Ibicuruzwa by’umwimerere: Isezerano ku bazitabira Expo y’ibyakorewe muri Oman rigiye kubera i Kigali

Yanditswe na Nkurunziza Ferdinand
Kuya 28 Gashyantare 2020 saa 07:47
Yasuwe :
0 0

Kuri uyu wa Gatandatu muri Kigali Convention Centre nibwo imurikagurisha ry’abanya-Oman ritangira, ahitezwe kumurikirwa ibikoresho bitandukanye bikunzwe n’abatari bake ku isi kubera ubwiza n’umwihariko wo kuramba bizwiho.

Iri murikagurisha riri butangire kuri uyu wa 29 rikazasozwa ku wa 3 Werurwe 2020, rizitabirwa n’abacuruzi n’abashoramari basaga 80 baturutse muri Oman, aho biteguye kumurika ibikoresho by’ubwubatsi nk’amatiyo ya pulasitiki n’ay’ibyuma, insinga z’amashanyarazi n’iza fibre optique, sima n’ibindi byinshi.

Hazaba hari kandi n’ibikoreshwa mu buhinzi nk’amafumbire; ibikoresho byo mu rugo nk’ameza n’utubati; imitako y’ubukorikori; ibikomoka kuri peterori; ubuvuzi n’imiti y’ubwoko butandukanye; ibiribwa nk’amafi, amavuta, ikawa; ibikoresho bikozwe mu byuma, ubutare; imibavu n’ibindi bihuriye ku mwimerere w’ibikomoka muri Oman.

Hazaba hari kandi ibikoresho by’ikoranabuhanga, serivisi za leta, uburezi, n’itangazamakuru biri mu mwihariko uzanywe n’iri murikagurisha.

Iri murikabigurisha ryiswe OPEX ryateguwe n’ikigo cyo muri Oman gishinzwe ishoramari no guteza imbere ibyoherezwa mu mahanga (Ithraa) n’urwego rushinzwe ubucuruzi n’inganda, Madayn.

Abategura iri murikagurisha bavuga ko ari uburyo bwiza bwo guhaha ku biciro byiza ndetse no ku bacuruzi bifuza kurangura ibicuruza bifite umwihariko kandi bihendutse.

Umuyobozi wa Komite itegura iri murikagurisha, Ayman bin Abdullah Al Hasani yavuze ko ibikoresho n’ibicuruzwa byakorewe muri Oman byujuje ubuziranenge mpuzamahanga ari naho bahera bavuga ko ibicuruzwa byabo bizishimirwa mu Rwanda.

Ati “Nta gushidikanya dufite ku bwitabire bw’Abanyarwanda muri iri murikagurisha kuko ibyakorewe iwacu byizewe ku rwego mpuzamahanga, ibyo bikaba byarigaragaje mu mamurikagurisha yabereye muri Qatar, Arabie Saoudite no muri Leta Zunze Ubumwe z’Abarabu.”

Umuyobozi wa Ithraa, Maymuna al Adawi yavuze ko kuba ubukungu bw’u Rwanda bukomeje kuzamuka ubutitsa, bikwiriye kubera urugero ibindi bihugu bya Afurika.

Yavuze ko uko gutera imbere k’ubukungu bw’u Rwanda no kuba butajegajega ari byo bituma abashoramari mpuzamahanga bifuza kuza kuhashora imari.

Yagize ati “Mu gihe ibihugu bitandukanye byari bizwiho kohereza ibicuruzwa hanze biri kujegajega mu bukungu, u Rwanda rwo rukomeje kongera umusaruro rukura mu byoherezwa hanze.”

Oman imaze kuba igihugu cyigaruriye imitima y’abashoramari benshi bo hirya no hino ku isi kubera umutungo kamere wa peterori gifite n’iterambere ry’inganda by’umwihariko izikora ibyuma ryashinze imizi muri kiriya guhugu.

Iki gihugu gituranye na Leta Zunze Ubumwe z’Abarabu, hafi na Dubai, kikaba kigizwe n’imisozi, ubutayu n’imirambi hafi y’inyanja. Abaturage bacyo basaga miliyoni 4.5, biganjemo abayisilamu.

Nibura umuturage umwe wa Oman abarirwa ko yinjiza amadolari asaga ibihumbi 15 buri mwaka, ni ukuvuga asaga miliyoni 14 Frw.

Inkuru bijyanye: Ibyo wakwitega mu imurikagurisha ry’ibicuruzwa byo muri Oman rigiye gutangira i Kigali

Ibikoresho bitandukanye byo mu nzu bikozwe mu buryo bw'umwimerere
Imibavu yo muri Oman izwiho kuba myiza cyane
Imiti yakorewe muri Oman izaba iri mu imurikagurisha rizabera i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza