Ibyo wakwitega mu imurikagurisha ry’ibicuruzwa byo muri Oman rigiye gutangira i Kigali

Yanditswe na Bukuru JC
Kuya 26 Gashyantare 2020 saa 07:21
Yasuwe :
0 0

Harabura iminsi mike cyane ngo imurikagurisha ritegerejwe cyane ry’abanya-Oman ritangire mu Mujyi wa Kigali. Tariki ya 29 kugera kuya 3 Werurwe, abacuruzi n’abashoramari bagera kuri 80 baturutse Muscut mu murwa mukuru wa Oman ndetse no mu yindi mijyi bazamurika ibicuruzwa byabo birimo byinshi bifite umwihariko.

Guhera ku bicuruzwa byihariye birimo ibiribwa, ibikoresho byifashishwa mu ngo, iby’ubwubatsi ndetse n’ibindi byinshi, byose bizamurikirwa muri OPEX [Omani Products Exhibition) biteganyijwe ko izabera muri Kigali Convention Centre.

Iri murikagurisha ni uburyo bwiza bwo guhaha ku biciro byiza ndetse no ku bacuruzi bifuza kurangura ibicuruza bifite umwihariko ariko kandi bihendutse.

Oman ni igihugu cy’Abarabu gituranye na Leta Zunze Ubumwe z’Abarabu, bugufi na Dubai. Ni ubwami bumaze igihe kinini mu gace k’ikigobe cya Perse, dore ko ubwami bwabo bumaze imyaka isaga 300 abami basimburana ubudahagarara.

Iki gihugu kigizwe n’imisozi, ubutayu n’imirambi hafi y’inyanja gituwe n’abasaga miliyoni 4.5 z’abaturage biganjemo abayisilamu ariko abagera kuri 46 % ni abanyamahanga bagiye kuhashaka ubuzima.

Nibura umuturage umwe wa Oman, abarirwa ko yinjiza amadolari asaga ibihumbi 15 buri mwaka, ni ukuvuga asaga miliyoni 14 Frw.

Iyo ni ishusho nto igaragaza uburyo icyo gihugu cyateye imbere, haba mu mutungo kamere nka peteroli cyohereza hanze n’ibicuruzwa bishingiye ku byuma n’ibyakorewe mu nganda bihakorerwa.

Iri murikabigurisha ryiswe OPEX ryateguwe n’ikigo cyo muri Oman gishinzwe ishoramari no guteza imbere ibyoherezwa mu mahanga (Ithraa) n’urwego rushinzwe ubucuruzi n’inganda, Madayn.

Umuyobozi wa Ithraa, Maymuna al Adawi yavuze ko kuba ubukungu bw’u Rwanda bukomeje kuzamuka umwaka ku wundi, bikwiriye kubera urugero ibindi bihugu bya Afurika.

Yavuze ko uko gutera imbere k’ubukungu bw’u Rwanda no kuba butajegajega ari byo bituma abashoramari mpuzamahanga bifuza kuza kuhashora imari.

Yagize ati “Mu gihe ibihugu bitandukanye byari bizwiho kohereza ibicuruzwa hanze biri kujegajega mu bukungu, u Rwanda rwo rukomeje kongera umusaruro rukura mu byoherezwa hanze.”

Yavuze ko kimwe mu bituma ubukungu bw’u Rwanda bukomeza kumera neza, ari uko budashingiye ahanini ku buhinzi ahubwo bushingiye ku mitangire ya serivisi inoze.

Yagize ati “Tubona ko mu Rwanda hari amahirwe akomeye y’ishoramari ari nacyo kitwizeza ko imurikagurisha ry’ibyakorewe muri Oman rizagenda neza.”

Umuyobozi wa Komite itegura iri murikagurisha, Ayman bin Abdullah Al Hasani yavuze ko ibikoresho n’ibicuruzwa byakorewe muri Oman byujuje ubuziranenge mpuzamahanga ari naho bahera bavuga ko ibicuruzwa byabo bizishimirwa mu Rwanda.

Nta mpungenge abanya-Oman bafite ku bwitabire bw’Abanyarwanda muri iri murikagurisha kuko ibyakorewe muri icyo gihugu byizewe ku rwego mpuzamahanga, ibyo bikaba byarigaragaje mu mamurika yabanje nk’iryabereye muri Qatar, Arabie Saoudite no muri Leta Zunze Ubumwe z’Abarabu.

Imurikagurisha ry’ibyakorewe muri Oman ryatangiye mu 2012. Irizabera mu Rwanda, uzaba umwanya wo kuganira n’abashoramari bo mu Rwanda uburyo bwo guteza imbere ubufatanye mu ngeri zitandukanye.

Nibura mu mwaka wa 2018, ibicuruzwa biturutse muri Oman bijya mu mahanga byabarirwaga kuri miliyari 36.9 z’amadolari. Ibyinshi mu bicuruzwa byaho byoherezwa mu Bushinwa, Leta Zunze Ubumwe z’Abarabu, u Buhinde, Taiwan n’ibindi. Ibikorwa bishingiye kuri serivisi muri Oman na byo byabarirwaga miliyari 35 z’amadolari mu mwaka wa 2018.

Bimwe mu bicuruzwa binjiriza akayabo Oman harimo ibikomoka kuri peteroli, ibikoresho bikozwe mu byuma, amafumbire mvaruganda, ibikoresha bya pulastiki, aluminium, ubutare n’ibindi, birimo byinshi bizamurikirwa mu Rwanda.

Oman ni kimwe mu bihugu bikorwamo ibyaha bike ku isi kubera umuco ukomoka ku idini ya Islam n’imyitwarire iranga abatuye icyo gihugu. Ni igihugu kigendera ku mategeko ya Sharia ku buryo ubujura, ubwicanyi n’ubundi bugizi bwa nabi ari ikizira, ari nayo soko y’umutekano uharangwa.

Ibikoresho byo mu nzu bikorerwa muri Oman bizwiho kuramba
Imwe mu myenda y'umwimerere ikorerwa muri Oman
Imirimbo ikozwe mu mabuye agezweho iboneka muri Oman
Imirimbo y'agaciro ikozwe muri zahabu ni imwe mu iboneka muri Oman
Oman izwiho kugira amavuta n'imibavu bikunzwe kandi bigezweho
Imwe mu mirimbo gakondo y'abanya-Oman
Ibikoresho bitandukanye bikozwe mu birahuri byakorewe muri Oman
Imibavu yo muri Oman izwiho kuba myiza cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .