Ikinyuranyo cy’ibitumizwa n’ibyoherezwa mu mahanga cyazamutseho 12.1% mu gice cya mbere cya 2020

Yanditswe na IGIHE
Kuya 7 Nzeri 2020 saa 07:16
Yasuwe :
0 0

Banki Nkuru y’u Rwanda yatangaje ko ikinyuranyo hagati y’ibyo u Rwanda rutumiza mu mahanga n’ibyo rwoherezayo cyazamutseho 12.1% kigera kuri miliyoni $969.6, zivuye kuri miliyoni $864.7 mu gice cya mbere cya 2020, kubera ibibazo byabaye mu bucuruzi mpuzamahanga.

Kuri uyu wa Mbere nibwo BNR yatangaje ibijyanye na Politiki y’Ifaranga, mu gihe u Rwanda n’ibindi bihugu bihanganye n’icyorezo cya Coronavirus.

Ni amezi amaze igihe arimo imbogamizi zanagejeje aho hafatwa icyemezo ko abantu bose baguma mu rugo mu gukumira ikwirakwira rya Coronavirus, ku buryo ibikorwa n’umusaruro wabyo byagabanyutse mu nzego zose z’igihugu.

Ikigega Mpuzamahanga cy’Imari, IMF, giheruka gutangaza ko ubukungu bw’Isi muri uyu mwaka wa 2020 buzazamukaho -4.9%, mu gihe mu 2019 bwazamutseho 2.9%. Ni nako bimeze ku bw’u Rwanda, mu myaka itanu ishize bwazamukaga ku mpuzandengo ya 7.4%.

Mu mibare yatangajwe na BNR, inyungu u Rwanda ruvana mu bucuruzi bw’ibyoherezwa mu mahanga yazamutseho 9.1% mu gice cya mbere cy’umwaka wa 2020 igera kuri miliyoni $591.9, zivuye kuri miliyoni $542.3 zinjijwe mu gice cya mbere cya 2019.

Ibintu bimenyerewe bisanzwe byoherezwa mu mahanga byo byagabanutseho 23.5% ugereranyije n’umwaka ushize, mu gihe ibicuruzwa u Rwanda rutumiza mu mahanga byo byazamutseho 11.0%.

Byatumye ikinyuranyo hagati y’ibitumizwa mu mahanga n’ibyoherezwayo kizamukaho 12.1% ugereranyije n’umwaka ushize, kigera kuri miliyoni $969.6 mu gice cya mbere cya 2020, kivuye kuri miliyoni $864.7 mu gice cya mbere cya 2019.

Muri icyo gihe kandi ibiciro ku masoko bizamuka bigera ku 8.5 % mu gice cya mbere cy’umwaka wa 2020, bivuye kuri 0.7% mu gice cya mbere cya 2019 na 4.2% mu gice cya kabiri cy’umwaka wa 2019.

Inguzanyo mu mabanki zaragabanyutse

Banki Nkuru y’u Rwanda yatangaje ko uburyo abantu basaba inguzanyo byagabanutseho 12.3%. Binahura n’uko inguzanyo nshya zatanzwe zagabanutseho ku 9.2% mu gice cya mbere cy’umwaka wa 2020, zivuye ku izamuka rya 36.8% mu gice cya mbere cy’umwaka wa 2019.

Ibyo binajyana n’uburyo inguzanyo zagiye zishyirwa mu nzego zinyuranye nazo zagiye zigabanuka mu gice cya mbere cy’umwaka wa 2020. Nko mu bikorerwa mu nganda zari -9.8%, amazi n’ingufu ni -7.5%, ubwikorezi n’itumanaho zari -4.0% naho ibikorwa rusange n’inyubako ziba -1.6%.

Iryo zamuka ariko ribusana n’amafaranga yabikijwe mu bigo bitanga serivisi z’imari, kuko yo yazamutse kuri 17.8% kugeza muri Kamena 2020, avuye kuri 13.2% yabarwaga kugeza muri Kamena 2019.

BNR kandi yatangaje ko banki n’ibigo by’imari byakomeje kongera imbaraga mu kwegera abakiliya, aho kugeza muri Kamena 2019 habarwaga ibyuma bikoreshwa mu kwishyura (POS)20,094, mu gihe muri Kamena 2020 habarurwaga 41,560.

Ni mu gihe nk’abatanga serivisi za Mobile Money, muri Kamena 2019 bari 102,182, mu gihe muri Kamena 2020 bari bageze ku 111,422.

Ubucuruzi mpuzamahanga bwarahungabanye kubera COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .