo ibintu byose byahagararaga. Turi gukora uburyo bwo kugeza ibicuruzwa byacu ku isoko kandi tuzajya tugenzura ko ibicuruzwa byageze ku mukiliya nk’uko Alibaba, Amazon n’izindi mbuga zibigenza.”

“Turi gupanga ko igihe ubucuruzi muri AfCTFA buzaba butangiye, tuzatangira gucuruza ku rwego rwa Afurika. Yego tuzahera mu rugo no mu karere, ariko intego ni muri Afurika hose.”

Ibihugu 54 muri 55 bigize Umuryango wa Afurika Yunze ubumwe byasinye amasezerano ashyiraho isoko rusange rya Afurika, mu gihe 34 aribyo bimaze kuyemeza burundu.

Byitezwe ko isoko rusange niritangira, ibicuruzwa byakorewe muri Afurika bizajya bicuruzwa nta nkomyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .