00:00:00 IGIHE NETWORK KN KINYARWANDA EN ENGLISH FR FRANCAIS

Guverinoma yahumurije abaturarwanda ku izamuka ry’ibiciro ku isoko

Yanditswe na Rabbi Malo Umucunguzi
Kuya 18 May 2022 saa 04:33
Yasuwe :

Minisitiri w’Intebe, Dr Edouard Ngirente yavuze ko Guverinoma yiteguye gufata ingamba zose zishoboka, kugira ngo ibiciro ku isoko bidakomeza kuzamuka mu buryo bibera umutwaro Abanyarwanda.

Yabivuze kuri uyu wa Kane ubwo hatangizwaga icyiciro cya kabiri cy’ikigega nzahurabukungu, Economic Recovery Fund, ERF

Yavuze ko mu kwezi gushize kwa Mata ibiciro byakomeje kwiyongera, aho byageze ku gipimo cya 9.9% mu gihe muri Werurwe uyu mwaka igipimo cyari kuri 7.5%.

Yakomeje ati "Nubwo ibiciro by’ibicuruzwa byishi byazamutse ari ibitumizwa mu mahanga nk’isukari, umuceri, amavuta n’ibindi, usanga hari n’ibiboneka mu Rwanda byagiye bizamuka biturutse ahanini ku izamuka ry’ibiciro by’ibikomoka kuri peteroli, ndetse n’uburyo abagurisha baba bagira ngo bashobore kubona ibiva mu mahanga."

Yavuze ko mu gihugu hagaragaye abacuruzi bazamura ibiciro nta mpamvu zifatika bashingiyeho.

Yakomeje ati "Nubwo bigaragara ko ibiciro bikomeje kuzamuka ku masoko, guverinoma ikomeje gukurikirana no gufata ingamba zitandukaye kugira ngo Abanyarwanda badakomeza kumererwa nabi n’izamuka ry’ibiciro. Izamuka ry’ibiciro ntabwo twarihagarika nka Guverinoma, ariko tugerageza kugabanya uwo muzigo ku bahahira mu masoko yacu."

"Guverinoma y’u Rwanda kandi ikomeje no gushyiraho izindi ngamba zirimo nko gukora igenzura ku masoko hagamijwe kureba ko abacuruzi batazamura ibiciro uko bishakiye no kureba ko uburenganzira bw’umuguzi bwubahirizawa."

Yavuze ko guverinoma ikomeje gutanga nkunganire ku bicuruzwa na serivisi by’ingenzi bishobora kugira ingaruka ku Banyarwanda benshi.

Ati "Ni muri urwo rwego guverinoma yashyize nkunganire ku giciro cy’ibikomoka kuri peteroli, aho ubu igiciro cya lisansi cyiyongereyeho amafaranga 103 Frw gusa mu gihe hari kwiyongeraho 218 Frw iyo hatabaho Nkunganire ya Guverinoma. Kuri mazutu naho igiciro cyiyongereyeho 167 Frw mu gihe hari kwiyongeraho 282 Frw iyo hatabaho nnone nkunganire ya Guverinoma."

"Ibyo bivuga ko kuri lisansi na mazutu Guverinoma yigomwe amafaranga 115 Frw kuri litiro, kugira ngo yorohereze abakora ingendo cyane cyane yirinda ko hari amafaranga yiyongera ku mafaranga y’urugendo."

Ibyo ngo byatumye igiciro cy’ibicuruzwa kidahungabana cyane, bituma ibiciro abagenzi bishyura mu modoka bitazamuka, kimwe n’ibiciro by’ubwikorezi bitazamutse cyane.

Yakomeje ati "Ikindi kandi binyuze mu bufatanye hagati ya leta n’abikorera, hari gahunda zatangiye zigamije kubona ibicuruzwa ku yandi masoko afite ibyo dukeneye, aha twavuga nk’amavuta, isukari n’ingano. Tumaze kubona ikibazo kiri ku isi aho twakuraga ibi bicuruzwa, twagerageje gushaka ahandi hantu abacuruzi bacu batangira kubikura."

Yanavuze ko Guverinoma ikomeje kureshya abashoramari bifuza kubaka mu Rwanda inganda zitandukanye, bikazongera umusaruro w’ibikorerwa mu Rwanda.

Ati "Guverinoma yongereye nkuganire ku ifumbire ho 50% mu bihembwe by’ihinga A na B muri uyu mwaka, bikaba byari ukugira ngo ibiciro by’ibiribwa bitazazamuka cyane. Ibi bizongera ingano y’ifumbire n’umubare w’abakoresha ifumbire mu gihugu, kandi iyi nkunganire izakomeza mu mwaka utaha w’ingengo y’imari y’umwaka tugiye kujyamo wa 2022/23."

Yanavuze ko Guverinoma yongereye ingengo y’imari y’imbuto n’ifumbire, iva kuri miliyari 14 Frw igera kuri miliyari 20.7 Frw muri uyu mwaka w’ingengo y’imari.

Yakomeje ati "Guverinoma irongera guhumuriza abaturarwanda bose ko izakomeza gushyiraho ingamba zose ishobora kugira ngo ibiciro bidakomeza kwiyongera bikabije, nubwo biziyongera ariko ntibikabye cyane kugira ngo bitabera umuzigo abanyarwanda mu guhaha."

Mu bitegaywa harimo no kongera ubuso buhingwa, bikazatuma umusaruro w’ubuhinzi ukomeza kwiyongera.

Ibiciro byatangiye kwiyongera cyane guhera muri Gashyantare uyu mwaka ubwo hatangiraga intambara ya Ukraine n’u Burusiya.

U Burusiya buri mu bihugu byohereza hanze peteroli na gaz nyinshi, mu gihe ibyo bihugu byombi biza ku isonga mu kweza umusaruro mwinshi w’ingano n’amavuta y’ibihwagari.

Abayobozi batandukanye baganira mbere y'uko uyu muhango utangira
Meya w'Umujyi wa Kigali Pudence Rubingisa aganira na depite Munyangeyo Théogène
Minisitiri w'Ibikorwa remezo Dr Nsabimana Ernest yitabiriye uyu muhango
Umusangiza w'amagambo yari umunyamakuru Isheja Sandrine wa Kiss FM
Dr Diane Karusisi uyobora Banki ya Kigali na Robin Bairstow uyobora I&M Bank Rwanda, baganira
Dr Ndagijimana asobanura imiterere y'iki cyiciro gishya cya ERF
Umunyamabanga wa Leta muri MINECOFIN ushinzwe imari ya Leta, Richard Tusabe
Minisitiri Ushinzwe imirimo y'inama y'abaminisitiri, Ines Mpambara, yitabiriye uyu muhango
Minisitiri w'Intebe yashimangiye ko iki kigega kizanye ibisubizo mu kuzahura ubukungu
Uyu muhango wabereye muri Kigali Serena Hotel
Minisitiri w'Intebe Dr Ngirente ageza ijambo ku bitabiriye itangizwa ry'icyiciro cya kabrii cya ERF

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .