Igiciro cya lisansi cyagabanyijweho amafaranga y’u Rwanda 119

Yanditswe na HABIMANA James
Kuya 3 Mutarama 2019 saa 07:01
Yasuwe :
0 0

Kuva kuri uyu wa 3 Mutarama 2019, ibiciro by’ibikomoka kuri peteroli byaganyijwe, kuri lisansi litiro i Kigali yagabanutseho 119 Frw, igera ku 1013 Frw naho Mazutu igabanukaho 109 Frw kuri litiro, igera ku 1039.

Urwego Ngenzuramikorere (RURA) rwatangaje ko iri manuka rishingiye ku imanuka ry’ibiciro by’ibikomoka kuri peteroli ku rwego mpuzamahanga.

Ku wa 7 Ugushyingo 2018, ibiciro by’ibikomoka kuri peteroli byari byazamutse. Kuri lisansi, litiro i Kigali yari yiyongereyeho 23 Frw igera ku 1132 Frw naho kuri mazutu yiyongeraho 55Frw kuri litiro, igera ku 1148 Frw.

Ibi biciro bimanutse nyuma y’aho mu Ukuboza 2018, ibiciro by’ibikomoka kuri peteroli byongeye kumanuka ku isoko mpuzamahanga kubera ubukungu bw’Isi butifashe neza.

Imibare yatangajwe tariki ya 24 Ukuboza 2018, yagaragazaga ko ibiciro by’ibikomoka kuri peteroli byamanutse ku gipimo kirenga 30% mu gihembwe cya kane cya 2018, kiri hasi cyane uhereye mu gihembwe cya gatatu cya 2017.

Ni impinduka zishingiye ku kuba abashoramari bafite impungenge ku iterambere ry’ubukungu, ahanini kubera imbogamizi mu bucuruzi hagati ya Amerika n’u Bushinwa.

Abashoramari kandi bagabanyije umurego mu bucuruzi bwa peteroli n’isoko ry’imari n’imigabane, bahitamo guhugira mu bijyanye n’ubwa zahabu.

Ibiciro bya peteroli itaratunganywa ya Brent byagabanutseho ama-cents 43 bigera kuri $53.39 ku kagunguru ku wa Mbere, mu gihe hari ubwo kari kageze ku $54.66, mu gihe peteroli yo muri Amerika yatakaje ama-cents 73 kakagura $44.86.

Brent yaguyeho 11% mu cyumweru gishize igera ku gipimo gito kuva muri Nzeri 2017 mu gihe iya Amerika yamanutse cyane ugereranyije na Nzeri 2017, bituma igabanuka rigera kuri 35% muri iki gihembwe.

Ishusho y’ubukungu n’uruhare ifite ku isoko ry’ibikomoka kuri peteroli, bikomeje gushyira igitutu ku biciro bigenwa. Ibigo bitandukanye ku Isi byaraguye ku gipimo kigera ku 9.5 % mu Ukuboza 2018, imanuka riri hejuru kuva muri Nzeri 2011 ubwo ibihugu bikoresha amayero byari mu kaga.

Umuryango uhuza Ibihugu byohereza hanze ibikomoka kuri Peteroli n’ibyo bikorana biyobowe n’u Burusiya, byemeranyije ko kuva muri Mutarama 2019, bizagabanya ingano y’umusaruro kugeza ku tugunguru miliyoni 1.2 ku munsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza