Equity Bank Rwanda yatangije uburyo buzafasha abaguzi kwishyurira kuri telefoni bakanatsindira ibihembo

Yanditswe na Evariste Nsengimana
Kuya 30 Nzeri 2019 saa 07:27
Yasuwe :
0 0

Equity Bank Rwanda yatangije uburyo bushya bwo kwishyura ibicuruzwa na serivisi zitandukanye mu maguriro ayo ariyo yose hifashishijwe telefoni, bukanabafasha gutsindira ibihembo birimo moto, televiziyo, telefone zigezweho, amafaranga buri cyumweru n’igihembo nyamukuru cya miliyoni 2.5Frw.

Ubu buryo bushya bwitwa ‘Eazzy Pay & Win’ cyangwa se ‘Ishyura na Eazzypay maze utsinde’, Equity Bank Rwanda yabufunguye kuri uyu wa 30 Nzeri 2019.

Busaba ko umucuruzi yiyandikisha muri iyi banki imaze kubaka izina muri serivisi z’ikoranabuhanga, ikamuha umubare umuranga (Eazzypay till number) umuguzi ashyira muri telefone igihe agiye kumwishyura, cyangwa akifashisha ikimenyetso cy’ikoranabuhanga (QR Code) atungaho telefoni, agakurikiza amabwiriza.

Equity Bank Rwanda igaragaza ko abacuruzi barenga 3600 bamaze kwiyandikisha muri ubu buryo, kandi icyifuzo ni uko buri muntu wese ucuruza yafasha buri muguzi kwishyura akoresheje Eazzypay.

Ukoresha ubu buryo yishyura ibicuruzwa nta kiguzi cya serivisi acibwa, bisaba ko aba afite telefone isanzwe cyangwa igezweho inafite internet cyangwa itayifite, agakurikiza amabwiriza.

Ku bantu badasanganywe konti muri Equity Bank bashobora gukanda *555# bagakurikiza amabwiriza arimo amufasha kwifungurira konti ahita atangira gukoresha hamwe na serivisi zayo zirimo na EazzyPay, ariko uwo bigoye yegera abakozi b’iyi banki cyangwa abayihagarariye bakamufasha.

Ufite telefone igezweho anakoresha internet, afungura ‘Application’ y’iyi banki yitwa “Eazzy Banking” yaba atayifite muri telefone akayimanura kuri Play Store agahitamo uburyo bwo kwishyura bwa ‘EazzyPay’ maze agasabwa gusoma (scan) QR Code y’umucuruzi akoresheje telefone ye.

Ku bacuruzi bifuza kwiyandikisha muri ubu buryo nabo ni ubuntu. Mu mezi atandatu ya mbere nta kiguzi bazajya basabwa ku mukiliya wahashye abukoresheje ariko biteganyijwe ko nyuma azajya acibwa 0.5% ku nyungu yabonye.

Ku mucuruzi ubu buryo bwamufasha kwirinda abakozi cyangwa n’abandi bantu bamwiba, kubona inguzanuo muri Equity Bank Rwanda n’ibindi.

Umuyobozi Mukuru wa Equity Bank Rwanda, Hannington Namara, yabwiye abanyamakuru ko ubwo buryo bugamije gufasha Abanyarwanda kujyana n’icyerekezo cyo kugabanya amafaranga ahererekanywa mu ntoki, n’ikiguzi cyo kujya kuri banki gushakayo amafaranga.

Yavuze ko uburyo bw’ikoranabuhanga bwifashishwaga n’abakiliya ba Equity Bank mu guhaha ari ubw’amakarita wasangaga busa n’ubuhenze kubera ikiguzi cy’ikarita n’ibindi, ariko nabwo uwifuza cyangwa uwo butagoye azakomeza kubukoresha.

Ati “EazzyPay rero ni uburyo twashyizeho aho umukiliya wa Equity aba afite uburyo bwo kugera kuri konti ye amasaha 24/24 akoresheje telefone ariko n’ibigo bifite ubwo buryo bikoresheje internet.”

Yavuze ko bufitiye inyungu abaguzi kuko nta kindi kiguzi bacibwa kandi bakaba babukoresha igihe icyo aricyo cyose.

Yakomeje agira ati “Ku guhaha no kwishyura aho abantu bajya kugura ibicuruzwa mu maguriro, umugati, amata n’ibindi bikenerwa mu ngo, uri umukiliya wa Equity ntukenera kugira ikarita, icyo ukenera ni telefone na Konti yawe.”

Namara yavuze ko mbere yo gutangiza ubu buryo hamwe n’ubundi bufasha abantu kwiguriza buzwi nka ‘Ezzyloan’, wasangaga mu bubiko bw’amakuru y’abifashisha ikoranabuhanga bashaka serivisi za Equity Bank Rwanda ari bake, ariko aho igerageza ryayo ritangiriye byagaragaye ko na saa kumi z’igicuku hari abazikenera barimo abashaka kujya kurangura.

Namara ati “Ubu buryo burimo n’agahimbazamushyi kugira ngo abanyarwanda bakangukire gukoresha ubu buryo twabashyiriyeho ibihembo bashobora gutsindira birimo moto, televiziyo, telefone n’igihembo nyamukuru cya miliyoni 2.5Frw.”

Umuyobozi w’ishami rishinzwe imenyekanishabikorwa n’abakiliya muri Equity Bank Rwanda, Niragira Athanasie, yavuze ko mu bihembo abanyamahirwe bazatsindira harimo moto 12, televiziyo za rutura 12, telefone zigezweho 12 n’igihembo nyamukuru cya miliyoni 2.5Frw.

Biteganyijwe ko buri munyamahirwe azajya ahembwa buri cyumweru nyuma yo gutangazwa no guhamagarwa mu kiganiro kizajya gica kuri Televiziyo Rwanda imbonankubone.

Equity Bank Rwanda yabonye ibyangombwa byo gukorera mu Rwanda mu 2011 , uyu munsi ifite abakiliya bafungujemo konti barenga ibihumbi 600 zirimo ibihumbi 350 z’abantu ku giti cyabo.

Bamwe mu bakozi ba Equity Bank Rwanda bari mu kiganiro n'abanyamakuru
Iribagiza Rose ushinzwe abacuruzi na Niragira ushinzwe kumenyekanisha ibikorwa n'abakiliya muri Equity Bank Rwanda bari mu kiganiro n'abanyamakuru
Umuyobozi Mukuru wa Equity Bank Rwanda, Hannington Namara, yabwiye abanyamakuru ko ubu buryo bugamije gufasha abanyarwanda kujyanama n’icyerekezo cyo kugabanya amafaranga ahererekanywa mu ntoki
Namara yavuze ko ubu buryo buzafasha mu kugabanya amafaranga ahererekanywa mu ntoki
Niragira yavuze ko uwatsinze azajya ahamagarwa mu kiganiro kiri kuba imbonankubona kuri Televiziyo Rwanda
Umuhanzi Rederman n'umushyurwarugamba Anitha Pendo ni bamwe mu bazafasha mu kumenyekanisha ubu buryo
Umuyobozi w’ishami rishinzwe imenyekanishabikorwa n’abakiliya muri Equity Bank Rwanda, Niragira Athanasie, yavuze ko mu bihembo abanyamahirwe bazatsindira harimo moto 12 na televiziyo 12 za rutura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza