I&M Bank yashyizeho ikarita ya mbere mu Rwanda ishobora kwakira ubwoko 15 bw’amafaranga

Yanditswe na Rabbi Malo Umucunguzi
Kuya 30 Kanama 2019 saa 09:58
Yasuwe :
0 0

I&M Bank Rwanda Plc ifatanyije n’ikigo gitanga serivisi z’amakarita cya MasterCard, yashyizeho ikarita y’ikoranabuhanga ishobora kwakira ubwoko 15 bw’amafaranga, yakoreshwa mu kwishyura ibintu bitandukanye haba ku byuma byo mu masoko (POS) cyangwa kugura ikintu kuri internet.

Iyi karita yamuritswe kuri uyu wa Kane ni ingenzi cyane kuko mu gihe Isi yabaye umudugudu mu bijyanye n’ubucuruzi cyangwa imirimo, abantu bakeneye gukoresha amafaranga anyuranye, ku buryo iyi karita Multicurrency Prepaid Platinum izaborohereza itabasabye kugira aho bahurira n’ibiro by’ivunjisha.

Umuyobozi wa MasterCard mu Rwanda, Frank Molla, yavuze ko ikintu cya mbere bahanganye nacyo muri iki gihe ari ukuba abantu bakomeza kugendana amafaranga mu ntoki, iyi karita ikaba yafasha mu kubigabanya kandi ko yagenzuwe bihagije.

Ati “Ku bakoresha iyi karita nk’abagenda mu mahanga, mufite ahantu hasaga miliyoni 50 mushobora kugura ibintu mukoresheje iyi karita, naho mu gihugu, mu bufatanye tuzakorana na Banki Nkuru y’Igihugu na I&M ndetse n’abandi babyifuza, tuzabasha kugera kuri byinshi.”

Molla yavuze ko ari umwe mu bagerageje iyi karita mu bihugu bya Singapore, Malaysia, Dubai na Kenya, kandi ikora neza. Mu bufatanye na I&M bank barimo gutegura ibusubizo byinshi by’ikoranabuhanga, ku buryo mu minsi mike ngo bazatangaza ibindi byagezweho.

Umuyobozi Mukuru wa I&M Bank Rwanda Plc, Robin Bairstow, yavuze ko iyi karita uretse kuzafasha abantu bakeneye gukoresha neza amafaranga yabo batagombye kuyitwaza mu ntoki, bizabahesha igabanyuka ku bindi bikorwa bifuza.

Ati “Iyi ni indi ntambwe itewe mu rugendo rugana ku kudahererekanya amafaranga mu ntoki, twifuje ko abantu bazagura aya makarita mu mezi atatu ya mbere bazayahabwa ku igabanuka rya 50%, mu gushimangira ibyo twiyemeje mu rugendo rwo kudahererekanya amafaranga mu ntoki. Iyi karita ishobora kwakira ubwoko 15 bw’ifaranga, ukabasha kwakirirwa ahagenewe abashyitsi ku bibuga by’indege bisaga 1000 n’izindi nyungu nyinshi utasanga ku zindi karita za Platinum Prepaid.”

“Nishimiye kuvuga ko iyi karita yageragerejwe mu bihugu 15, ikoreshwa inshuro zisaga 1000 mu bihugu byo muri Leta Zunze Ubumwe za Amerika, u Burayi, Aziya y’Uburasirazuba bw’Amajyepfo, n’ahandi. Ubwoko 15 bw’ifaranga yakira burinda umuntu kujya kuvunjisha cyangwa kubikuza amafaranga igihe ari mu mahanga, ukoresha amafaranga uba washyize ku ikarita ubwayo.”

Bairstow yavuze ko iyi banki yiyemeje kuza ku isonga mu guhanga udushya, aho mu mwaka ushize yashyizeho uburyo bwo kohererezanya amafaranga bwa Spenn ku buntu, bumaze kwitabirwa n’abasaga 300 000. Iheruka gushyiraho ATM zimukanwa n’imashini zifasha mu kubitsa amafaranga.

Umuyobozi ushinzwe Ikoranabuhanga muri I&M Bank Rwanda Plc, Cyusa Charles Eloi, yavuze ko nubwo iyi karita ishobora kwakira ubwoko 15 bw’amafaranga, umuntu ashobora gukoreshaho butandatu icyarimwe bitewe n’ubwo yihitiyemo.

Iyo umuntu ahawe ikarita ahabwa n’umuyoboro wo kuri internet (portal), ashobora kunyuramo agakora amahitamo yose yifuza ajyana n’ikarita ye. Ni ukuvuga ko ubishatse wahitamo gukoresha icyarimwe Amafaranga y’u Rwanda, Ama-Yen yo mu Bushinwa, Amadolari ya Amerika, Amapawundi yo mu Bwongereza, Amayero n’ama CFA yo muri Afurika y’iburengerazuba.

Ibyo byatuma bitewe n’aho ugeze ukoresha amafaranga runaka ari ku ikarita, bidasabye ngo ujye gushaka aho uvunjisha, ibintu bisaba umwanya n’ikiguzi cyo kugura rya faranga ry’amahanga udafite.

Cyusa ati “Twakunze gusanga Abanyarwanda bajya mu mahanga bahura n’ikibazo cy’uko bakoresha amakarita ya hano mu Rwanda ugasanga ntiyemerwa, kuko aba ariho ubwoko bumwe bw’amafaranga y’u Rwanda. Iyo rero ubikuje ugashyiraho no kuvunja, usanga igiciro gisa n’aho cyiyongereye. Twebwe rero twazanye igisubizo cyo kuvuga ngo kuki tutakemura ikibazo cy’aba bantu bakunda kujya mu mahanga, tubahereza ikarita itaribuzanemo icyo kintu cyo kuvunja.”

Ayo moko atandatu y’amafaranga yajya ku ikarita imwe kandi ukaba wayashyiriraho icyarimwe yose, ubifashijwemo na I&M Bank.

Gusa igihe ufite nk’amafaranga y’u Rwanda ku ikarita yawe, ushobora kuyahindura mu manyamahanga, ukabyikorera unyuze mu nzira uhabwa igihe ufata ikarita yawe ya Multicurrency Prepaid, ukaba wayoherereza umuntu ku buntu n’ibindi ushaka, bidasabye ko wifashisha banki.

Cyusa yakomeje ati “Bimwe mu bibazo dukunze guhura nabyo nk’amabanki, ni ibijyanye no kubura amadevize, aho umuntu aza akavuga ngo ashaka kubikuza ibihumbi ‘birenga $300 kuko ngiye kugura ikintu i Burayi’, ariko mugasanga ntabwo mu mwanya ayakeneyemo muyafite, cyangwa se niba munayafite ni amafaranga igihugu gikeneye twakagombye kuba tuzana tukayabika, ahubwo twebwe turimo turayatanga.”

“Ni ukuvuga ngo agaciro k’ifaranga ryacu karagenda kagabanyuka kubera ko karimo kugura amafaranga y’ahandi, ntabwo ari ay’ahandi aragenda aza iwacu. Iyi karita ni bumwe mu buryo bushobora gukemura icyo kibazo mu kwihaza mu madevize mu Rwanda, agume mu gihugu kandi mu mabanki yacu.”

Iyi karita ku ikubitiro igura 17500 Frw mu gihe ku giciro cyayo gisanzwe ari 35 000 Frw. Kuyibona ni ukugana ishami rya I&M Bank ukuzuza inyandiko yagenwe, ugatanga imyirondoro n’ibikuranga.

Ubufatanye na MasterCard buzatuma abakoresha aya makarita babasha kugura ibintu ahantu hasaga miliyoni 50 mu bihugu bisaga 210 ku Isi.

Izindi nyungu ni uko ufite iyi karita, nubwo yaba ari mu mahanga wowe uri mu Rwanda ushobora kumushyiriraho amafaranga muri I&M Bank, ku buntu. Ni kimwe n’igihe waba ufite ikintu ushaka gutumiza nko muri Amerika, kubera imikoranire na MasterCard, ucyohererezwa ku igabanyuka rya 30%.

Iyi karita kandi itanga amahirwe ko nk’igihe uyitaye iriho amafaranga, banki ishobora kugufasha kwikura mu kibazo ikakwishyurira mu gihe urindiriye ko uhabwa inshya.

Faith Kobusingye ni we wayoboye ibirori kuri uyu mugoroba
Abakozi n'abafatanyabikorwa ba I&M Bank Rwanda bitabiriye ibi birori
Frank Molla uyobora Mastercard mu Rwanda yavuze ko hari inyungu nyinshi zizagendana n'iyi karita
Umuyobozi Mukuru wa I&M Bank Rwanda Plc, Robin Bairstow, yagaragaje ko iyi karita izatuma abayikoresha barushaho guhendukirwa
Robin Bairstow yahamije ko Abanyarwanda babonye uburyo bushya buzaborohereza mu gukoresha amafaranga yabo
Netpunez Band yashimishije abitabiriye uyu mugoroba udasanzwe
Bairstow na Molla baganira mu muhango wo kumurika Multicurrency Prepaid Platinum Card
Nubwo ikarita yamuritswe ari nto nk'izisanzwe, iyakoreshejwe muri uyu muhango yatwawe n'abasore b'inkorokoro
Multicurrency Prepaid Platinum Card ya mbere mu Rwanda yamuritswe na I&M Bank Rwanda Plc
Robin Bairstow uyobora I&M na Molla uyobora Mastercard bishimiye intambwe yatewe
Abayobozi bishimiye ikarita nshya yamuritswe bazamura ikirahuri
Umuyobozi ushinzwe Ikoranabuhanga muri I&M Bank Rwanda Plc, Cyusa Charles Eloi, yavuze ko iyi karita ishobora gukoresha ubwoko butandatu bw'amafaranga, icyarimwe

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza