Hatangajwe amatariki y’Imurikagurisha Mpuzamahanga ribera i Gikondo

Yanditswe na Uwimana Abraham
Kuya 6 Ugushyingo 2020 saa 05:20
Yasuwe :
0 0

Urugaga rw’Abikorera mu Rwanda (PSF) rwatangaje ko Imurikagurisha Mpuzamahanga ku nshuro ya 23, rizaba kuva ku itariki ya 11 Ukuboza kugeza ku ya 31 Ukuboza 2020 rikabera i Gikondo.

Ibi PSF yabitangaje kuri uyu wa 6 Ugushyingo 2020, ibinyujije ku rubuga rwayo rwa Twitter, ni nyuma y’aho ryari ryarimuwe ntiribe muri Nyakanga nk’uko byari bimenyerewe bitewe n’icyorezo cya Coronavirus.

Iri murika ni kimwe mu bikorwa ngarukamwaka bihuriza hamwe abantu b’ingeri zose baturuka mu bihugu bitandukanye ku Isi.

Byari bimaze kumenyerwa ko kuva mu mpera za Nyakanga kugeza mu ntangiriro za Kanama buri mwaka haba imurikagurisha mpuzamahanga ryitabirwa n’ibihumbi by’abantu i Gikondo.

Muri iri murikagurisha ba rwiyemezamirimo, ibigo by’imbere mu gihugu n’ibyo hanze byegereza Abanyarwanda serivisi bitanga ndetse bikabafasha kuzisobanukirwa.

Umuyobozi Mukuru wa PSF, Bapfakurera Robert, muri Kanama, nibwo yavuze ko muri uyu mwaka, imurikagurisha mpuzamahanga ritazaba muri Kanama nkuko bisanzwe.

Icyo gihe yagize ati “Uyu mwaka imurikagurisha ryari kuzaba mu kwezi kwa munani nkuko bisanzwe, ariko ntabwo turabireka burundu turateganya ko ryaba mu kwa 12. Turabiteganya kuko iki cyorezo ibintu bigenda bihinduka urabona ko indege zatangiye gukora, ejo n’ibindi byose bizatangira gukora. Rero turavuga ngo muri aya mezi ane asigaye turateganya ko mu kwa 12 twakora imurikagurisha.”

Ni imurikagurisha ryagiye rigaragaraho kwitabirwa n’abantu benshi. Mu mwaka ushize ryari riteganyijwe kwakira abarenga ibihumbi 400.

Iri murika ni kimwe mu bikorwa bihuza abanyarwanda benshi

Ibikorwa by’imurikagurisha byatangiye mu 1978, icyo gihe byategurwaga na Minisiteri y’Ubucuruzi gusa yaje gufungurira imiryango ibihugu by’ibituranyi mu 1998 aho muri uwo mwaka ryitabiriwe n’abagera ku 140 n’abanyamahanga 29. Icyo gihe bose hamwe bageraga ku 169, umubare wikubye inshuro zirenga eshatu.

Ryatangiye ridafite aho rikorera hazwi byanagiraga ingaruka ku baritegura n’abamurika ariko ryaje kugenda rikura umwaka ku wundi. Kuva mu 1997 kugera mu 2005, Expo yaberaga kuri Stade Amahoro, Lycée de Kigali no mu tundi duce tw’Umujyi wa Kigali mbere yo kwimurirwa i Gikondo mu 2006.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .